दरसण 22

1 फेर बण मनै जिंदगी गै पाणी गी सुद्ध नदी दिखाई। आ नदी बि नगर गी सड़का गै बिचाळै बणेड़ी ही। आ बिलकुल साफ पाणी गी नदी परमेसर अर मेमणै गै सिंघासन ऊं निकळै ही। 2 सड़क गै बिचो बीच अर नदी गै दोना तरफ जीवन गा दरखत हा। हरेक मिहनै आ दरखत ऊं बारा तरियां गा फळ निकळता हा। आ दरखता गै पता ऊं देसा गै स्वास्थय खातर हा। 3 अब ओर कोई सजा कोनी रेवैगी, पण सैहर में मेमणै गो अर परमेसर गो सिंघासन रेवेगो। अर बांगा सेवक बांगी सेवा करेगा। 4 बे बांगी हजूरी में रेवैगा अर बांगै माथा पर यीसू गो नाम लिखेड़ो हो'सी। 5 बठै कदी रात कोनी हो'सी अर ना बठै चानणै गी लोड पड़सी। क्यूंकै प्रभु परमेसर बानै रोसनी देसी। अर बे हमेसा हमेसा खातर राज करेगा।

यीसू गो दुसर आणो

6 अर फेर बण केयो, “ऐ बाता भरोसेमंद अर सच्ची है। पवितर परमेसर गी बात बताण आळा गो प्रभु परमेसर आपगै दास कनै सुरगदूत ईंखातर भेज्यो है कै अचानक होण आळी बाता नै बतावै कै देखो।”

7 मैं अचानक आण आळो हूं। आसिस पायेड़ो मिनख बो है झिको ईं किताब में लिखेड़ी परमेसर गी बात गो पालणा करै है।

8 अर मैं यूहना आ सारी बाता नै देखी अर सुणी है। आ सारी बाता नै देखण अर सुणन गै बाद झिकै सुरगदूत मनै ऐ बाता दिखाई, मैं बिंगी उपासना करतो बिंगै पगा पड़ग्यो। 9 पण बण मनै केयो, “देख इंया ना कर। मैं बी थारी तरियां दास अर परमेसर गी बात बताण आळा भाईया गो साथी हूं, सिरफ परमेसर नै ई निवण करो।”

10 फेर बण केयो, “ईं किताब गी बाता पर मोहर ना लगा, क्यूंकै टेम कनै आ'ग्यो है। 11 झिको अन्यायी है बो बिंया ई बण्यो रेवै, झिको दुस्ट है, बो दुस्ट झिको धरमी है बो धरमी बण्यो रेवै अर झिको पवितर है बो पवितर बण्यो रेवै।”

उपसंहार

12-13 “सुणो, मैं अचानक आण आळो हूं अर लोगा नै बांगै करमा गै हिसाब ऊं दियो जाण आळो फळ मेरै कनै है। मैं आल्फा अर ओमेगा हूं, मैं ईं सरुआत अर अंत हूं अर मैं ईं पेलो अर आखरी हूं।

14 आसिस पायेड़ा लोग बे है झिका आपगा गाबा धो गै सुद्ध हो'ज्य है जिऊं बानै जीवन गै दरखत कनै अर सैहर में जाण खातर बारनै माखर हक मिलै। 15 अर कुता, जादुगर, बेबीचारी, हत्यारा, मूरती पूजण आळा अर झूठ ऊं प्रेम राखण आळा अर झूठी बाता बताण आळा है बे बारे रेवैगा।

16 मैं, यीसू, सुरगदूतां नै ईंखातर भेज्यो जिऊं बो बिस्वासी मणडलिया में गवाई दे सकै। मैं दाऊद गो मूळ अर चमकतो झांझरकै गो तारो हूं।”

17 पवितर आत्मा अर बीनणी गो केणो है कै आओ झिको सुणै बो केवै है, आओ अर झिको तीसो है बो बी आओ। झिको इंया करेगो बो जीवन गो पाणी मुफ्त में पीयैगो।

18 हरेक झिको ईं किताब में परमेसर गी बात सुणै है बि खातर मेरी आ गवाई है जे कोई आ बाता में ओर कीं जोड़ेगो तो परमेसर ईं किताब में लिखेड़ी बिपतिया बि खातर बढावैगो। 19 झिको आदमी ईं किताब गी परमेसर गी बात मूं कीं निकाळै तो परमेसर जीवन गै दरखत, पवितर सैहर अर ईं किताब मूं बिंगो नाम मिटा दयगो।

20 झिका आ बाता गी गवाई दय है अर केवै है, “मैं जरूर बेगो ई आण आळो हूं। इंया ईं होवै है, प्रभु यीसू बेगा आज्यो।”

21 प्रभु यीसू मसी गी किरपा पवितर लोगा सागै रेवै। आमीन।