सिद्ध बलिदान
10
1 क्यूंकै ईं नेम विधान में आण आळी आच्छी चिजां गो नमुनो है। ऐ असली कोनी है। ईंखातर हरेक साल एक ई तरियां गै बलिदान चढाण ऊं भगती करण आळा लोग कदी सुद्ध कोनी है।
2 जे ओ नेम विधान लोगा नै सुद्ध कर देवंतो तो बांगो ओ चढावो बंद हो जावंतो। ईंखातर कै बे लोग एकर में ई पवितर हो जावंता अर फेर बांगो मन कदी अपवितर कोनी होवंतो।
3 पण बे लोग हरेक साल इंगै द्वारा पाप नै याद करता हा।
4 क्यूंकै इंया कदी कोनी हो सकै कै बकरा अर बछड़ा गो खून बांगै पापा नै दूर कर दय।
5 ईंखातर जद यीसू ईं दुनिया में आयो, बि टेम बण केयो कै तू ना तो बलिदान अर ना'ई कोई भेंट मांगी, पण ईंखातर आ मेरी देह तैयार करी है।
6 तू ना तो होम बलिया ऊं अर ना'ई पाप बलिया ऊं खुस होयो।
7 जद मैं नै केयो, “मैं तो तेरी इच्छा पूरी करण आयो हूं,” झिकी पवितर सासतर में लिखेड़ी है।
8 बण पेला बी केयो कै, तू तो बलिदान ऊं अर ना ई भेंट ऊं अर ना'ई होम बली ऊं अर ना'ई पाप बली ऊं राजी होयो। पण ऐ तो नेम विधान गी रीत गै कारण चढाईजै ही।
9 अर बण केयो, “देख मैं तेरी इच्छा पूरी करण आयो हूं।” इयां बो पुराणी रीत नै हटागै नुई रीत नै सरू करै है।
10 ईंखातर बि इच्छा गै द्वारा ऊं ई, आपां सारा बिंगै एकर ई बलिदान होण ऊं पवितर होयड़ा हा।
11 पण हरेक याजक तो पवितर जिग्या में खड़यो होगे एक ई तरियां गी बली चढावंतो हो, झिकी पाप नै कदी दूर कोनी कर सकै ही।
12 पण मसी खुद नै एकर ई बलिदान कर'गे परमेसर गै दाहिणै जा बैठयो।
13 जद ऊं बो बि टेम नै अडीकण लागरयो है जद परमेसर बिंगै दुसमणां नै बिंगै अधीन कर दय।
14 क्यूंकै यीसू आपगै एक ई बलिदान गै द्वारा ऊं बा पवितर लोगा नै सदा खातर सिद्ध बणा दिया है।
15 ईं बात गी पवितर आत्मा गवाह है क्यूंकै आ बात बण पेला बी केयी ही कै,
16 झिको वायदो मैं बा दिना गै बाद बाऊं करूंगा। बो ओ है कै मैं आपगै नेम विधान गी बाता बांगै हिड़दय पर लिखूंगा अर बांगै मन में बसाऊंगा।
17 अर फेर कदी में बांगै पापा नै अर बांगै माड़े करमा नै याद कोनी करूंगा।
18 जद इंया होज्य'गो तो फेर बलिदान चढाण गी रीत सदा खातर खत्म हो'ज्यगी।
परमेसर गै कनै जावो
19 तो हे मेरा प्यारा भाईयो अर भेनो, अब आपां नै यीसू गै बलिदान गै द्वारा बि नुए रा ऊं पवितर जिग्या में दाखिल होण'गी हिम्मत मिलगी है।
20 झिकै गो बारनो, बण आपगी देह रूपी पड़दे नै हटागै खोल्यो है।
21 बो आपणो हिस्यो महा याजक है झिको परमेसर गै घराणै गो अधिकारी है।
22 तो आओ, आपां सच्चै मन अर पूरै बिस्वास गै सागै आपणै मन गै मेल नै दूर कर'गे, बिना कपट गै सुद्ध पाणी ऊं नहागे, बि परमेसर गै कनै चाला।
23 अर झिकी आसा नै आपां मानी है बि पर डटया रेवां क्यूंकै झिकै परमेसर आपणूं वायदा करयो, बो बिस्वास लायक है।
24 तो आओ आपां एक दूसरै गै सागै प्रेम अर भले कामां नै करण खातर होसलो देवंता रेवा।
25 अर एक दूसरै गो सागै ना छोडा, जियां भोतसा लोग छोड ग्या है। पण एक दूसरै गै सुख दुख नै समझाता रेवो। अर जिंया जिंया बो न्याय गो दिन नेडे दिखै बिंया ई ऐ काम ओर जादा करता रेवो।
26 क्यूंकै जे आपां सच्चाई नै जानण गै बाद बी, जाणबूज गै पाप करांगा, तो फेर आपणै पापा खातर दूसरो कोई बलिदान कोनी बचे।
27 पण फेर बचेगी भयानक सजा अर एक भीसण आग झिकी परमेसर गै खिलाफ चालण आळा नै खत्म कर दयेगी।
28 जद नेम विधान नै ना मानण आळै नै दो या तीन जणा गी गवाई ऊं बिना दया करै मार दियो जावंतो हो।
29 तो सोचो, बो किती मोटी सजा गो भागी हो'सी? झिको परमेसर गै बेटै गो तिरस्कार कर'गे बिंगै वायदे गै खून नै तुछ जाणै है अर किरपा गी आत्मा गो अपमान करै है।
30 क्यूंकै आपां परमेसर नै जाणा हा, झिकै गो केयेड़ो है कै, बदळो लेणो मेरो काम है अर मैं ई बिनै सजा दयूंगा। अर फेर प्रभु आपगै लोगा गो न्याय करसी।
31 परमेसर गो गुनेगार बणनो खतरनाक बात है।
32 पण थे, बा पेला गै दिना नै याद करो, जद थे सच्चाई नै जाणी ही अर दुखा में बी पक्का रेया हा।
33 थारै मूं केई हिस्या है झिका सारा गै सामणो अपमान अर जुल्म सेयो अर केई लोग आंगै दुखा में मदद बी करता रेया है।
34 क्यूंकै थे जेळ में बंद लोगा गै दुख में भागी होया अर आपगी जायदाद नै आनंद गै सागै लुटीजती देखता रेया। क्यूंकै थे जाणै हा कै थारै कनै इऊं उतम मोटी जायदाद है झिकी हमेसा खातर थारी है।
35 ईंखातर मन ना रेड़ो क्यूंकै थारै खातर आ'गे भोत मोटो फळ है।
36 अर थानै सबर राखणो चईयै, जिऊं सबर राखणो चईयै, जिऊं थे परमेसर गी इच्छा नै पूरी कर'गे,
38 बिंगो केयेड़ो है कै मनै मानण आळा लोग बिस्वास में जींवता रेवैगा
अर जे बो लारै हट ग्यो तो मेरो मन बिऊं खुस कोनी रेवेगो।
39 पण आपां बे कोनी झिका बिस्वास में लारै हटगे नास होज्यां। पण आपां तो बांमूं हा झिका बिस्वास गै कारण अमर जीवन पावां हा।