पती अर पत्नी
3
1-2 ईं तरियां हे पत्नियों, थे थारै पती गो आदर मान करो। जे किंगोई पती बचन नै ना मानतो होवै तो थारो परमेसर पर पवितर अर भय गै सागै चाल चलन देखगे बिना कीं बोलै बो बा पर बिस्वास करेगो।
3 थारो सिंगार लोगां नै दिखाण खातर ना होवै जिंया थारा बाळ अर थारा गाबा अर थारी सोनै गी टुमा।
4 पण थारो सिंगार हिस्यो होणो चईयै कै थारै मन गै मां दीनता अर धीरज राखण आळो होवै। हिस्यो सिंगार परमेसर गी नजर में भोत आच्छो है।
5 पेला गै टेम में लुगाईयां आपगै पती गो आदर मान कर'गे अर परमेसर गी आराधना करती अर बि पर भरोसो राखती ही।
6 जिंया भेन सारा आपगै पती अबरहाम गो आदर मान करती अर बिनै आपगो स्वामी मानतीa। जे थे बी आच्छो काम कर'गे किऊं बी ना डरोगी तो थे सगळी भेन सारां बरगी बणज्योगी।
7 हे पतियों, थे बी थारी पत्नियां गै सागै समझदार बणगे रेओ। बानै कमजोर समझगे बांगो आदर मान करो अर ओ समझो कै आपां दोनां नै जीवन गो वरदान मिलसी। इंया करोगा तो थारी पराथना कदी कोनी रुके।
भला काम करण आळा पर दुख
8 आखर, आपां सगळां एक सागै होगे दूसरा पर किरपा करण आळा अर दूसरै भाईयां सागै प्रेम रखण आळा होवां अर इंगै सागै दीनता गै सागै रेवां।
9 बदळो लेण गी भावना ना राखां अर गाळ गै बदळै गाळ ना काड़ा। पण इंगै बदळै में आसिस दयां क्यूंकै आपां नै आसिस गा वारिस होण खातर बुलाएड़ा है।
10 पवितर सासतर में इंया लिखेड़ो है कै,
“झिको कोई आच्छो जीवन जीणो चावै
अर आच्छा दिन देखणा चावै
बे आपगी जीभ नै गंदी बात बोलण ऊं
अर आपगै होटा नै झूठ बोलण ऊं रोकगे राखै।b”
11 बो बुरा काम नै छोड़गे आच्छा काम करणा चईयै अर सांती पाण खातर कोसिस करतो रेवै।
12 क्यूंकै प्रभु गी नजर धरमी लोगां पर लागी रेवै अर बिंगा कान बांगी पराथना कानी लाग्या रेवै पण बुरे लोगां ऊं बो ओले रेवै है।c
13 जे थे आच्छा काम करोगा तो थारो बुरो करण आळो कुण है?
14 जे थानै आच्छा काम कर'गे बी दुख मिलै तो थे बिमै धन्य हो। थे कोई बी काम गै खातर झिका लोग थानै दुख देण गी कोसिस करै हिस्यो लोगां ऊं डरण गी अर घबराण गी लोड़ कोनी।
15 मसी नै प्रभु मानगे बिंगो आदर मान करो। थारी आसा गै बारे में थानै कोई पूछै तो बिनै बताण खातर दीनता अर इज्जत गै सागै डरगे रेओ।
16 आ बाता नै इज्जत देगे अर साफ मन ऊं करो अर थारो मन पवितर राखो कै थारा आच्छा काम देखगे थारो अपमान करण आळा लोग लज्जित होवै।
17 जे थारो दुख झेलणो परमेसर गी इच्छा है तो थे आच्छो काम कर'गे दुख झेलता रेवो क्यूंकै बुरे काम ऊं ओ आच्छो है।
18 मसी झिकै बिना दोस गै आपणै खातर एक बार दुख उठायो अर मर ग्यो अर परमेसर सागै आपां नै मिला दिया। बो सरीर ऊं तो मर ग्यो पण आत्मा ऊं जींवतो है।
19 बण ईं आत्मा ऊं जा'गे केदी आत्मावां में बी परचार करयो।d
20 झिका नूह गै जहाज बणावंता टेम परमेसर गी बात कोनी मानी। बा लोगां पर परमेसर सबर राख्यो। पण बा सारा मूं आठ लोग ईं जल प्रळय ऊं बच्या।e
21 बो ई पाणी बतिस्मो बरगो है झिका ऊं थानै अब मुकती मिलै है। बतिस्मो सरीर नै साफ करणो कोनी पण यीसू मसी गै जी उठण गै द्वारा परमेसर कनै साफ मन ऊं आण गो एक रा है।
22 बो ई यीसू मसी सुरग में जा'गे परमेसर गै दाए पासै बैठग्यो अर सुरगदूत अर अधिकारियों अर सारी सकतियां बिंगै अधीन में है।