परमेसर गा बच्चा
3
1 देखो, पिता परमेसर आपणै ऊं कितो म्हान प्रेम करयो है कै आपां सारा बिंगा बेटा-बेटी कहला सकयां अर सच्च में आपां सारां हां।a संसार गा लोग आपां नै कोनी पिछाणै क्यूंकै बे परमेसर नै कोनी पिछाणै।
2 हे प्यारा भाईयो अर भेनों, आपां परमेसर गी उळाद हा पण अजे तांई ओ परगट कोनी होयो कै भविस्य में आपां सारा के होवांगा? आपां ओ जाणा कै मसी गै दुबारै आण पर आपां बिनै ठीक बिंया ई देखांगा जियां बी है, आपां बिंगै तरियां होज्यांगा।
3 हर कोई झिको मसी पर हिसी आस राखै है, बो अपणै आपनै बिंया ई पवितर करै है जिंया मसी पवितर है।
4 झिको कोई पाप करै है, बो परमेसर गै नेम नै तोड़ै है क्यूंकै नेम गो तोड़णो ई पाप है।
5 अर थे तो जाणो हो कै मसी लोगां गै पापां नै हरण खातर ई परगट होयो, अर बिमै कोई पाप कोनी।
6 झिको कोई मसी में बणयो रेवै है, पाप कोनी करै पण हर कोई झिको पाप करतो रेवै है बणना तो बिनै देख्यो है अर ना कदैई बिनै जाणयो है।
7 हे प्यारा बच्चों, थे भटक ना जाईयो। झिको धरम गो काम करतो रेवै है, बो धरमी है, बिंया ई जिंया मसी धरमी है।
8 झिको पाप करतो ई रेवै है, बो सैतान गो है क्यूंकै सैतान आदि काल ऊं पाप करतो आयो है। ईंखातर परमेसर गो बेटो परगट होयो कै बो सैतान गै काम नै नास करै।
9 झिको परमेसर गो बेटो बणज्य, पाप कोनी करै, क्यूंकै बिंगो बीज तो बिमै रेवै। बो पाप कोनी करै क्यूंकै बो परमेसर गो बेटो बणग्यो है।
10 ईंखातर आपां बोल सकां कै परमेसर गो बेटो कुण है? अर सैतान गो बेटो कुण है? झिको धरम पर कोनी चालै अर आपगै भाई नै प्रेम कोनी करै, बो परमेसर गो बेटो कोनी है।
एक दूसरै सागै प्रेम राखो
11 ओ उपदेस थे सरू ऊं ई सुण्यो है कै आपां नै आपसरी में प्रेम करणो चईयै।b
12 आपां कैन गी तरियां कोनी हां झिको दुस्ट ऊं हो अर झिकै आपगै भाई हाबिल नै मार दियो हो।c बण आपगै भाई नै क्यूं मारयो? बण ईंखातर मारयो कै कैन गा काम बुरा हा अर बिंगै भाई हाबिल गा काम धरम गा हा।
13 हे भाईयो अर भेनों, जे संसार थारूं बैर राखै है, तो अचंभो ना करियो।
14 जे कोई एक दूसरै ऊं प्रेम ना राखै तो बो नरक गो भागी है पण आपणै बिस्वासी भाई भेनां गै आपसरी प्रेम भाव ऊं बात पूखता हो'ज्य कै आपां नरक ऊं बचग्या अर आपां नै अनन्त जीवन मिलग्यो।
15 झिको आपगै भाई भेन ऊं नफरत करै है, समझो बो हत्यारो है अर थे तो जाणो ईं हो कै कोई हत्यारै नै अनन्त जीवन कोनी मिल सकै।
16 यीसू मसी आपणै खातर आपगो जीवन बलिदान करयो। इंऊं जाणा कै प्रेम के है? आपां बी आपगै भाईयां अर भेनां खातर आपगी जान देणी चईयै।
17 झिका कनै जादा धन है, अर झिको आपगै भाई अर भेन नै कंगाल देखगे बी बि पर दया कोनी करै, बिमै परमेसर गो प्रेम किंया बणयो रे सकै है?
18 हे प्यारा बच्चों, आपणो प्रेम सब्दा अर बातां तांई ई कोनी रेणो चईयै पण बो प्रेम काम गै द्वारा सच्चो होणो चईयै।
परमेसर गै सामणै पूरो भरोसो
19 आपणै सारा गा काम दिखावैगा आपां साच्चाई गा हां जद आपां परमेसर गै सांमणै पूरै भरोसै ऊं खडया होजावांगा।
20 पण आपणो मन जद बी आपां नै बुरे कामां ऊं रोकै है तो परमेसर आपणै मन ऊं मोटो है अर बो सारो कीं जाणै है।
21 प्यारा भाईयो अर भेनों, जे आपां दोसी ना हा तो आपां पूरै बिस्वास गै सागै परमेसर गै सामणै आ सकां।
22 अर झिको कीं आपां बिऊं मांगा, बो मिलै है क्यूंकै आपां बिंगी आग्या पर चालण लागरया हा अर बे काम करां, झिका बिनै आच्छा लागै।
23 बिंगी आग्या आ है कै आपां बिंगै बेटै यीसू मसी गै नाम में बिस्वास राखां अर जिंया कै बण आपां नै आग्या दी है आपां एक दूसरै ऊं प्रेम करां।
24 झिको बिंगी आग्या गो पालण करै है बो बिमै बणयो रेवै है अर बिमै परमेसर गो वास होवै है। ईं तरियां, पवितर आत्मा गै द्वारा झिकी परमेसर आपां नै दी है, आपां इंऊं जाणा कै आपणै मां परमेसर रेवै है।