इब्रानी 1

इब्रानी मसी लोगा गै नाम खत

परमेसर गो बचन बेटै गै द्वारा

1 परमेसर पुराणै युग में आपणै बडेरा ऊं न्यारी न्यारी तरियां अर न्यारै न्यारै टेम में बांगी बात बोलण आळां गै द्वारा ऊं बात करी ही। 2 पण अब आखरी दिनां गै टेम में आपगै बेटै गै द्वारा आपणूं बाता करी है। झिकै नै बण सारी धरती आसमान पर वारिस ठेरायो है अर झिकै गै द्वारा बण आनै बणाया है। 3 ओ बि परमेसर गी मेमा गो प्रकास अर बांगै गुणा गो रूप है। अर बो ई ईं संसार गी चीजा नै आपगी ताकत गै बचन ऊं संभाळै है अर अब बो पापा नै मिटागै परमेसर गी दाहिणी ओर बैठयो है। 4 अर बानै सुरगदूता ऊं ऊंचो पद मिलेड़ो है। क्यूंकै झिको नाम बानै परमेसर गो वारिस होण में मिल्यो है बो नाम बा सुरगदूता गै नाम ऊं भोत म्हान है।

परमेसर गै बेटै गो म्हत्व

5 क्यूंकै परमेसर कदी कोई सुरगदूत नै कोनी केयो कै,

तू मेरो बेटो है

अर आज मैं तेरो पिता हूं,

अर ना ओ केयो है

मैं तेरो पिता होऊंगा,

अर तू मेरो बेटो कुहावैगो।

6 अर जद बो आपगै इकलोतै बेटै नै ईं संसार में भेजे जद बो सारै सुरगदूता नै केवै कै,

सारा इनै झुकगे निमस्कार करो।

7 अर बो सुरगदूता गै बारे में केवै है कै,

बो आपगै सुरगदूता नै पून

अर सेवका नै धधकती आग बरगा बणा देवै है।

8 पण आपगै बेटै गै बारे में केवै है कै,

हे परमेसर थारो सिंहासन जुगा जुगा तांई बणयो रेवै

अर तेरो राज न्याय गै सागै होवंतो रेवै।

9 तू सच्चाई गी पक्स लेगे बुराई ऊं निन्दा करी है।

ईंखातर कै, “हे परमेसर,” तेरै परमेसर नै तेरै लोगा ऊं चुण्यो है

अर आदर पाण गो महा आनंद तनै दियो है।

10 परमेसर ओ बी केवै है

हे प्रभु तू आदी में धरती गी नीम राखी

अर आकास बी तेरै हात गी कारिगरी है।

11 ऐ तो एक दिन खत्म हो'ज्यगा पण तू सदा खातर अमर रेवेगो

अर बे कपडै गी तरियां एक दिन पुराणा हो'ज्यगा।

12 अर तू बानै चादर गी तरियां सांवट ल्येगो

अर बे पुराणै कपड़ै गी तरियां बदळीजेगा।

पण थे बो ई हो

अर तेरै टेम गो अंत कदी कोनी होवैगो।

13 अर बण सुरगदूत मूं कदी किनैई कोनी केयो है,

तू मेरै दाहिणै बेठ,

जद तांई मैं तेरै दुसमणा नै

तेरै पगा नीचे ना कर देयूं।

14 सुरगदूता बा लोगा गी देखभाल करण आळी आत्मा है झिका आण आळै टेम में मुकती पावेगा।