दरसण 10

सुरगदूत अर छोटी किताब

1 फेर मैं एक ओर सुरगदूत नै बादळ ओड़े सुरग ऊं उतरता देख्यो। बिंगै सिर पर मेघ धनुस हो। बिंगो चेरो सूरज गी तरियां अर पग आग गै खंभै गी तरियां हा। 2 बिंगै हात में एक खुलेड़ी छोटी किताब ही। बण दायों पग समुनदर पर अर बांयो पग धरती पर रख राख्यो है। 3 बो बुलंद आवाज में इंया चिलायो जिंया सैर दहाड़ै। बिंगै चिलाण ऊं गरजन गा सात सब्द सुणिज्या। 4 गरजन गा सातूं सब्द खत्म होण पर मैं लिखण आळो ई हो। इतै में मनै आसमान ऊं ऐ सब्द ओ केवंता सुणाई दियो कै, झिकी बाता गरजन गै सातूं सब्दा केई है बा पर मोअर लगा दे अर बानै ना लिख।

5 जद बो सुरगदूत झिको मैं समुनदर अर धरती पर खड़यो देख्यो, बण आपगो दाहिणो हात सुरग कानी चक्यो। 6 बण बि परमेसर झिको सदा सदा जींवतो है अर झिकै सुरग अर बिंगी सारी चिजां नै अर समुनदर अर बिंगी सारी चिजां नै अर धरती अर इंगी सारी चिजां नै बणाई है बिंगी सोगन खा'गे केयो, “अब ओर जादा देर कोनी होवैगी।” 7 पण जद सातवे सुरगदूत गो तुरही बजाण गो टेम आसी जद परमेसर गी लुकेड़ी बाता गो भेद पूरो हो'सी। झिकै गी सूचना बा पेला ई आपगी दासा नै परमेसर गी बात बोलण आळा दी ही।

8 अर सुरग ऊं बोलण आळो मिनख फेर मेरै सागै बाता करण लागग्यो। बो मनै केण लागग्यो कै, जा झिको सुरगदूत धरती अर समुनदर पर खड़यो है बिंगै हात मूं बा खुलेड़ी किताब ले ले।

9 जद मैं बी सुरगदूत कनै जा'गे केयो, “आ छोटी किताब मनै दे दे।” बण मनै केयो, “तू इनै खा'ले, आ तेरै पेट नै खारो कर दयगी। पण मूं में सेत बरगी मीठी लागैगी।” 10 जद मैं बा किताब लेगे खा ग्यो अर बा सेत बरगी मीठी लागी। पण खाण गै बाद मेरो पेट खारो हो'ग्यो। 11 इंगै बाद मनै केईज्यो तनै ओ संदेस भोत सारै लोगा नै, देसा नै, सगळी भासावा गै लोगा नै अर सगळै राजावां नै परमेसर गी बात कर'गे सुणाणो पड़सी।