दरसण 9

1 जद पांचवै सुरगदूत तुरही बजाई तो मैं सुरग ऊं धरती पर एक तारो पड़ता देख्यो। बि सुरगदूत कनै गेरै कुण्ड गी चाबी ही। 2 जद बण बि कुण्ड नै खोली तो बिमू मोटी भटी गो सो धुओ निकळ्यो। सूरज अर वायुमण्डक ईं धुंआ ऊं काळो हो'ग्यो। 3 ईं धुंआ मूं धरती पर टिडिया निकळी। आ टिडिया नै धरती गै बिछुआ बरगी ताकत देएड़ी ही। 4 अर आनै आ आग्या बी देएड़ी कै बे धरती गी घास, दरखत जा कोई हरी चीज नै नुकसान ना पोंचावै। पण बा मिनखा गो नुकसान करै झिका गै माथा पर परमेसर गी मोहर कोनी है। 5 बानै जान ऊं मारण गो हक कोनी देयेड़ो हो। पण पांच मिंना तांई पीड़ा देण गो आदेस हो। आ पीड़ा बिछु गै डंक मारणै बरगी ही। 6 बा दिना में लोग मोत नै खोजैगो, पण बानै लादैगी कोनी। बे मरणो चावैगा पण मोत बानै आवैगो कोनी।

7 ऐ टिडिया घोड़ा गी तरियां ही झिका युद्ध पर जाण खातर तैयार होवै। बांगै सिर पर इंया लागै हा जिंया सोनै गा मुकुट होवै। बांगो चेरो मिनख गी तरियां हो। 8 बांगा बाळ लुगाईया तरियां हा अर दांत सैर गी तरियां हा। 9 बांगा कवच लोह गी तरियां हा। बांगै पांखा गी आवाज लडाई में भाजता भोत सारै रथा गी तरियां ही। 10 बांगी पूंछ बिछुवां गी तरियां ही। बांगा हिसा डंक हा झिका ऊं लोगा नै पांच मिंना तांई पीड़ा हो सकै ही। 11 एक अथाग कुण्ड गो दूत बां पर राजा हो। यहुदी सभा में बिंगो नाम अबदोन अर युनानी भासा में अपुल्योन है।

12 पेली बिपती तो खत्म होगी पण सुणो, इंगो बाद दो विपदा ओर बाकी है।

13 छटै सुरगदूत गै तुरही बजावंता ई मैं परमेसर गी सामली सोनै गी बंदी गै च्यार सींगा मूं एक आवाज सुणी। 14 बा आवाज बी अठै सुरगदूत नै केवै ही कै, बा च्यार सुरगदूता नै झिका फरात म्हानदी गै कनै बांदेड़ा हा बानै आजाद कर दे। 15 जद बा च्यारा दूता नै छोड़ दिया झिका नै बि घड़ी, बि मिन्नै अर साल खातर रोकेड़ा हा। जिऊं बे धरती गै एक तिहाई मिनखा नै मार दय। 16 मैं बांगी घुड़सवारा गी गिणती सुणी झिकी बीस करोड़ ही।

17 मनै दरसण में बे घोड़ा अर बांगा असवार इंया लागा जियां बा सवार कवच पेर राख्या है झिका धधकती आग, निलै अर पीळे रंग गा हा अर बा घोड़ा गो सिर सैरा गी तरियां हो। अर बांगै मूं माखर आग, धुओ अर गंधक निकळै ही। 18 अर बी धुआ, आग अर गंधक ऊं मिनख जाती गो एक तिहाई हिसो खत्म कर दियो। 19 बा घोड़ा गी ताकत बांगै मूं अर पूंछ में ही क्यूंकै बांगा पूछ सांप गी तरियां ही। झिका में बांगा सिर हा आऊं बे नुकसान पोचांवता हा।

20 अर ईं विपदा ऊं बचेड़ा लोग, आपगै हाता गै बुरे कामा में फस्या रेया, बे ऐ हा कै बे सोनै, चांदी, पीतळ, पथर अर लकड़ी गी मूरतिया गी पूजा करणी कोनी छोड़ी अर ना बा आ कामा ऊं पछतावो करयो। ऐ मूरतिया ना तो बोल सकै ई अर ना देख सकै ई अर ना ई सुण सकै ई अर ना ईं चाल सकै ई। 21 अर ना'ई आ लोगा हत्या करण ऊं, बेबीचार करण ऊं, जादू टूणा करण ऊं अर चोरी करण ऊं मन बदळ्यो है।