इब्रानी 3

यीसू मूसा ऊं बी ऊंचो

1 तो हे मेरा भाईयो अर भेनो, थे झिका परमेसर गै सुरगीय बुलाहट में भागी हो। थे बि खास चेले अर महा याजक यीसू गी बाता पर ध्यान राखो झिकै पर बिस्वास करयो है। 2 जिंया मूसा परमेसर गै लोगा में बिस्वास लायक रेयो हो बिंया ई यीसू बी परमेसर कानी बिस्वास लायक रेयो है। 3 परमेसर मूसा ऊं ज्यादा यीसू नै मेमा में मोटो मान्यो हो। जिंया एक मकान बणाण आळै मिस्तरी नै मकान ऊं मोटो मानिजै है। 4 क्यूंकै हरेक मकान नै बणाण आळा कोई कोई होवै है पण हरेक चीज नै बणाण आळो परमेसर ई है। 5 बि टेम में मूसा परमेसर गै सारै लोगा खातर एक दास गी तरियां बिस्वास लायक रेयो हो। कै झिकी बाता आण आळै टेम में होवैगो बांगी गवाई दे सकै। 6 पण मसी तो बिंगै बेटै गी तरियां है झिको बिंगै घर गो वारिस है। बिंगो घर, आपां बिस्वासी लोग हा। ईंखातर आपां नै अंत गै टेम तांई हिम्मत अर पक्की आसा गै घमण्ड पर मजबूत रेणो है।

अबिस्वासियां खातर चेतावनी

7 ईंखातर आज, पवितर आत्मा आई चावै कै जे थे बिंगी बात सुणो।

8 तो आपगो मन कठोर ना करियो

जिंया पुराणै टेम में इसराएली लोगा

बन उजाड में परख गै दिनां में बिंगो बिरोध करयो हो।

9 जठै थारै बडेरा, मेरै म्हान कामा नै चालीस साल तांई देखता रेया। पण फेर बी बा मेरी परख करी।

10 ईं कारण मनै बा लोगा पर रीस आई ही। अर जद मैं केयो,

आंगो मन हमेसा भटकतो रेयो

अर ऐ मेरै बताएड़ै रा पर कोनी चाल्या।

11 जद मैं आ सोगन खाई कै ऐ लोग कदी मेरी आराम आळी जिग्या में कोनी बड़ सकैगा।

12 ईंखातर है मेरा भाईयो अर भेनों, थे चोकस रेईयो। कठैई इंया ना होवै कै थारो मन बी बा तरियां बुरो अर अबिस्वास हो'ज्य। जिऊं थे जींवतो परमेसर ऊं दूर होज्यो। 13 पण बि दिन तांई झिकै नै आज गो दिन केयो जावै है, थे सारा लोग मिलगे हरेक दिन एक दूसरै नै होसलो देवंता रेवो। जिऊं थारै मूं कोई बी पाप गै भहकावे में आ'गे कठोर ना हो'ज्य। 14 क्यूंकै आपां मसी गै सागै सेहभागी होयड़ा हा। ईंखातर आपां नै आपणै बिस्वास सागै आखरी टेम तांई पक्को रेणो है। 15 जियां पवितर सासतर में लिखेड़ै है कै,

जे थे आज बिंगी आवाज सुणन लागरया हो

तो आपगो मन कठोर ना कर लेईयो।

जिंया बा इसराएली लोगा रीस गै टेम करयो हो।

16 अब बताओ के ऐ लोग बे कोनी हा, झिका परमेसर गी बात सुणगे रीस करी ही? के ऐ लोग बे कोनी हा झिका मूसा गै द्वारा मिस्र देस गी गुलाम ऊं छुड़ाया हा? 17 अर बो चालीस साल तांई किसयै लोगा ऊं रुसेडो रेयो। बे कोनी हा झिका पाप करयो हो? अर बांगी ल्हास बन उजाड़ में पडी रेयी। 18 अर बण किस्य लोगा खातर सोगन खायी हे कै थे मेरी आराम आळी जिग्या में कोनी बड़ सकोगा। सिरफ बा लोगा खातर ई झिका बिंगी आग्या कोनी मानी ही। 19 इऊं आपां देख सका कै बे लोग बिंगी आग्या ना मानण गी बजह ऊं आराम आळी जिग्या में कोनी बड़ सक्या।