दो पसू
13
1 मैं एक हिस्यै पसू नै समुद्र मूं निकळता देख्यो झिकै गै दस सींग अर सात सिर हा। अर बिंगै सींगा पर दस राज मुकुट हा। अर सिरा पर परमेसर गी निंदा गा नाम लिखेड़ा हा।
2 बि पसू चीतै गी तरियां लागै हो अर बिंगा पग भालू गी तरियां अर मूं सैर गी तरियां हो। अर ईं पसू नै अजगर आपगी ताकत, सिंघासन अर जबरदस्त हक दियो।
3 बि पसू गै सारा सीरा बुरी तरियां ऊं जखम होण'गी बजह ऊं बो मरण आळो सो लागै हो। पण बे जानलेवा जखम ठीक हो'ग्या हा अर सारी दुनिया गा लोग इनै मानण लागग्या।
4 लोग बि अजगर गी पूजा ओ केवंता करण लागग्या कै क्यूंकै अजगर बिनै राज करण गो हक दियो हो। ईं पसू बरगो ओर कोई कोनी है। अर इंगै खिलाफ कोई कोनी लड़ सकै।
5 बि पसू नै डींग मारण अर बेजती करण गो मूं देयड़ो हो। बिनै बंयाळीस मिंना तांई राज करण गो इजाजत देएड़ी ही।
6 ईंखातर बण पसू मूं खोलगे परमेसर गी निंदा करी। जिऊं परमेसर गै नाम गी अर बठै रेण आळा गी बदनामी हो सकै।
7 अर ईं पसू नै परमेसर गै लोगा गै खिलाफ लड़ाई छेड़न गी इजाजत देएड़ी ही कै बो बानै जीत ल्य। बिनै सारी जनजाती, लोग, न्यारो न्यारी भासा बोलण आळा लोग अर सारै देसां गै उपर राज करण गो हक देयड़ो हो।
8 अर सारी दुनिया गा लोग ईं पसू गी पूजा करेगा मतलब ओ कै बे लोग झिका गो नाम बि जीवन गी किताब में झिका बि मेमणै खातर बलिदान कोनी होया है। ओ मेमणो दुनिया गै सरुआत गै टेम ई मारिज्यगो हो।
9 “झिकै गै कान है बो सुण ल्य कै,
10 झिको केदी होण खातर बुलायो है बो जेळ में डालिजेगो।
झिको तलवार ऊं मारै बो खुद तलवार ऊं मारिजैगो। पवितर लोगा गो धीरज अर बिस्वास इमै ई है।”
11 फेर मैं धरती मूं एक ओर पसू नै निकळता देख्यो झिकै गै मेमणै गी तरियां दो सींग हा। पण ओ अजगर गी तरियां बोलै हो।
12 बि पेलै पसू गी मोजूदगी में ओ दूसरो पसू बिंगा सारा हक काम में लेवंतो हो। ओ दूसरो पसू बी पेलै पसू गी पूजा सारी दुनिया गै लोगा ऊं करवांवतो हो।
13 बो मोटा मोटा अजीब काम दिखावंतो हो अठै तांई कै बो आसमान ऊं धरती पर आग बी बरसा देवंतो है।
14 आ अजीब कामा ऊं झिका नै पसू गै सामणै दिखागे गो हक बिनै हासिल हो। बो धरती पर रेण आळै लोगा नै धोखो देवंतो हो। बो बानै ओ केवंतो कै बि पसू गी मूरती बणाओ झिकै गी देह पर तलवार गो घाव हो। बो पाछो जीमतो हो'ग्यो है।
15 क्यूंकै बिनै बी पसू गी मूरती में जान घालण गो हक मिलेड़ी हो। जिऊं बा मूरती बोल सकै अर इंयां बी कै झिका लोग बि मूरती नै पूजण ऊं इनकार करै तो बानै मरवा दय।
16 बण छोटा मोटा, अमीर गरीब आजाद गुलाम सारै लोगा गै दाहिणै हात या माथे पर एक छाप लगावा दी।
17 बण इंया बी करयो कै झिकै आदमी कनै बि पसू गो नाम होवै अर बिंगै नाम गी संख्या गी छाप ना होवै, बिनै छोड़गे ओर कोई मिनख लेण देण ना कर पावै।
18 झिकै नै समझ होवै तो बो पसू गी संख्या गो निसान लगाल्य। क्यूंकै आ संख्या मिनख गी है आ संख्या 666 है।