इब्रानी 13

मसी जीवन जीण गी सलाह

1-2 ईंखातर भाईचारै गी प्तीती बणायो राखो अर आयेड़ै मेहमान गो आदर मान करणो ना भूलो। क्यूंकै इंया करण ऊं केई लोगा भूल में सुरगदूता गो आदर मान करयो हो। 3 अर इयांई सताव गै कारण जेळ में बंद लोगा नै ओ समझ गै याद करता रेवो, जिंया थे खुद जेळ में हो। अर झिका सागै भोत बुरो होयो है क्यूंकै इंया एक दिन थारै सागै बी हो सकै।

4 थे लोग ग्रहस्ती जीवन गो आदर करो। क्यूंकै परमेसर बेबीचारिया अर दूसरी लुगाई कनै जाण आळै लोगा नै सजा दयगो। 5 ध्यान राखो,

थारो सभाव लालची ना होवै।

अर झिको कीं थारै कनै है बि पर ई संतोस राखो।

क्यूंकै परमेसर गो बचन है कै, “मैं तनै ना कदी छोडूंगा

अर ना कदी तेरूं दूर होऊंगा।”

6 ईंखातर आपां बेधड़क होगे के सका कै,

“तू मेरी मदद करण आळो है।

आदमी मेरो कीं कोनी बिगाड़ सकै, मैं किऊं ई कोनी डरूं।”

7 अर बानै याद राखो झिका थारा अगुवा है झिका थानै परमेसर गो सुब समाचार सुणायो हो। बांगै चाल चलन नै देखगे थे बी बिंया ई बिस्वास गै सागै चालै करो। 8 यीसू मसी आज काल अर जुगा जुगा तांई एकसो ई है।

9 ईंखातर थे ओर कोई उपरली सीख में पड़गै भटक ना जाईयो। उतम बात तो आई है कै आपणै मन नै भोजन ऊं कोनी पण परमेसर गी किरपा ऊं ताकत मिलै है। खाण पीण गै नेम नै मानण आळै लोगा नै आऊं कदी कोई लाभ कोनी मिलै। 10 पण आपणै कनै बी एक हिसी बेदी है झिकी पर चढायेड़ै चढावै नै खाण गो हक बा लोगा नै कोनी झिका तंबु में सेवा करै है।

11 क्यूंकै झिकै पसू गो खून महा याजक पाप बली खातर महा पवितर जिग्या में लेगे जावंतो, बांगो सरीर बे नगर गी कांकड़ ऊं बारे ले जा'गे बाळ देवंता हा। 12 ईंखातर यीसू खुद लोगा नै आपगै खून ऊं पवितर करण खातर, यरुसलेम ऊं बारै करूस गो दुख उठायो हो। 13 तो आओ आपां बिंगै दुख गो भार आप पर लदगे, नगर ऊं बारे बी कनै चाला। 14 क्यूंकै आपणो ईं धरती पर सदा रेण आळो नगर कोनी है पण आपां तो बि नगर गी उडीक में हा झिको आ'गे आण आळो है। 15 तो आओ आपां झिकै होटा ऊं यीसू नै प्रभु केगे माना बिंगै द्वारा ई परमेसर नै बड़ाई रूपी भेंट चढावां। 16 पण भलाई अर दुसर गी मदद करण गी भेंट चढाणी ना भूलो। क्यूंकै परमेसर हिसी भेंट ऊं ई राजी रेवै है।

17 अर आपगै अगुवा गी मानता रेवो अर बांगै अधीन रेवो। क्यूंकै बे थारी आत्मावां गा पेरेदार है झिका नै आंगो लेखो देणो हो'सी। ईंखातर बांगो केणो मानता रेवो, जिऊं बे ओ काम आनंद ऊं करता रेवै। जे बा ओ काम दुखी होगे करयो तो थानै इऊं कोई लाभ कोनी मिलैगो।

18 अर थे म्हारै खातर बी पराथना करता रेवो। क्यूंकै म्हानै पूरो बिस्वास है कै म्हारो मन सुद्ध है अर म्हे हरेक हालत में आपगो चाल चलन सुद्ध राखणो चावां हा। 19 मैं खास तोर ऊं थानै केऊं कै थे मेरै खातर पराथना करै करो जिऊं मैं थारै कनै बेगो आ सकूं।

आसिस बचन

20 अब सांती दाता परमेसर, आपणै प्रभु यीसू नै झिको भेड़ा गो म्हान गुआळियो है। बिनै परमेसर आपगै सन्तान वायदे गै खून गै गुणा ऊं मरेड़ा मूं जींवतो करयो है झिको थानै हरेक गुणा में सिद्ध कर सकै। जिऊं थे बी परमेसर गी इच्छा पूरी कर सको। 21 अर झिको कीं बो आपणूं चावै बो बिनै आपणै में पैदा करै। जिऊं बिंगी बडाई जुगा जुगा तांई होवंती रेवै।

22 तो हे मेरा भाईयो अर भेनो, मैं थारूं आई बिनती करूं कै थे ईं उपदेस गी बाता पर गोर राखो। मैं थानै ओ खत भोत कम बाता में लिख्यो है।

23 मैं चाऊं कै थानै ईं बात गो ठा लागज्य कै, आपणो भाई तीमुथियुस जेळ ऊं छूट ग्यो है। जे बो मेरै कनै बेगो ई आ'ग्यो तो मैं बिंगै सागै थारूं मिलण आऊंगा।

24 थारै सारै अगुवा नै अर सारै पवितर लोगा नै म्हारी ओर निमस्कार केईयो। अर इटली देस गा लोग बी थानै निमस्कार केवै है।

25 परमेसर गी किरपा थारै सारा पर सदा होवंती रेवै।