दरसण 11

दो गवाह

1 इंगी बाद कणई मनै नापण खातर एक कानो दियो अर केयो, “उठ, परमेसर गै मिन्दर अर बेदी अर बिमै आराधना करण आळा लोगा नै गिण ले।” 2 पण मिन्दर गो बारलो आंगण छोड़ देई, बिनै बा ना पापी क्यूंकै बो गेर यहुदियां खातर है। बे बंयाळीस मिनां तांई पवितर नगर रोंदेगा। 3 अर मैं आपगै दो गवावा नै हक दयूंगा अर बे टाट ओडगे एक हजार दो सौ साठ दिना तांई परमेसर गी बात बतासी। 4 ऐ जेतुन गा दो दरखत अर दो दीपदान गै झिका धरती गै मालिक गै सामणै खड़या रेवै है। 5 जे बानै कोई नुकसान करण गी कोसिस करै तो बे आपगै मूं ऊं आग निकाळ गै आपगै दुसमण नै खत्म कर दय। जे बानै नुकसान पोंचाणो चावै तो बे पक्का ई मारीजेगा। 6 बांगै कनै आसमान बंद करण गो हक है। बांगै परमेसर गी बात बोलण गै दिन में जिऊं बे मेह बरसाण बंद कर सकै। बा कनै ओ हक बी है कै सारै पाणी नै खून में बदळ सकै। अर बानै ओ हक बी है कै बे धरती पर हरेक तरियां गी बिपती ल्या सकै।

7 जद बे आपगी गवाई दे दयगा तो बो प्रभु झिको गेरै कुण्ड मूं निकळै गो बाऊं युद्ध करेगा। अर बो जीत हासिल करेगो बानै मार दयगो। 8 बे अर बांगी लोथ बी सैहर गै चुरावै पर पड़ी रेवैगी। ओ सैहर आत्मिक रूप ऊं सोदोम अर मिसर केहलावै है। बठै ई बांगो प्रभु यीसू करूस पर चढायो हो। 9 सारै देसा, जातिया गा, भासावा गा अर राज्यावां गा लोग साडे तीन दिन तांई बांगी लोथा नै देखता रेवैगा। पण बांगी लोथा नै दाबण कोनी दयेगा। 10 धरती पर रेण आळा लोग बांगी मोत पर खुसी मनावेगा। अर एक दूसरै खातर भेंट भेजैगा क्यूंकै आ दोना परमेसर गी बात बताण आळा धरती पर रेण आळै लोगा नै सताया हा।

11 अर साडे तीन दिन गै बाद परमेसर गी ओर ऊं जिंदगी गी सांस बामे समा गी। अर बे खड़या हो'ग्या अर बानै देखण आळै लोगा पर डर छा ग्यो। 12 जद बानै सुरग ऊं एक बुलंद आवाज सुणीजी कै अठै उपर आज्यो। ओ सुणगे बे बादळ पर सवार होगे आपगै दुसमण सामै सुरग पर चड़ग्या।

13 जद बि टेम ई जोर ऊं धरती हाली अर धरती गो दसमो हिसो पड़ग्यो। अर सात हजार लोग मरग्या। अर बाकी बचेड़ा लोग डरग्या अर परमेसर गी बडाई करण लागग्या।

14 इंया दूसरी बिपती खत्म होई अब तीसरी बिपती बेगी आण आळी है।

सातवी तुरही

15 जद सातवै दूत तुरही बजाई तो सुरग में मोटा मोटा हेला होण लागग्या अर लोग केवा हा कै दुनिया गो राज म्हारै मालिक अर बांगै मसी गो राज बणग्यो है अर बो हमेसा हमेसा खातर राज करेगा।

16-17 जद बे चौबीस बुजरग झिका परमेसर गै सामे आप आपगै सिंघासन पर बैठया हा बे परमेसर सामै गोढा टेक आराधना करण लाग्या कै, हे सारा ऊं सकतीसाली मालिक परमेसर झिका थे हो झिका थे हा थारो धन्यवाद करां कै थे आपगै मोटै हक ऊं राज करण लागग्या।

18 “अर जद गेर यहुदियां इंगो गुसो करयो तो थारो प्रकोप बां पर आ पड़यो।

अर अब बो टेम आ'ग्यो कै मरेड़ै लोगा गो न्याय करीजै।

अर सागै ईं सागै थारा सेवक परमेसर गी बात बताण आळा

अर पवितर लोगा अर बे छोटा मोटा लोग झिका थारै नाम गो भय मानै बानै प्रतिफळ मिलै

अर बा लोगा नै बर्बाद करीजै झिका लोग धरती नै बिगाड़ै है।”

19 जद परमेसर गो भवन सुरग में खोलिज्यो अर बिमै बांगी वाचा गो संदूक दिख्यो। जद बिजळी चमकण लागगी अर जोर जोर ऊं आवाज गरजन अर धरती हालण लागगी अर मोटा मोटा ओळा पढण लागग्या।