यीसू मसी गै खास चेलै यूहना गो लिखेड़ो पेलो खत
जीवन गो बचन
1
1 हे भाईयो अर भेनों, म्हे थानै यीसू गै बारै में लिखण लागरया हा, झिको जीवन गो बचन है। बो सरसटी गै सुरू ऊं ईं होa, म्हे इंऊं सुण्यो है, आपगी आंखयां ऊं ध्यान ऊं देख्यो, अर आपगै ई हातां ऊं म्हे छूओ है।
2 बि जीवन गो ग्यान म्हानै परमेसर करायो। म्हे बिनै देख्योb। म्हे बिंगा गवाहां अर अब म्हे थानै बि अनन्त जीवन गो समाचार देवां झिको पिता गै सागै हो अर म्हारै पर परगट होयो।
3 झिको कीं म्हे देख्यो है अर सुण्यो है थानै बी बिंगो उपदेस देवां। पण थे बी म्हारै सागै साझेदारी करो। आपणी आ साझेदारी पिता परमेसर अर बिंगै बेटै यीसू मसी गै सागै है।
4 म्हे आ बातां नै थानै लिखण लागरया कै आपणी सारा गी खुसी में कोई कमी ना रेज्य।
परमेसर जोती है, आपां जोती में चालणो
5 म्हे यीसू मसी ऊं झिको सुब समाचार सुण्यो है, बो ओ है अर इनै ई म्हे थानै सुणावां हां, परमेसर जोती है अर बिमै कीं बी अन्धेरो कोनी है।
6 जे आपां केवां कै आपां बिंगै सागै साझेदार हा अर पाप गै अन्धेरै में चालां, तो आपां झूठ बोलण लागरया अर सच्चाई पर कोनी चालण लागरया।
7 पण जे आपां जोती में चालां, जिंया परमेसर जोती में है, जद आपां नै एक दूसरै गै सागै साझेदार है, अर परमेसर गै बेटै यीसू गो खून आपणै पाप नै माफ करै है।
8 जे आपां केवां कै आपां कोई पाप कोनी करयो तो आपां अपणै आपनै धोखो देवां अर आपणै में सच्चाई कोनी है।
9 पण जे आपणै पापां नै मान लेवां तो आपणै पापां नै माफ करण गै खातर परमेसर बिस्वास गै लाइक है अर धरमी है अर आपां सारा नै पवितर कर'गे हर गुना ऊं बचावै।
10 जे केवां कै आपां कोई पाप कोनी करयो तो आपां बोलां परमेसर झूठो है अर बिंगा बचन आपणै में कोनी है।