इब्रानी 4

परमेसर गै लोगां गो आराम

1 परमेसर गो बि आराम आळै दिन गो वायदो आज बी कायम है। ईंखातर आपां चोकस रेणो है कै आपां बि जिग्या में जाण ऊं चूक ना ज्यावां। 2 क्यूंकै आपां नै बी बिया ई सुब समाचार सुणायेड़ो है जियां बां लोगा नै सुणायो हो। पण बां लोगा ईं पर बिस्वास कोनी करयो। ईंखातर बानै इंगो लाभ कोनी मिल्यो है। 3 पण अब देखो, आपां बिस्वास सागै बिंगी आराम आळी जिग्या में आया हा पण झिका बिस्वास कोनी करयो, बानै परमेसर रीस में आ'गे केयो,

ऐ लोग मेरी आराम आळी जिग्या में कोनी बड़ सकैगा।

भले ई बा काम धरती बणांवता टेम परमेसर गी तैयार करेड़ी ही।

4 क्यूंकै पवितर सासतर में आ बात लिखेड़ी है। परमेसर छ: दिना में सारो काम पूरो कर'गे सातवे दिन आराम करयो है। 5 अर बाई बात फेर केयी, ऐ मेरी आराम आळी जिग्या में बड़ कोनी सकैगा।

6 आ बात तो पक्की है कै बि आराम आळी जिग्या गो बारनो खुलो है। पण बठै बे लोग कोनी जा सक्या, झिका बिंगी बात पर बिस्वास कोनी करयो हो। 7 ईंखातर परमेसर एक खास दिन ओर चुण्यो झिको है “आज गो दिन।” ईं दिन गै बारे में परमेसर भोत टेम बाद राजा दाऊद गै मुख ऊं फेर जिकर करयो कै,

“जे थे बिंगी बात सुणौ तो,

मन कठोर ना कर लेईयो।”

8 अर जे बा लोगा नै यहोसु आराम आळी जिग्या में बाड़ देवंतो तो फेर बी दूसरै दिन गी चरचा कोनी होवंती। 9 ईंखातर थे ओ जाणल्यो कै परमेसर गै लोगा खातर आराम आळो दिन बणेड़ो है। 10 क्यूंकै झिको बिंगी आराम आळी जिग्या में जावै तो बो परमेसर गी ना'ई आपगै छ: दिना गै कामा नै पूरो कर'गे आराम पावै है। 11 तो आपां नै बी, बि जिग्या में जाण खातर कोसिस करणी है, कठैई इंया ना होवै कै इसराएली लोगा गी तरियां आपणै मू बी कोई बिंगी आग्या तोड़गे लारै रेज्य।

12 क्यूंकै परमेसर गो बचन प्रबल अर दो धारी तलवार ऊं बी चोखो है अर बो जीव अर आत्मा नै अर गांठ गांठ अर गुदै नै न्यारा कर'गे अर पार छेद दय। अर आपणै मन गी भावनावां अर विचारां गी जांच पड़ताल करै है। 13 संसार गी कोई बी चीज बिऊं लुकेड़ी कोनी है। अर हिस्यो कोई जीव कोनी झिको बिंगी नजर ऊं ओले है। बिंगी नजर हरेक चीज पर है अर एक दिन आपां नै बांगो लेखो देणो पड़सी।

मोटो महा याजक

14 ईंखातर जद आपणो महा याजक परमेसर गो बेटो यीसू सुरग में दाखिल हो'ग्यो है तो आपां बी आपणै बिस्वास गै सागै मजबूत बणया रेवां। 15 आपणो महा याजक हिस्यो कोनी है, झिको आपणी परेसानिया में आपणै सागै ना रेवै। पण बो तो हरेक बाता में आपणी तरियां परखिजेड़ो है। पण फेर बी बो बेगुनाह ई निकळ्यो। 16 ईंखातर आज्यो, आपां बिंगी किरपा गै सिंहासन कनै हिम्मत ऊं पोंचा जिऊं आपां नै जरूरत गै टेम मदद मिल सकै।