इब्रानी 8

मसी आपणो महा याजक

1 ऐ झिकी बातां आपां करण लागरया हा, आमै सारा ऊं मोटी बात आ है कै आपणो हिस्यो महा याजक है झिको सुरग में परम पिता परमेसर गी दाहिणी ओर बैठयो है। 2 बो बठै पवितर अर सच्चै तंबु में सेवा करै है झिकै नै कणई मिनखा कोनी बणायो पण प्रभु ई बणायो है।

3 क्यूंकै धरती पर महा याजक नै ईंखातर चुणीजै कै बो आप खातर अर लोगा खातर भेंट अर बलिदान चढावै। ईंखातर ओ जरूरी हो कै बो बी बठै कीं चढावै। 4 जे बो अजे तांई धरती पर होवंतो तो याजक कोनी बण सकतो क्यूंकै नेम विधान गी रीति ऊं भेंट चढाण आळा लोग ईं धरती पर है। 5 ऐ लोग बे याजक है झिका सुरग गी चीज गै नमूनै गी सेवा करै है क्यूंकै जद मूसा ईं धरती पर परमेसर खातर तंबु बणाण पर हो बि टेम परमेसर बिनै केयो कै तू तंबु बणावंता टेम ध्यान राखी कै झिको नमुनो मैं तनै पहाड़ पर दिखायो, सारी चिजां बि बरगी होणी चईयै। 6 पण झिकी सेवा यीसू नै मिलेड़ी ही बा आंगी सेवा ऊं भोत ज्यादा उतम ही। क्यूंकै झिकै वायदे गै बिचाळै बो ओर बी उतम वायदे गै सहारे बांदेड़ो हो।

7 क्यूंकै जे पुराणो वायदो सिद्ध होवंतो तो आज बिंगै नुए वायदे गी लोड़ कोनी पड़ती। 8 पण परमेसर बा लोगा में दोस देख्यो हो तो केयो, देखो, बो दिन आण आळो है जद मैं इसराएल गै अर यहूदा गै लोगा सागै एक नुओ वायदो करूंगा।

9 मेरो ओ वायदो, बि वायदे बरगो ना हो'सी

झिको मैं पुराणै जमाने में बांगै बड़ेरा सागै करयो है।

अर बानै मिस्र देस गी गुलामी ऊं छुड़ाया हा।

पण बे लोग मेरै वायदे पर कोनी रेया हा।

ईंखातर अब मैं बानै याद कोनी करूं।

10 अर बा ओ बी केयो कै, झिको वायदो में इसराएल गी पीढी ऊं करूंगा बो ओ है

कै मैं आपगो नेम विधान बानै सुणागे बांगै हिड़दय पर लिखूंगा, बे मेरा लोग कुहावेगा अर मैं बांगो परमेसर ठेरूंगा।

11 बि टेम बानै एक दूसरै नै ओ केण गी लोड़ कोनी पड़ैगी

कै तू परमेसर पर बिस्वास कर। क्यूंकै बि टेम छोटा मोटा सारा मनै जाण ल्यगा।

12 क्यूंकै मैं बांगै पापा नै माफ कर'गे बांगा पाप भूल ज्यूंगा।

13 परमेसर ईं नुए वायदे गै कारण ई बि पुराणै नेम विधान नै बंद कर दय है क्यूंकै झिकी चीज पुराणी अर कमजोर हो'ज्य, बा एक दिन खत्म हो'ज्य है।