इब्रानी 9

धरती गै तंबु में आराधना

1 पुराणै जमाने में आदमी गी बणायेड़ी पवितर जिग्या होवंती ही। अर लोग पुराणी रीति रिवाज ऊं आराधना बी करता हा। 2 मतलब एक तंबु बणेड़ो होवंतो झिकै गै बिचाळै पड़दो लगागे दो भाग करेड़ा हा। पेलै भाग में दीवटी, मेज अर भेंट चढायेड़ी रोटी रखेड़ी होवंती ही। इनै पवितर जिग्या केवंता हा। 3-4 अर दूसरै हिसे नै परम पवितर जिग्या केवंता। इमै सोनै गी धूपदाणी, सोनै गो बणेड़ो संदूक अर ईं संदूक में मन्ना ऊं भरेड़ा सोनै गा बरतन हारून गी घड़ी झिकी पर फूल उगेड़ा हा अर परमेसर गी आग्या लिखेड़ी पथर गी पटिया रखेड़ी ही। 5 अर बि संदूक पर प्रकास मान दो करूब प्राणी बणेड़ा हा। झिका आपगी पांखा ऊं बि पाप माफ करण गी जिग्या नै ढक राखी ही। पण अब आ सारी चिजां गै बारे में न्यारो न्यारो बताणो मुसकिल है।

6 जद ऐ चिजां रीत अनुसार तैयार होज्यै ही। जद याजक तंबु गी पेली जिग्या में हरेक दिन जा'गे सेवा करतो हो। 7 पण दूसरी महा पवितर जिग्या में सिरफ महा याजक ई साल में एकर जावंतो हो। बो लोगा गै अणजाण पापा खातर जानवर गो लोई लेगे बठै चढावंतो हो। 8 ईं ऊं पवितर आत्मा बताणो चावै कै, जद तांई ईं संसार में बणेड़ै तंबु गो बारनो खुलो है जद तांई सुरग गै तंबु गो बारनो बंद है। 9 ओ तंबु आज गै जुग खातर एक मिसाल है झिकै में हिसी भेंट अर बलिदान चढाईजै है। आ चिजां ऊं लोगा गो मन कदी सुद्ध कोनी हो सकै। 10 ईंखातर आंगो मेल सिरफ खाणे पीणे अर न्यारी न्यारी विधियां ऊं सरीर नै सुद्ध करण गो है। आ रीति बि टेम तांई है जद तांई यीसू धरती पर ना आ'ज्य।

मसी गै लोई में ताकत

11 पण अब मसी आपणै होण आळै कल्याण गै रूप में प्रधान महा याजक बणगे आयो है। बो हिस्यै तंबु में रेवंतो हो। झिको संसार गै बणायेड़ै तंबु ऊं भोत म्हान है अर झिकै नै कणई मिनख कोनी बणायो। 12 अर बो इमै बकरा अर बछड़ा गो लोई लेगे कोनी गेयो। पण बे खुद बलिदान होगे बि परम पावन जिग्या में आपणी हमेसा गी मुकती खातर जा बैठया है। 13 क्यूंकै लोई अर बांगी राख, लोगा पर छिड़कण ऊं सिरफ बांगो सरीर ई सुद्ध होवंतो हो। 14 तो फेर मसी गो बो बलिदान झिको बण आपगी सन्तान आत्मा ऊं परमेसर सामै निरदोस चढायो हो बो आपगै मरेड़ै मन नै क्यूं कोनी सुद्ध करेगो। जिऊं आपां बी जीमतै परमेसर गी सेवा कर सका।

15 अर इंगै कारण ई यीसू नुए वायदे गो बिचाळो बणयो है, झिकै गै बलिदान ऊं लोगा गै पेलै वायदे गै टेम गै अपराध ऊं मुक्ती मिलज्यै। अर परमेसर गा चुणेड़ा लोग वायदे गै अनुसार हमेसा खातर बिंगा वारिस बणज्य।

16 क्यूंकै झिकै गो बसियतनामो लिखीजे है बठै बिंगी मोत गो प्रमाण देणो जरूरी है। 17 क्यूंकै हिसी बात आदमी गै मरण गै बाद मानिजै है अर जद तांई आदमी खुद जीमतो है इतै ओ मानिजै कोनी। 18 ईंखातर पेलो वायदो, बिना बलिदान गै कोनी बांदेड़ो हो। 19 क्यूंकै पुराणै जमाने में मूसा हरेक लोगा नै नेम विधान गी सारी आग्या बता दी ही। जद बण बछड़ा अर बकरा गो खून लेगे अर सारै लोगा पर छिड़कगे केयो हो कै, 20 ओ वायदे गो लोई है झिकै गी आग्या बण खुद परमेसर दी है। 21 अर इंया ई बण आपगी रीति ऊं बि तंबु अर सेवा गै सारै समान पर छिड़क्यो है। 22 बांगै नेम विधान गी रीत में बिना लोई छिड़के कोई बी चीज सुद्ध कोनी होवंती ही। ईंखातर बे लोग पाप गी बली चढावंता हा।

मसी गै बलिदान गै द्वारा पापां गी माफी

23 बे ओ जरूरी समझता कै सुरग गी चिजां गै नमूनै नै आऊं ई सुद्ध करीजै। पण सुरग गी चिजां नै आऊं बी उतम ऊं उतम बलिदान ऊं सुद्ध करणी जरूरी है। 24 क्यूंकै मसी बांगै हात गी बणायेड़ी पवितर जिग्या में कोनी बड़यो हो। पण बो तो परमेसर गै बणायेड़ै सुरग में बड़यो हो। जठै बो आपणै खातर परमेसर गै सामै हाजिर रेवै। 25 अर बिनै खुद नै बारी बारी बली गो लोई चढाण गी जरूरत कोनी पड़ती ही। जियां ईं संसार गा महा याजक, हरेक साल जा'गे चढावंता हा। 26 जे इंया होवंतो तो बिनै सांसार गै बणाण गै टेम ईं लेगे आज तांई बारी बारी दुख उठाणो पड़तो। पण अब, जुग गै आखर में बो एकर ईं आयो है, जिऊं बो खुद नै बलिदान कर'गे लोगा गै गुनावा नै खत्म कर दय। 27 जियां मिनख गै मरण गो दिन बणेड़ो है, बियां ई बिंगै न्याय गो बी दिन बणेड़ो है। 28 इंया मसी लोगा गै पापा खातर एकर ई बलिदान होयो हो। अर अब झिका लोग बिनै उडीकण लागरया है। बे बिनै एक दिन बिना पाप गै आपगै उद्धार सागै देखैगा।