दरसण 2

इफिसुस गी बिस्वासी मण्डली नै संदेस

1 इफिसुस गी मण्डली गै सुरगदूत नै ओ लिखा कै झिकै आपगै दाहिणै हात में सात तारा ले राखया हा। अर सोनै गै सात दीपदान गै बिचाळै चालै फिरै बो इंया केवै कै।

2 मैं थारी मेनत गै कामा अर धीरजता नै जाणू अर आ बात बी कै थे दुस्ट लोगा नै सेन कोनी करो क्यूंकै थे बा लोगा नै परख गै झूटा जाण्या है झिका खुद नै खास चेला मानै पण बे है कोनी। 3 थारै में धीरज राखण गी ताकत है थे मेरै कामा में भोत मेनत करी अर निरास कोनी होया।

4 पण मनै तेरै खिलाफ आ सिकायत है जिंया तू मेरूं पेला प्रेम करतो बिंया अब कोनी करै। 5 ईंखातर अब चेतो कर कै तू बि प्रेम ऊं कितो दूर उड़ग्यो। तू आपगो मन बदळ अर पेला तरियां काम कर। जे तूं इंया ना करयो तो मनै तेरै कनै बेगो आणो पड़सी अर तेरै दीपदान बठूं हटा दयूंगा। 6 पण आ बात आच्छी है कै, थे निकुलिया गै लोगा गै कामा ऊं नफरत करो हो। झिका ऊं मैं बी नफरत करूं।

7 झिको सुणनो चावै बो सुण ल्य कै पवितर आत्मा बिस्वासी मण्डलियां ऊं के केवै, कै झिको जीतेगो बिनै मैं परमेसर गै बाग में जीवन गै दरखत गो फळ खाण गो हक देस्यूं, झिको सुरग में है।

स्मुरना गी बिस्वासी मण्डली नै संदेस

8 स्मुनरा गी बिस्वासी मण्डली गै दूत नै ओ लिख कै झिको पेलो अर आखरी है, झिको मर ग्यो हो अर अब जीग्यो है, बो इंया केवै कै।

9 मैं थारा काम, दुख अर गरीबी नै जाणू हूं पण थे अमीर हो। अर बे लोग झिका अपणै आपनै यहुदी मानै पण बे है कोनी। बे लोग सैतान गी मण्डली है बांगी निन्दा नै बी मैं जाणूं। 10 झिको दुख थे भोगण आळा हो बिऊं ना डरियो। अर सुणो। थारै मूं केई लोगा नै सैतान जेळ में बंद करवा देयेगो जिऊं थारी परख होवै अर थानै दस दिना तांई क्ळेस सेणो पड़ेगो। आखरी सांस तांई बिस्वास में मजबूत रेईयो, जद मैं थानै जीवन गो मुकुट देऊंगा।

11 झिकै गै कान है बो सुण ल्य कै पवितर आत्मा बिस्वासी मण्डलियां ऊं के केवै। झिको जीतेगो बिनै दूसरी मोत ऊं कोई नुकसान कोनी होवैगो।

पिरगमुन गी बिस्वासी मण्डली नै संदेस

12 अर पिरगमुन गी बिस्वासी मण्डली गै दूत नै ओ लिखा कै ओ संदेस बिंगो है झिकै कनै दो धारी तेज तलवार है।

13 मैं थारै कामा नै जाणूं हूं अर मनै ओ बी ठा है कै थे बठै रेवो जठै सैतान गो राज है। थे मेरै नाम पर बिस्वास राख्यो है। जद मेरो बिस्वास लायक गवाह अन्तरिपास थारै बिचाळै मार दियो, जठै सैतान गो बास है बि टेम बी थे मेरो इनकार कोनी करयो हो।

14 फेर बी मेरै कनै थारै खिलाफ केई सिकाईता है कै थारै बिचाळै केई लोग हिस्या है झिका बिलाम गी सीख पर चालै। क्यूंकै बालाम, बालाक नै ओ सिखायो कै तू इसराएली लोगां नै मूरतिइया गो प्रसाद खाण खातर अर बेबीचार करण खातर उकसा। 15 इंया ई थारै बिचाळै केई निकुलिया गी सीख मानण आळा है झिका ऊं मैं नफरत करूं। 16 ईंखातर आपगो मन बदळो ना, ईं तो मैं बा लोगा सागै आपगै मुख गी तलवार ऊं आ'गे लड़ूंगा।

17 झिको सुणनो चावै बो सुण ल्य कै आत्मा बिस्वासी मण्डली ऊं के केणो चावै है झिको जीतेगो बिनै मैं परमेसर गी नगरी में लकोयेड़ो मना देऊंगा। अर पथर बी दयूंगा झिकै पर एक नुओ नाम खुदेड़ो हो'सी। बो नाम बी मिनख गै अलावा दूसरो कोनी जाण सी कै ई पर के लिखेड़ो है।

थुआतीरा गी बिस्वासी मण्डली नै संदेस

18 थुआतीरा गी बिस्वासी मण्डली गै दूत नै ओ लिख कै परमेसर गो बो बेटो झिको गी आंखा आग गी लपटा तरियां अर पग चमकते पीतळ गी तरियां है बो इंया केवै कै।

19 मैं थारो काम, प्रेम, बिस्वास, सेवा अर धीरज नै जाणूं हूं अर मैं जाणूं कै तू अब पेला ऊं जादा काम करै।

20 पण थारै खिलाफ मनै आ बी सिकायत है कै थे बी इजेबेल लुगाई नै थारै बिचाळै कोनी रेण दी। बा खुद नै परमेसर गी बात बताण आळी बतावै ही अर आपगी सीख ऊं मेरै लोगा नै कुकरम अर मूरती गो प्रसाद खाण खातर उकसावै ही। 21 मैं बिनै मन बदळण गो मोको दियो है पण बा ऐ बुराईयां छोडणी कोनी चावै है। 22 अर सुणो जे बा आपगा सारा बुरा काम कोनी छोडै़ ही, तो मैं बिनै बीमार कर'गे मांची पर रेडूंगा अर झिको कोई बिंगै सागै कुकरम करा गै बानै भोत मोटी पीड़ा दयूंगा। 23 मैं बिंगै सारै टाबरां नै महामारी ऊं मारूंगा जिऊं सारी बिस्वासी मण्डलियां जाण जावैगी कै मना नै अर दिला नै जांचण आळो मैं ईं हूं। अर मैं थारूं हरेक मूं बिंगै कामा गै मुताबिक बदळो देयूंगा।

24 पण मैं थुआतीरा गै बाकी लोगा ऊं ओ केणो चाऊं कै झिका बी लुगाई गी सीख नै कोनी मानी जाणो अर सैतान गै भेद गी बाता नै कोनी जाणै तो मैं थारै पर ओर भार कोनी लादू। 25 पण झिकी मेरी सीख थारै कनै है बि पर चालता रेवो।

26 झिको जीतेगो अर मेरी सीख पर चालेगो बिनै मैं भोत देसा पर हक दयूंगा। 27 अर बो लोह गी छड़ी ऊं बा पर राज करसी अर बो बा लोगा नै माटी गै बरतन गी तरियां चकनाचूर करसी अर जिस्यो हक में आपगै पिता ऊं पायो है। 28 मैं बिनै सुबह गो तारो देस्यूं। 29 झिकै गै कान है बो सुण ल्य कै आत्मा के केवै है अर ओ बी समझ ल्य कै आत्मा बिस्वासी मण्डली ऊं कै केणो चावै।