सरदीस गी बिस्वासी मण्डली नै संदेस
3
1 सरदीस गी बिस्वासी मण्डली गै दूत नै लिखो कै झिकै गै कनै परमेसर गी सात आत्मावां अर सात तारा है बो इंया केवै कै मैं थारै कामा नै जाणू हूं, थे जींवता तो दिखो पण हो मरेड़ा।
2 ईंखातर चेतो करो, अर झिकी अजे बाकी है अर मिटण आळी है बिनै मजबूत करो। क्यूंकै मैं थारै कामा नै परमेसर गी नजर में सई कोनी पाया।
3 ईंखातर याद करो कै थे किसी सीख पाई अर सुणी ही। बिमै बणया रेवो अर मन बदळो। जे इंया ना करयो तो मैं चोर गी तरियां आऊंगा अर थानै ठा बी कोनी लागै गो कै मैं थारै कनै कद आयो।
4 पण सरदीस में थारै कनै थोड़ा लोग हिसा बी है झिका आपगै तन रूपी कपड़ै नै असुद्ध कोनी करयो। अर बे धोळा गाबा पेर गै मेरै सागै सागै चालेगा क्यूंकै बे खरा मिनख है।
5 झिका जीतैगा बानै मैं हिसा ई गाबा पेहराऊंगा अर मैं बिंगो नाम जीवन गी किताब ऊं कदी कोनी मिटाऊंगा पण बिंगै नाम नै पिता परमेसर अर बिंगी नगरी गै सुरगदूत सामै मानल्यूंगा।
6 झिको सुणनो चावै बो सुण ल्य कै आत्मा बिस्वासी मण्डलियां ऊं के चावै है?
फिलदिलफिया गी बिस्वासी मण्डली नै संदेस
7 अर फिलदिलफिया गी बिस्वासी मण्डली गै दूत नै आ बात लिखो कै झिको पवितर अर सच्चो है अर झिकै गै कनै दाऊद गी चाबी है झिकै नै बो खोलै अर बिनै कोई बंद कोनी कर सकै बो इंया केवै कै।
8 मैं थारै कामा नै जाणू हूं। अर देखो मैं थारै खातर एक दरवाजो खोल्यो झिकै नै बे कोई बंद कोनी कर सकै हालाकी थारै में इती ताकत कोनी फेर बी थे मेरै संदेस नै मान्यो है अर मेरो इनकार कोनी करयो।
9 पण सुणो। झिका सैतान गा साथी है अर अपणै आपनै यहुदी केवै, बे झूठ बोलै है। मैं बानै मजबूर करूंगा थारै पगा में झूकण खातर जिऊं बे जाण ज्य कै मैं थारूं प्रेम करयो है।
10 ईंखातर कै थे धीरज ऊं मेरै बचन नै मान्यो है अर मैं बी थारी परख गै टेम में थारी रुखाळी करूंगा। मतलब बि न्याय गै टेम झिको सारी दुनिया पर आण आळो है जिऊं सारा गो लेखो लियो जा सकै।
11 मैं चाणचकै ई आऊंगा। झिको बिस्वास थारै कनै है, बिमै बण्या रेवो। जिऊं थारो मुकुट ना जावंतो रेवै।
12 झिको जीत ज्यगो बिनै मैं परमेसर गै घर में एक खम्बो बणाऊंगा, बठूं बो कदी बारै कोनी जावैगो। अर मैं आपगै परमेसर गो नाम अर सैहर मतलब नुए यरुसलेम गो नाम, झिको परमेसर गी ओर ऊं सुरग ऊं उतरण आळो है अर आपगो नुओ नाम बि पर लिखूंगा।
13 झिको सुणनो चावै बो सुण ल्य कै आत्मा बिस्वासी मण्डलियां ऊं के चावै है।
लौदिकिया गी बिस्वासी मण्डली नै संदेस
14 लौदिकिया गी बिस्वासी मण्डली गै दूत नै आ बात लिखो कै झिको आमीन, झिको भरोसा लायक, साच्चो गवाह अर परमेसर गी बणावट गो मूळ है बो इंया केवै कै।
15 मैं थारै कामा नै जाणू हूं कै ना थारो सभाव ठंडो है अर ना'ई तातो है। पण आच्छो होवंतो कै थारो स्भाव ठंडो या तातो होवंतो।
16 ईंखातर तू नुन्याय सा हो। ईंखातर मैं तनै उगळन आळो हूं।
17 थे केवो मैं अमीर हूं, मेरै कनै सारी चिजां है अर मनै क्यांगी लोड़ कोनी है। पण थे कोनी जाणो कै थे अभागा, तुछ, कंगाल, आंधा नागा हो।
18 ईंखातर मैं थानै सलाह दयूं कै थे मेरूं चोखो सोनो मोल लेल्यो जिऊं थे अमीर बण ज्यो अर धोळा गाबा लेल्यो, जिऊं थारो तन ढकीज ज्य। अर आपगी आंखा खातर सुरमो लेल्यो जिऊं थे साफ साफ देखण लाग ज्यो।
19 झिकै नै मैं प्रेम करूं बिनै मैं सुधारनो चाऊं कै बे जोसीला बणगे मन बदळ ल्य अर सई तरियां चालण लागज्य।
20 अर सुणो। मैं थारै दरवाजै पर खड़यो कूंटो खड़काण लागरयो हूं। जे आवाज सुणगे आपगो बारनो खोलै तो मैं अंदर आ'गे बि सागै रोटी जीमूंगा।