मसी आपणो सहायक
2
1 मेरा प्यारा बच्चों, ऐ बातां मैं थानै ईंखातर लिखण लागरयो हूं कै थे पाप ना करो। पण जे कोई पाप करै है तो धरमी यीसू मसी परमेसर ऊं आपगै पापां नै माफ करण खातर बिनती करै है।
2 यीसू मसी ई एक बलिदान है झिको आपणै पापां गो पछतावो है अर ना आपणै पापां गो पण सारै संसार गै लोगां गै पापां गो बी।
3 जे आपां परमेसर गी आग्या गो पालण करां तो आपां सच्च में बिनै जाण लियो है।
4 जे कोई केवै है कै, “मैं परमेसर नै जाणू हूं,” अर बिंगी आग्या गो पालण कोनी करै तो बो झूठो है। बिंगै मन में सच्चाई कोनी है।
5 पण झिको परमेसर गी आग्या गो पालण करै है तो परमेसर गै प्रेम ऊं भरेड़ो है झिकै ऊं आपां नै ठा लागै कै आपां परमेसर में हां।
6 झिको ओ केवै है कै मैं परमेसर में बणयो रेऊं हूं, बिनै यीसू गी तरियां चालणो चईयै।
नुई आग्या
7 हे प्यारा भाईयो अर भेनों, मैं थानै कोई नुई आग्या कोनी लिखण लागरयो हूं पण आ एक पुराणी आग्या है, झिकी थानै सुरू में ई मिली हैa, आ पुराणी आग्या बो बचन है झिको थे सुण लियो हो।
8 फेर बी मैं थानै एक ओर दूसरी नुई आग्या लिखण लागरयो हूं। आ सच्चाई मसी गै जीवन में अर थारै जीवना में दिख सकै है क्यूंकै अन्धेरो मिट जावैगो अर सच्ची जोती चमकती ई रेवै है।
9 झिको केवै है, “मैं जोती में हूं” अर फेर बी आपगै बिस्वासी भाई अर भेनां ऊं नफरत करै है, तो बो अब तांई अन्धेरै में रेवै है।
10 झिको आपगै भाई अर भेन नै प्रेम करै है, बो जोती में रेवै है। बिंगै जीवन में हिस्यो कीं बी कोनी है झिकै ऊं बो कोई पाप में पड़ै।
11 पण झिको आपगै भाई अर भेन ऊं नफरत करै है, अन्धेरै में है अर बो अन्धेरै में चालै है। बो कोनी जाणै, बो कठै जाण लागरयो है क्यूंकै अन्धेरै बिनै आंधो बणा दियो है।
12 हे बच्चों, मैं थानै लिखण लागरयो हूं,
कै परमेसर यीसू मसी गै कारण थारा पाप माफ करया है।
13 हे पिताओं, मैं थानै लिखण लागरयो हूं,
क्यूंकै झिको अनादि काल ऊं है बिनै थे जाणै हो।
हे जवानों, मैं थानै ईंखातर लिखण लागरयो हूं,
क्यूंकै थे बि दुस्ट-सैतान ऊं जीत ग्या।
14 हे बच्चों, मैं थानै लिखण लागरयो हूं,
क्यूंकै थे पिता परमेसर नै पिछाण लियो है।
हे पिताओं, मैं थानै लिखण लागरयो हूं,
क्यूंकै थे झिको सरसटी गै अनादि काल ऊं है बिनै जाण लियो है।
हे जवानों, मैं थानै लिखण लागरयो हूं,
क्यूंकै थे सकतीसाली हो,
परमेसर गो बचन थारै मां वास करै है
अर थे बि दुस्ट-सैतान ऊं जीत ग्या।
15 संसार गी अर संसारिक चिजां गो प्रेम ना करो। जे कोई संसार ऊं प्रेम करै है तो बिंगै मन में पिता परमेसर गो प्रेम कोनी है।
16 क्यूंकै ईं संसार गी हर एक चीज: आंखयां गी लाळसा अर ईं संसार गी लालसा, झिकी पर लोग इतो घमण्ड है। बो पिता परमेसर गी ओर ऊं कोनी है पण बो तो संसारिक है।
17 ओ संसार अर बिंगी लालसा अर इच्छावां मिटती जावै है पण बो झिको परमेसर गी इच्छा गो पालण करै है, बो सदा ई बण्यो रवैगो।
यीसू मसी गो बिरोधी
18 हे प्यारा बच्चों, अन्त गो टेम है; अर जिंया कै थे सुण्यो है कै मसी गो बिरोधी आण लागरयो है। ईंखातर अब भोत सारा मसी गो बिरोध करण आळा परगट हो'ग्या है। इंऊं आपां जाणा कै अन्त गो टेम है।
19 बे मसी गा दुसमण आपणै माऊं निकळै पण सच्च में बे आपणा कोनी है क्यूंकै जे बे सच्च में आपणा होंता तो आपणै सागै ईं रेवंता। पण बे आपां नै छोड़ग्या जिऊं ओ ठा लागज्य कै बामूं कोई बी सच्च में आपणो कोनी है।
20 पण थारो तो मसी पवितर आत्मा ऊं कदी अभिसेक करयो है। ईंखातर थे सारा सच्चाई नै जाणो हो।
21 मैं थानै ईंखातर कोनी लिख्यो है कै थे सच्चाई नै कोनी जाणो हो, पण थे तो बिनै जाणो हो अर सच्चाई ऊं कोई झूठ कोनी निकळै।
22 पण झिको ओ केवै है कै यीसू मसी कोनी है, बो झूठो है। हिस्यो आदमी मसी गो दुसमण है। बो तो पिता परमेसर अर बेटै दोनां नै कोनी मानै है।
23 झिको बेटै नै कोनी मानै है, बो पिता नै बी कोनी मानै है। पण झिको बेटै नै मानै है, बो पिता नै बी मानै है।
24 झिको बचन थे आदि काल ऊं सुण्यो है, थे बिमै बणया रेवो तो थे बेटै अर पिता दोनां में बणया रेवोगा।
25 अर ईंखातर यीसू मसी आपां सारा नै अनन्त जीवन देण गो बचन दियो है।
26 मैं ऐ बातां थानै बां लोगां गै बारै में लिखण लागरयो हूं, झिका थानै भरमावै है।
27 पण थे तो बि पवितर आत्मा में बणया रेवो। थानै सिखाण खातर किंगी जरूरत कोनी। परमेसर गी आत्मा सारो कीं सिखावै है अर झिको बा सिखावै झूठ कोनी, सच्च है। पवितर आत्मा गी आग्या गो पालण करता रेईयो अर मसी में बणया रेईयो।