परमेसर आपणो पिता है
12
1 ईंखातर आपणै कनै परमेसर पर बिस्वास करण आळै लोगा गी भोत सारी गवाइया है, तो आओ आपां बी बुराई में ले जाण आळी अर पाप में उळझाण आळी, रुकावट नै दूर कर'गे बिस्वास गी दोड़ में धीरज ऊं दोड़ा।
2 अर बिस्वास गै करता अर सिद्ध करण आळै यीसू पर हमेसा ध्यान लगायो राख। क्यूंकै झिको आनंद बिंगै आ'गे हो, बिनै बण बिना संकोच करै करूस गो दुख उठा लियो हो। अर परमेसर गी दाहिणी ओर न्याय गै सिंहासन पर जा बैठयो।
3 ईंखातर हमेसा बिनै याद करता रेवो। झिकै पापी लोगा गै हाता ऊं घोर दुख सेन करयो हो। जिऊं थे क्ळेस में निरास होगे आपगो होसलो ना रेड़ सको।
4 अजे तांई थारी पाप ऊं हिसी लड़ाई कोनी होयड़ी झिकी में थारो खून बहाइज्यो होवै।
5 कै थे पवितर सासतर गी बात नै भूल ग्या? झिकी में केयेड़ो है कै,
हे मेरा बेटा तूं प्रभु गी ताडणा नै हळकी ना जाण
अर बिंगी डांट नै कदी बुरो ना मान।
6 क्यूंकै प्रभु झिकै ऊं प्रेम करै, बिनै सुधारण खातर ताड़ण बी दय है।
अर झिकै नै बेटो समझै, बिनै सजा बी दय है।
7 थे झिको दुख भोगण लागरया हो, बिनै थे बिंगी ताड़ण ई समझो। क्यूंकै परमेसर थानै बेटै गै जिस्यो बरताव करै है। जिस्यो कोई बेटो कोनी झिकै गी बाप ताड़ण ना करै।
8 जे थारी दूसरै बेटै गी तरियां ताड़णा ना होई है तो थे बिंगा सच्चा बेटा कोनी हो।
9 जद आपां आपणै दुनिया गै पिता गी ताड़णा सेन कर'गे बिंगो आदर करां तो के आपां पिता परमेसर गी ताड़ण नै सेन कोनी कर सका। झिको आपां नै अमर जीवन दय है।
10 दुनिया गो पिता तो सिरफ संसार गै जीवन नै सुधारण खातर ताड़ण दय, पण पिता परमेसर तो आपगी पवितरता में आपां नै भागी होण खातर ताड़ै है।
11 पण आज गै दिना में हरेक तरियां गी ताड़णा आनंद गी कोनी, पण दुख गी बात लागै है। पण झिको आदमी, इनै सेन करतो करतो पक्को होज्यै। बिनै परमेसर बाद में भगती सागै जीवन जीण गो फळ दय है।
12 ईंखातर आपगै कमजोर हात पगा नै तकड़ा कर ल्यो।
13 अर परमेसर गै बतायेड़ै मारग पर सीधा चालता रेवो। जिऊं बे लोग झिका बिस्वास में कमजोर है भटक ना ज्य। पण बिस्वास में मजबूत होज्यै।
उपदेस अर चेतावनी
14 सारा सागै मेल मिलाप राखो अर बि पवितरता नै खोजता रेवो, झिकी गै बिना कोई बी परमेसर गो दरसण कोनी कर सकै।
15 अर थे ध्यान राखो कै थारै मूं कोई आदमी, परमेसर गी किरपा ऊं रे ना ज्यै। अर ओ बी ध्यान राखो कै थारै बिचाळै हिसी कोई झगड़ै गी जड़ ना निकळ ज्यै जिऊं थानै कस्ट होवै अर इऊं भोतसा लोग कठैई बिस्वास ऊं भटक ज्य।
16 ईंखातर चोकस रेवो कै, थारै मूं कोई बेबीचारी ना बणज्य अर ना ई एसाव गी तरियां पापी बणज्य झिकै एकर गै भोजन खातर आपगै मोबी होण गै हक नै खो दियो है।
17 अर बाद में बिनै पिता गो आसिरवाद कोनी मिल्यो हो। बो भोत रो रो गै गिड़गिड़ायो हो पण फेर झिको कीं बण करयो बिनै बदळण गो कोई रा कोनी रेयो है।
18 थे बी सीनै पहाड़ कनै कोनी आया, जठै काळी घटा, अंधेरो, तूफान अर भभकती आग ही। हिसी जिग्या कनै थे अजे आया कोनी हो।
19 अर ना'ई अजे थे तुरही गी आवाज अर डरावणो आदेस सुण्यो। झिकी नै सुणगे इसराएली लोग परमेसर नै दुहाई देवंता हा कै म्हानै अब हिसी ओर बाता ना के।
20 क्यूंकै बे ईं आदेस ऊं घबरा ग्या हा कै जे कोई प्रभु बी पहाड़ गै सारै लाग जावंतो तो बो दगड़ा ऊं मारयो जावंतो।
21 बो दरसण इतो डरावणो हो कै खुद मूसा केवै कै, जद मैं बिनै याद करूं तो डरगे कांपण लागज्यूं।
22 पण थे तो सियोन पहाड़ अर परमेसर गी जींवती नगरी अर सुरग गै यरुसलेम कनै आग्या हो। अर लाखों सुरगदूत गै सागै।
23 जठै परमेसर गी पेली सन्तान झिका गा नाम सुरग में लिखेड़ा है बांगी सभा कनै पोंच ग्या हो झिकी परमेसर गै भगत लोगा गी आत्मावां है अर अब सिद्ध करीजी है।
24 अर नुए वायेदै गै बिचाळै यीसू गै खून कनै आया हो। झिको हाबिल गै खून ऊं भोत जादा कल्याणकारी है।
25 ईंखातर चोकस रेवो। थे बिंगी आग्या नै ना टाळो। क्यूंकै जद बे लोग बी कोनी बच्या झिका परमेसर गी चेतावनी मूसा गै मू ऊं सुणगे टाळी ही, तो आपां सुरग गी सीदी चेतावनी नै टाळ गै किंया बच सका?
26 बि टेम तो बिंगै सब्द ऊं ई सारी धरती हालगी। पण अब तो बिंगो ओ वायदो करेड़ो है कै मैं एकर ओर धरती अर आकास नै हलाऊंगा।
27 ईं बात ऊं ओ परगट होज्यै कै झिकी चीजा बणायेड़ी है बे सारी हलाण ऊं खत्म हो'ज्यगी अर झिकी चिजां हलाईजै गी कोनी सिरफ बे ई अटल रेवैगी।