यीसू मसी गै खास चेलै पतरस गो लिखेड़ो पेलो खत
स्वागत
1
1 मैं पतरस, यीसू मसी गो खास चेलो हूं, परमेसर गा चुणेड़ा लोग झिका पुन्तुस प्रेदेस, गलातिया प्रेदेस, कप्पदुकिया प्रदेस, एसिया प्रदेस अर बितुनिया प्रेदेस में फैलगे बठै रेण आळा नै,
2 अर परमेसर गी इच्छा गै अनुसार चुणेड़ा अर बांगी आत्मा गै द्वारा पवितर होयाड़ा लोग अर यीसू मसी गै खून गै द्वारा पवितर करेड़ा अर बांगी आग्या मानण आळा लोगों, थे सारा किरपा अर सांती ऊं भरगे रेओ। आमीन।
बिस्वासी लोगां खातर एक जींवती आस
3 आपणै प्रभु यीसू मसी गै पिता परमेसर गो धन्यवाद करां। मरण गै बाद जी उठयो प्रभु यीसू मसी गै द्वारा बण आपगी दया ऊं आपां नै एक नुई आसा गो जीवन दियो।
4 क्यूंकै परमेसर थारै खातर सुरग में कदी ना खत्म होण आळो जीवन सुरक्सित राखेड़ो है अर झिको बठै कदी नास कोनी होवै।
5 थानै परमेसर पर बिस्वास है झिको थानै आपगी ताकत ऊं संभालैगो अर परमेसर आखर में सारा नै सजा देण गै टेम थानै मुकती देसी।
6 अब जे थे कीं टेम तांई भोत दुख में हो तो थानै खुस होणो चईयै क्यूंकै बो दिन आण आळो है।
7 थारै परखेड़ै बिस्वास आग में तपायेड़ै नासवान सोनै ऊं बी भोत मेंगो है। जद यीसू मसी दुसर आण गै टेम परमेसर ऊं थानै बडाई, मेमा अर आदर मान मिलसी।
8 थे अजे तांई यीसू मसी नै देखयो कोनी फेर बी बिनै प्रेम करयो अर अब थे बिनै देखयो कोनी फेर बी बि पर बिस्वास करयो। इंया कर'गे थारी खुसी गो ब्यान कोनी कर सकूं।
9 थे बि पर बिस्वास करयो ईंखातर थानै मुकती मिलगी।
10 थानै मिलण आळी ईं मुकती गै बारे में परमेसर गी बात बताण आळा भोत खोजबीन अर जांच पड़ताल करी। झिका बि किरपा गै बारे में थानै बतायो झिको थारै पर होण आळी ही।
11 मसी गी आत्मा झिकी बामै काम करती बण आत्मा बानै बतायो कै “मसी कुण है” अर किंया बो दुख सेवेगो अर बाद में किंया बिनै आदर मान मिलैगो इंगै बारे में बतायो। ईंखातर बे आ बाता गी खोजबीन करता रेवंता।
12 ऐ बातां आप खातर कोनी पण थारै खातर बोली। झिकी बातां पेला परमेसर गी बात बताण आळा गी केयेड़ी है बे बातां अब बी थे सुणो हो ऐ बातां सुरग ऊं पवितर आत्मा गै द्वारा बताएड़ी है। सुरगदूत बी आ बातां नै सुणण गी इच्छा करै।
पवितर जीवन जीण खातर बुलावो
13 थे आपगी बुद्धी ऊं अर सोच समझगे चेते में रेओ। अर थानै झिकी किरपा मिलण आळी है बिंगी पूरी आसा राखो झिकी यीसू मसी आण गै टेम थानै मिलैगी।
14 आग्या मानण आळै बालकां गी तरियां थानै परमेसर गी आग्या मानणी चईयै। थे थारै मन गी पुराणी लालसावां में ना उळजेया रेवो।
15 पण जिंया थानै बुलाण आळो परमेसर पवितर है बिंया थे बी सारै चाल चलन में पवितर बणो।
16 क्यूंकै पवितर सासतर में परमेसर गी बाणी है कै, “थे पवितर बणो, क्यूंकै मैं पवितर हूं।”a
17 थे लोग पराथना करण गै टेम “हे पिता” केगे बुलाण आळो परमेसर बिना भेदभाव गै हर एक गो न्याय बिंगै कामां गै अनुसार करै। ईंखातर थे परदेसी बणगे थारो बचेड़ो जीवन बिऊं डरगे बिताओ।
18 थारै बडेरा ऊं आएड़ै थारै बिना मतलब गै चाल चलन ऊं थारो छुटकारो किंया होयो, ईं बात गो थानै पतो है। थारो छुटकारो नास होण आळै सोनै चांदी ऊं कोनी होयो।
19 पण थारो छुटकारो मसी गै पवितर खून ऊं होयो झिको बिना दोस अर बिना कपट गै मेमणिया बरगो हो।b
20 संसार बणण ऊं पेला यीसू मसी चुणेड़ो हो ईंखातर यीसू मसी गै द्वारा परमेसर पर भरोसो राखण आळो थारै खातर ईं जुग में बिनै परगट करयो है।
21 थारो बिस्वास अर आस परमेसर पर राखण खातर परमेसर यीसू मसी नै मरेड़ा ऊं जींवतो कर'गे बिनै आदर मान बी दियो।
22 थे सच्चाई नै मानण खातर आपगै मना नै पवितर करया। अब थे दूसरै लोगां नै पूरै मन ऊं प्रेम करो।
23 थानै नुओ जीवन इंया मिल्यो है कै एक बेगो मुकण आळो जीवन खातर कोनी पण परमेसर गै अनन्त अर जींवते बचन गै द्वारा मिल्यो है।
24-25 पवितर सासतर में इंया लिखेड़ो है कै,
“हरेक प्राणी एक घास बरगो है,
बे घास गै फूल गी तरियां सुणा तो है।
क्यूंकै घास सूख जावै अर फूल जड जावै,
पण परमेसर गो बचन कदी बी बदळै कोनी अर बो सदा एक जिस्यो ई रेवै।c”
बो ई बचन थानै सुणायो है।