जींवतो पथर अर पवितर प्रजा
2
1 ईंखातर हर एक तरियां गी बुराई अर बैर बिरोध अर झूठ बोलगे लारो लगाणो अर चुगली करण ऊं बचगे रेओ।
2 एक छोटे टाबर गी तरियां आत्मिक दूध झिको प्रभु गो बचन है बिंगै मां मुकती खातर बडता जाओ।
3 जिऊं थानै पतो लागै कै प्रभु कितो दयालु है।
4 थे यीसू मसी कनै आओ। बो जींवतो पथर है। बिनै लोगां मान्यो कोनी। पण परमेसर बिनै चुणगे भोत आदर मान दियो।
5 अब थे बी एक आत्मिक घर बणाण आळा जींवता पथर हो। अर थे पवितर याजक हो अर यीसू मसी गै द्वारा थे परमेसर नै राजी करण खातर अपणै आपनै बलिदान करो।
6 पवितर सासतर में इंया लिखेड़ो है,
“देखो, मैं सियोनa में कूंट गो पथर रखूं झिको भोत मेंगो अर चुणेड़ो पथर है।
ईं पर झिको कोई बिस्वास करसी बिनै कदी लज्जित कोनी होणो पड़सी।b”
7 थे लोग यीसू गै लारै चालण आळा लोग हो। अर बो पथर थारै खातर खास है। पण झिका इंगै लारै कोनी चालै बा खातर ओ कीं कोनी।
“झिकै पथर नै मिस्तरियां बेकार कर'गे फेंक दियो
बो ई कूंट गो एक आच्छो पथर बण गयो।c”
8 पवितर सासतर में इंया बी लिखेड़ो हो कै,
“अर ठेस लागण गो पथर अर ठोकर खाण गी चटान बणगी।d”
बा लोगां परमेसर गै बचन नै मान्यो कोनी, ईंखातर बा बि पथर ऊं ठोकर खाई अर ठेराया बी हा।
9 थे लोग परमेसर गा चुणेड़ा खास लोग हो। अर थे एक खास याजकां गो समाज हो अर पवितर लोग अर परमेसर गी खास प्रजा हो। ईंखातर झिकै थानै अंधकार ऊं पवितर चानणै में बुलाया है बिंगै द्वारा चमत्कार गी बातां दूसरा नै बताओ।
10 पेला थे कीं कोनी हा पण अब परमेसर गी निज प्रजा हो। पेला परमेसर गी दया थारै पर कोनी होई पण अब थारै पर दया होगी।
11 हे मेरा भाईयो अर भेनों, थे लोग ईं संसार में अपणै आपनै परदेसी जाणगे ईं संसार गै लालच में ना पड़ो। ईंखातर मैं थानै बिनती करूं कै संसार गी लालसा झिकी थारी आत्मा ऊं लडाई करै बिऊं दूर रेओ।
12 दूसरै लोगां में थारो चाल चलन आच्छो होवै कै बे झिकी बातां में थानै गलत बतावै अर जद यीसू दुसर आण गै टेम बे थारै भले कामां नै देखगे परमेसर गी बडाई करै।
परमेसर गा चेला
13 प्रभु इंया चावै है कै थे सारै अधिकारी लोगां गै अधीन में रेओ। खास कर'गे राजा लोगां गी बात मानगे रेओ।
14 थे लोग राजपाल गै अधीन में रेओ। क्यूंकै बा लोगां बुराई करण आळा नै सजा देण खातर अर आच्छा काम करण आळा नै बडाई करण खातर घाल्यो है।
15 परमेसर गी आ'ईं इच्छा है कै थे लोग भला काम कर'गे मूरख लोग अर अग्यानी लोगां नै चुप करा देओ।
16 थे लोग अब आजाद हो। अर परमेसर गा दास बी हो। ईंखातर थारी आजादी नै बुरा काम करण खातर ना लगाओ।
17 सारा गो आदर मान करो, बिस्वासी भाई भेना नै प्रेम राखो अर परमेसर ऊं डर गै रेओ अर राजा गो समान करो।
18 हे नौकरों, थे थारै मालिका ऊं डर गै अर बांगै अधीन में रेओ। चायै भला है चायै बुरा है दोनां गी बात मानणी है।
19 जे कोई परमेसर पर बिस्वास कर'गे अन्याय ऊं दुख अर क्ळेस सेवे तो बो आच्छो है।
20 जे थे बुरो काम कर'गे दुख उठावो तो आ कोई मोटी बात कोनी है। पण जे भलो काम कर'गे दुख सेवे तो परमेसर थानै जरूर आसिस देवैगो।
21 यीसू मसी थारै खातर कितो दुख उठायो अर थानै ईंखातर बुलाया कै थे बी बिंगै बताएड़ै रा पर चालो।
22 पवितर सासतर में इंया लिखेड़ो है कै,
“बण कदी पाप कोनी करयो अर ना कदी झूठ बोल्यो।e”
23 लोगां बिंगो अपमान करयो बण फेर बी बानै कीं कोनी केयो। लोगां बिनै दुख दियो, बदळै में बण कीं कोनी करयो अर अपणै आपनै साच्चै परमेसर गै हातां में दे दियो।
24 आपणै पापा नै बण आपगै उपर ले लिया अर बण अपणै आपनै करूस पर चढागे आपां नै पापा ऊं बचा लिया अर आपां नै आच्छी तरियां रेण खातर मदद करी। बिंगै सारा दुख झेलण ऊं आपां ठीक होया।
25 पण पेला थे लोग भटकेड़ी भेड़ां गी तरियां भटका हा। पण अब थे थारी रुखाळी करण आळै गुआळियै कनै आग्या।