इब्रानी 2

मोटो उद्धार

1 ईंखातर आपां नै हमेसा चोकस रेणो है अर आपणो मन हमेसा बांगी बाता पर राखणो है। अर कठैई इंया ना होवै कै आपां बांगी बाता ऊं भटक ज्यावां। 2 क्यूंकै झिकी बाता सुरगदूत गै द्वारा केयेड़ी बे पक्की रेयी ही। अर बि टेम हरेक आदमी नै बिंगै गुनाह अर आग्या ना मानण गै बदळै में सजा मिली ही। 3 तो आपां लोग बि मुकती गी बात ऊं बेफिकर होगे बिंगै दण्ड ऊं किंया बचागा झिकी बात गी चरचा प्रभु पेला ई कर चुकयो है अर झिकै लोगा बिंगी बाता नै सुणी, बा आ बाता नै सई साबित करी ही। 4 अर आंगै सागै सागै परमेसर आपगी इच्छा ऊं चमत्कार, निसान अर हरेक तरियां गा सामरथ बांटणै गै द्वारा ईं बात गी गवाई देवंतो रेयो है।

आपणो उद्धार करण आळो

5 परमेसर आण आळै बी राज नै सुरगदूत गै अधीन कोनी करयो है झिकै गी आपां बात करण लागरया हा। 6 पण पवितर सासतर में कणई आदमी परमेसर नै पूछयो है कै,

“आदमी के है, कै थे बिंगी सुधी लेवै हो के?

या मिनख गो बेटो के है कै थे बि पर इतो ध्यान राखै हो?”

7 तू तो सिरफ थोड़े ई टेम खातर सुरगदूत गी बराबरी में बिंगो पद कम करयो हो

अर बिनै आदर अर मेमा गो राज मुकुट पिहरायो हो अर आपगै करेड़ा कामा पर हक बी दियो है।

8 तू संसार गो सारो कीं बिंगै हक में कर दियो है बण हिसी कोई चीज कोनी छोड़ी झिकी बिंगै अधीन ना होवै। पण इंया होवंता बी, सारो कीं बिंगै अधीन में कोनी दिखै है।

9 पण आपां बी यीसू नै देखा झिकै नै थोड़े टेम खातर सुरगदूता गी बराबरी में कम करीज्यो कै बो परमेसर खातर बलिदान हो'ज्य। अर बिनै ईं मोत गै दुख गै कारण ईं मेमा अर आदर गो मुकुट मिलेड़ो है। कै परमेसर गै किरपा ऊं हर एक माणसां खातर मोत होवै।

10 क्यूंकै झिकै परमेसर सारो कीं बणायो है अर झिकै खातर सारो कीं है, बिनै ओ ई आच्छो लागग्यो कै यीसू भोतसा लोगा नै बिंगी मेमा में पोंचावै। जिऊं बे मुक्ती देण आळै यीसू नै दुख भोगण गै कारण सिद्ध करै। 11 क्यूंकै पवितर करण आळो यीसू अर पवितर करीजण आळा लोग बी एक ई पिता गी उळाद है। ईंखातर बो बानै भाई केण में कोनी सरमावैगो। 12 बिंगो केयेड़ो है कै,

मैं तेरो नाम आपगै भाईयां नै सुणाऊंगा

अर बांगै बिचाळै तेरो भजन गाऊंगा।

13 अर यीसू ओ बी केयो,

मैं परमेसर पर पूरो भरोसो राखूंगा

झिकै आपगा टाबर मनै सूंपया है।

14 बे सारा हाड मांस गा बणेड़ा है अर बो बी बांगै बरगो बण गयो कै आपगै बलिदान ऊं बि सैतान नै कमजोर कर सकै झिकै नै मोत देण गी ताकत है। 15 अर जिता लोग मोत गै डर गी गुलामी में जीवै बानै बी गुलामी ऊं छुड़ा ल्य। 16 पण आ बात तो पक्की है कै बो सुरगदूता ऊं ज्यादा अब्रहाम गी पीढी गै लोगा गो ध्यान राखै है। 17 ईंखातर बिनै ईं संसार में मिनख बरगो बणाणो जरूरी है अर परमेसर गी बाता गै अनुसार बो सारै लोगा सागै एक दयालु अर बिस्वास लायक महा याजक बण्यो। जिऊं बो लोगा गै पापा गो बलिदान दे सकै। 18 अर बो बा लोगा गी बी मदद कर सकै झिका गी परख होवै है क्यूंकै बण आप बी परख गै टेम भोत दुख भोग्यो है।