यीसू मसी गै खास चेलै यूहना नै मिलेड़ा दरसण
1
1 आ किताब यीसू मसी गै अलोकिक ग्यान गी बाता गी किताब है झिकी पिता परमेसर बिनै दिखाई कै बे आपगै दास लोगा नै बतावै कै ऐ बाता आण आळै टेम बेगी अर अचानक घटण आळी है। ऐ बाता परमेसर सुरग ऊं आपगो सुरगदूत भेजगे यूहना नै बताई।
2 अर यूहना पिता परमेसर गी झिकी बाता सुणी अर यीसू मसी गै बारे में झिको कीं देख्यो बिंगै बारे में गवाई दी।
3 आसिस बि मिनख पर है झिको आ परमेसर गी बात नै पढै, सुणै अर मानै क्यूंकै टेम भोत निकट है।
सात बिस्वासी मण्डलिया गो निमस्कार
4 यूहना गै ओर ऊं एसिया प्रांत गी सातूं बिस्वासी मण्डली गै नाम। परमेसर गी ओर ऊं झिको है अर झिको हो अर झिको आण आळो है, अर बे सात आत्मावां झिकी परमेसर गै सिंघासन गै सामै है।
5 अर यीसू मसी गी ओर ऊं, झिको बिस्वास लायक अर झिको मरेड़ा माऊं पेली जींवतो होण आळो है अर ईं धरती गै राजावां पर हाकिम है अर आपणूं प्रेम करै। बी यीसू मसी कानी ऊं थारै पर किरपा अर सांती होवै। अर बण आपां नै आपगै खून ऊं छुटकारो दिरायो है।
6 बण आपां नै राजा अर पिता परमेसर गा याजक बणाया है। बिंगी मेमा जुग जुग होवंती रेवै अर इंया ई होवै।
7 “अर सुणो। बो बादळा सागै आण आळो है
अर हरेक आंख अर बे मिनख झिका बिनै मारयो बे सारा बिनै आवंता देखसी।
दुनिया गा सारा लोग बिनै देखगे बिलख बिलख गै रोसी। हा इंया ई होवैगो।”
8 प्रभु परमेसर बो सरवसकतिमान है, अर झिको है, झिको हो अर झिको आण आळो है बो इंया केवै है कै “मैं आल्फा अर ओमेगा हूं, पेलो अर आखरी हूं।”
यूहना नै मसी गो दरसण
9 मैं यूहना, थारो भाई, यीसू मसी गी बजह ऊं दुख, परमेसर गो राज अर धीरज में थारै सागै भागिदार हूं। मैं पतमुस नाम गै टापू में परमेसर गै बचन अर यीसू गी गवाई देण गी बजह ऊं जेळ में हो।
10 मैं हफ्ते गै पेलै दिन आत्मा ऊं भरग्यो अर मैं मेरै लारै तुरही बरगी एक मोटी आवाज सुणी।
11 अर बि आवाज में ओ हेलो आवै हो कै झिको कीं थे देख्यो है बिनै एक किताब में लिखगै आसिया गी सातूं मण्डळिया इफिसुस, स्मुरना, पिरगमुन, थुआतीरा, सरदीस, फिलदिलफिया, अर लौदिकिया नै भेज दियो।
12 अर जद मैं पळट गै बोलण आळै नै देखणो चायो। जिंया ई मैं मुड़यो तो मैं सोनै गा सात दीपदान देख्या।
13 बा दीपदान गै बिचाळै में मिनख गै बेटै बरगै एक मिनख नै देख्यो झिकै पगा तांई मोटो चोळो पेर राख्यो अर छाती पर सुनेरै रंग गो पटको बांद राख्यो।
14 बिंगो सिर अर बाळ दूध गी तरियां धोळा अर ऊन गी तरियां मुलायम हा। बिंगी आंख आग गी लपटा तरियां दिखै ही।
15 बिंगा पग इंया लागा जिंया आग गी भटी में तपायेड़ो पीतळ होवै। बिंगी आवाज समुनदर गी लेहरा गी तरियां ही।
16 बिंगै दाहिणै हात में सात तारां हा अर मुख ऊं दो धारी तलवार निकळै ही बिंगो चेरो दोफारे गै तावड़ै तरियां चमकै हो।
17 जद मैं बिनै देख्यो तो मुरदै गी तरियां बिंगै पगा में पड़ग्यो। जद बा आपगो दाहिणो हात मेरै उपर रखगे केयो, डर ना, मैं ई पेलो अर आखरी हूं।
18 मैं बो हूं झिको मर ग्यो हो। पण अब हमेसा खातर जींवतो हूं। इंया ई होवै। मोत अर अधोलोक गी चाबिया मेरै कनै है।