इब्रानी 5

1 हरेक महा याजक मिनखा मूं चुणीजै है अर बो बांगी बा बाता खातर चुणीजै झिकी परमेसर ऊं मेळ राखै है। बो भेंट अर बांगै गुनावा खातर पाप बली चढायै करै। 2 अर ओ अग्यानी अर परमेसर गै रा ऊं भटकेड़ै लोगा सागै नरमी ऊं बरताव कर सकै। क्यूंकै एक महा याजक गै खुद ऊं बी कोई ना कोई गळती होवै है। 3 ईंखातर बिनै लोगा गै गुनावा गी पाप बली सागै आप खातर बी चढाणी पड़ै है। 4 ओ महा याजक गो पद, खुद कोई आदमी कोनी ले सकै। क्यूंकै हरेक, महा याजक हारून गी तरियां परमेसर गी ओर ऊं चुणीजै है।

5 इंया यीसू मसी बी ओ पद आपी कोनी लियो है। पण परमेसर बिनै चुणगे केयो कै “तू मेरो बेटो है, अर मैं तेरो पिता हूं।”

6 अर इयां बी दूसरी जिग्या में केवै कै, “तू मलकिसिदक गी तरियां हमेसा खातर एक याजक है।”

7 यीसू जद ईं संसार में हो तो बण आपगी ईं मोत गी सजा नै टाळन खातर, परमेसर ऊं रो रोगे अर गिड़गिड़ा गै पराथना करी ही अर बिंगी भगती गै कारण बिंगी सुणी बी ही। 8 यीसू इतो दुख भोग भोगगे बी, आपगै पिता परमेसर गी आग्या मानणी सीखी ही। 9 अर सिद्ध बणगे आपगै आग्या मानण आळै लोगा खातर हमेसा खातर मुकतीदाता बणग्यो। 10 अर परमेसर गी ओर ऊं बिनै मलकिसिदक गी तरियां महा याजक गो पद मिलग्यो।

बिस्वास ऊं भटकण गो नतीजो

11 इंगै बारे में केण खातर म्हारै कनै भोत सी बाता है। पण इंगो बखान करणो ओखो है क्यूंकै थे आज कल कम सुणन लागग्या। 12 टेम देखता तो थे अब नै गुरूजी बण ज्याणो, पण थानै देखण ऊं लागै कै थानै एक हिस्यै मिनख गी लोड़ है, झिको थानै परमेसर गी सरू आळी बाता दुसर ऊं सिखावै। थे तो दूध पीण आळै टाबरा बरगा हो, झिका नै रोटी गी जिग्या पीण नै दूध चईयै। 13 क्यूंकै दूध पीण आळो टाबर परमेसर गी भगती गी बाता नै कोनी समझ सकै। 14 पण रोटी मोटै मिनखा खातर है झिका आपगै सयाणे पण ऊं आच्छै माड़े नै जानण लागग्या है।