बिस्वास गी मिसाल
11
1 अब बिस्वास, आसा अर अणदेखी चीजा गो पक्को सबूत है।
2 क्यूंकै बिस्वास गै कारण ई पुराणै टेम में लोगा नै परमेसर गी किरपा मिली ही।
3 बिस्वास गै कारण ईं आपां जाणा कै परमेसर ईं पूरी धरती नै बणाई ही। ईंखातर झिको कीं दिखण लागरयो है बो अणदेखी चिजां ऊं बणेड़ो है।
4 बिस्वास गै कारण ई हाबिल आपगै भाई कैन ऊं ज्यादा उतम बली चढाई ही। अर परमेसर बिंगै चढावै नै मानगे बिनै आपगो भगत समझयो। बिंगो ओ ई बिस्वास आज आपणूं गवाई गै रूप में बात करै है।
5 अर आ बात बी, आपां बिस्वास ऊं माना कै हानोक नै परमेसर जींवते नै ई उठा लियो, जिऊं बो मोत नै ना देख सकै अर बिंगै बारे में किनैई कीं पतो कोनी कै बो कठै उड़ग्यो। इंगै बारे में पवितर सासतर में लिखेड़ो है कै, बिऊं परमेसर भोत खुस है।
6 इंया परमेसर बिना बिस्वास गै राजी कोनी होवै अर झिको बिनै खोजणो चावै बिनै पेला ओ मानणो जरूरी है कै परमेसर ई सारो कीं है। जद बो बिनै इंगो फळ दयगो।
7 बिस्वास गै कारण ई नूह, बि टेम परमेसर गी अणदेखी बात पर बिस्वास करयो हो। झिकी बात बण बिनै बताई ही। अर आपगै परिवार नै बचाण खातर एक मोटो जहाज बणायो हो। इंगै कारण ई परमेसर दूसरै लोगा नै दोसी मान्या हा। अर बो आपगै बिस्वास गै कारण भगती गो वारिस बण्यो हो।
8 बिस्वास गै कारण ई अबरहाम परमेसर गी आग्या मानी अर आपगो सारो कीं छोडगे परमेसर गी बतायी जिग्या कानी चाल पड़यो, झिकी नै बो जाणै बी कोनी हो। क्यूंकै परमेसर बिनै बठै गो वारिस बणाण आळो हो।
9 बिस्वास गै कारण ई बो वायदे गी जिग्या में परदेसी बणगे रेण लागग्यो। बो याकूब अर इसहाक गी तरियां तंबु में रेवंतो हो। झिका बिंगै सागै बी वायदे गा वारिस हा।
10 बठै बो तकड़ी नीम आळै नगर गी उडीक में हो झिकै नै बणाण आळो अर रचण आळो खुद परमेसर है।
11 बिस्वास गै कारण ई सारां, बुढापै में गरभवती होयी। क्यूंकै बण परमेसर गै बचन नै साच्चो मान्यो हो।
12 ईं कारण ई अबरहाम झिको मरण आळो हो, बिऊं परमेसर आकास गै तारा अर टीबै गी बेकळू रेत तरियां अणगिणत पीढी पैदा करी ही।
13 अर इंया अबरहाम, इसहाक अर याकूब बिस्वास करता मरग्या। पण ऐ लोग वायदे गी चिजां नै कोनी देख सक्या पण दूर ऊं ई बानै देखगे खुस होगे बतायो कै, आपां ईं दुनिया में एक परदेसी गी तरियां हा।
14 झिका लोग हिसी बात करै, बाऊं आ बात परगट है कै बे लोग एक हिस्यै देस गी खोज में हा झिको अमर है।
15 बे लोग बि देस गी बात कोनी करां, झिकै मूं बे आया हा। क्यूंकै बे बठै पाछा बी जा सका हा।
16 पण बे तो उतम देस सुरग गी खोज में हा। ईंखातर खुद परमेसर बा लोगा गो परमेसर कुहाण में बाऊं कोनी सरमावे है। क्यूंकै बण ई बो देस, बा लोगा खातर बणायो है।
17 अर परमेसर अबरहाम गो बिस्वास परखण खातर ई बिंगी परख करी ही। अर जद बो बिस्वास कर'गे आपगै इकलोतै बेटै गी बली देण नै तैयार हो'ग्यो हो।
18 अर झिकै अबरहाम ऊं परमेसर गो वायदे बी करेड़ो हो कै, “मैं इसहाक ऊं तेरी पीढी भदाऊंगा।”a
19 क्यूंकै बो जाणै हो कै परमेसर मरेड़ा नै बी जींवतो कर सकै। ईंखातर बिनै आपगो बेटो जींवतो मिलग्यो।
20 बिस्वास गै कारण ई, इसहाक याकूब अर येसाव नै आ'गे होण आळी बाता खातर आसिरवाद दियो हो।
21 बिस्वास गै कारण ई, याकूब मरते टेम, युसुफ गै हरेक बेटै नै आसिरवाद दियो हो। अर आपगै गेडियै गै सिरै पर सिर रखगे परमेसर नै निमस्कार करयो हो।
22 अर ईं बिस्वास गै सागै ई युसुफ बी मरते टेम इसराएली लोगा नै मिस्र ऊं निकळ जाण गी बात केई ही। अर बण बानै ओ बी केयो कै, मेरै मरण गै बाद मेरी आस्थिया नै थे अठुं ले जाईयो।
23 बिस्वास गै कारण ई मूसा गै माता पिता बिनै जन्म गै तीन मिनां तांई राजा ऊं लको गै राखयो हो। क्यूंकै बो आम टाबरा बरगो कोनी हो। अर ना'ई बे राजा गी आग्या ऊं डरया हा।
24 जद मूसा जुआन हो'ग्यो हो तो बण अपणै आपनै फिरोन गी बेटी गो बेटो कुहाण ऊं मना कर दियो हो।
25 ईंखातर कै बण दुनिया गै लोगा सागै सुख भोगण ऊं आच्छो परमेसर गै भले लोगा सागै दुख भोगणो आच्छो समझायो।
26 अर बण मिस्र गी धन सम्पती ऊं ज्यादा मसी गै कारण दुख झेलणो जादा किमती समझयो। क्यूंकै बिंगी नजर बि अमर फळ पर टिकेड़ी ही।
27 बिस्वास गै कारण ई, बण राजा गै गुसे गी परवा करै बिना मिस्र देस नै छोड़ दियो हो। अर इंया लागै हो जिंया बो बी गुप्त परमेसर नै देखण लागरयो हो अर इंया बो आ'गे ई बड़तो रेयो।
28 बिस्वास गै कारण ई मूसा इसराएली लोगा नै फसह गै त्यूंहार अर खून छिड़कण गी आग्या दी। जिऊं नास करण आळो दूत बांगै मोबी बेटा गै हात ना लगा सकै।
29 बिस्वास गै कारण ई बे इसराएली लोग लाल समुन्दर माखर इंया टप ग्या, जियां सुखी जिग्या माखर टपै करै। पण जद मिस्र गी सेना टपण लागी तो सारी समुनद्र में डूबगी।
30 बिस्वास गै कारण ई यरीहो नगर गी चार दिवारी पड़गी। जद बठाकर इसराएली लोग सात दिन तांई चकर काट चुक्या हा।
31 बिस्वास गै कारण ई राहाब बेस्या परमेसर गी आग्या ना मानण आळा सागै नास कोनी होई ही। क्यूंकै बण बठै गो भेद जानण आळै लोगा गो आदर सागै साथ दियो हो।
32 अब ओर थानै के बताऊं? क्यूंकै टेम कोनी कै थानै मैं गिदोन, बाराक, सिसोन, यिफतह, दाऊद अर समूएल अर दूसरै ओर परमेसर गी बात बोलण आळै गै बारे में बता सकूं।
33 आ बिस्वास गै कारण ई दूसरै राज्यावा नै जीत्या अर भगती गा काम करया। अर परमेसर गै करेड़ै वायदे गी चीजा नै पाई अर सैरा गा मूं बद कर दिया हा।
34 अर भभकती आग नै ठंडी कर दी, तलवार गी धार ऊं बच निकळया अर कमजोर होवंता बी ताकतवर बण्या अर लडाई में बीर बणगे बिदेसिया गी सेना नै मार भजाई।
35 केई लुगाईया आपगै मरेड़ै लोगा नै पाछा जींवता पा लिया, पण भोतसा मार खावता खावता मरग्या हा। क्यूंकै बे उतम जीवन में दुसर जी उठण गा भागी कोनी होणा चावै हा।
36 केई हिस्या हा झिका गी परख अपमान अर कोड़ा मारण ऊं होयी। अर केईया गी जंजीरा में बांदगे जेळ में बंद करण में होई ही।
37-38 केई लोग दगड़ा ऊं मारिज्या, केईया नै आरे ऊं बाड़ दिया अर केई तलवार ऊं मारिज्या अर केई कंगाली अर क्ळेस में दुख भोगता भेड़ बकरिया गी खाल ओड़े, जंगळ, पहाड़, गुफावां अर धरती गी दरारा में लुकता भटकता रेया। क्यूंकै संसार गा लोग आंगै खिलाफ हा।