दरसण 12

लुगाई अर अजगर

1 फेर आकास में एक निसान दिख्यो झिकै में एक लुगाई सूरज नै ओड राख्यो अर चांद बिंगै पगा गै नीचे अर सिर पर बारा तारा गो मुकुट पेर राख्यो। 2 बा गर्भवती होई, अर बा गर्भ गी पीड़ ऊं चिलांवती ही। 3 फेर एक ओर निसान दिख्यो अर देखो, बिमै एक लाल रंग गो अजगर हो। बिंगै सात सिर अर दस सींग हा। अर सारै सिरा पर एक एक मुकुट हो। 4 बण आपगी पूंछ ऊं आकास गै तारा गो एक तिहाई हिसो खींच गै धरती पर फेंक दियो अर बो अजगर गर्भवती लुगाई सामे खड़यो हो'ग्यो। बो बिंगै टाबर नै जामंता ई खा लेणो चावै हो। 5 जद बण लुगाई एक टाबर नै जन्म दियो झिको लोह गै राज दण्ड ऊं सारै देसा पर राज करण आळो हो। 6 अर अचानक ई बि लुगाई गै टाबर नै परमेसर अर बिंगै सिंघासन गै सामै उठा गै पोंचा दियो। अर बा लुगाई भाजगे जंगळ में उड़गी जठै परमेसर गी ओर ऊं बि खातर जिग्या तैयार करेड़ी ही। जिऊं बा एक हजार दो सौ साठ दिना तांई पाळी जा सकै।

7 फेर सुरग में एक युद्ध होयो। झिकै में मीकाईल अर बिंगा सुरगदूत अजगर ऊं लड़ण खातर चाल्या अर बठै अजगर अर बिंगै दूता सागै बांगो घमासणा युद्ध छिड़ ग्यो। 8 अजगर अर बिंगै दूता नै मूं गी खाणी पड़ी अर बठै बा खातर जिग्या कोनी बची। 9 जद बि मोटै अजगर नै नीचे गिरा दियो झिको इबलीस अर सैतान कुहावै है अर सारी धरती गै लोगा नै भहकावे है बिनै बिंगै दूता समेत धरती पर गिरा दियो।

10 जद मैं सुरग में बुलंद आवाज में ओ केवंता सुण्यो कै,

“अब आपणै परमेसर गी मुकती, राज, ताकत

अर बिंगै मसी गो हक दिखाई दियो है

क्यूंकै झिको म्हारै बिस्वासी लोगा पर दोस लगावंतो

अर म्हारै परमेसर सामे रात दिन बानै दोसी ठेहरावंतो हो बिनै आज नीचे फिकवा दियो।”

11 पण बो आ जीत मेमणै गै खून

अर आपगी गवाई गै बचन गी बजह ऊं पाई है

क्यूंकै बा आखरी सांस तांई मरण गी

चिंता कोनी करी ही।

12 ईंखातर हे सुरग अर इमै रेण आळा लोगो खुस रेवो।

पण धरती अर समुद्र पर हाय।

क्यूंकै सैतान अब भोत गुसे ऊं थारै कनै उतर आयो है।

क्यूंकै बो जाणै कै बिंगो टेम थोड़ो ई है।

13 जद बण अजगर देख्यो कै मनै धरती पर फेंक दियो है तो बि लुगाई नै सताण लागग्यो झिकी टाबर नै जन्म दियो हो। 14 पण बि लुगाई नै उकाब गा दो पांख देयड़ा हा कै बा बि अजगर गै सामूं उड़ज्य। जठै बा एक हजार दो सौ साठ दिना तांई पाळिजै। 15 फेर बण अजगर आपगै मूं माखर बी लुगाई सामै नदिया गो सो पाणी बहायो जिऊं बो बी लुगाई नै तीरा गै लेज्य। 16 पण धरती बि लुगाई गी मदद करी। धरती आपगो मूं खोलगे बो पाणी पी गी। झिको अजगर आपगै मूं ऊं निकाळयो हो। 17 अजगर नै बि लुगाई पर गुसो आ'ग्यो। जद बो बि लुगाई गी बाकी सन्तान नै झिकी परमेसर गी आग्यावां नै मानती ही अर यीसू गी गवाई देवती ही। बा सागै लड़ण नै चाल पड़यो। 18 अर समुद्र गै किनारै गी रेत पर जा'गे खड़ ग्यो।