6
1-2 ईंखातर मसी गी लारली बाता नै बारी बारी कोनी दोहराणी। जियां मोत कानी ले जाण आळै कामा खातर मन बदळणो, परमेसर में बिस्वास करणो, बतिस्मै गी सीख, सिर पर हात रखणो, मरगे पाछो जीणो अर झिकी आण आळै न्याय बरगी बाता है। पण आपां आ बाता नै छोड सिद्धता कानी बड़ता चालणो है।
3 अर जे परमेसर चायो तो आपां इयांई करांगा।
4 क्यूंकै झिका परमेसर गी एकर सच्चाई नै जाण ली अर झिका सुरग गै वरदान गो आनंद ले चुक्या है अर झिका पवितर आत्मा गै सागै भेळा हो'ग्या।
5 अर झिका परमेसर गै उतम बचन गा अर आण आळै सामरथी जुग गो आनंद चाखण गै बाद बी जे बे बि रा ऊं भटकग्या है तो बानै पाछा बी पछतावे गै रा पर ल्याणो भोत मुसकिल है।
6 क्यूंकै बे लोग परमेसर गै बेटै नै आप खातर करूस पर चढावै अर परगट रूप में बि पर कलंक लगावै है।
7-8 ऐ लोग बि माड़ी जमीन बरगा है झिकी बारी बारी मेह गो पाणी सोख गै कांटा अर ऊंटकटारा उगावै है। आ बेकार अर सरापित होण आळी है। अर ईं पर आखिर में आग ई लगाईजेगी। पण आदी जमीन बे लोग है झिकी पर आच्छी फसल होवै है। क्यूंकै परमेसर ऊं आसिरवाद पायेड़ी होवै।
9 हे प्यारा भाईयो अर भेनों, चायै म्हे थारै खातर इंया बोलण लागरया है, पण म्हानै थारै पर भोत ज्यादा बिस्वास है कै थे आच्छी अर मुकती आळी बाता पर बिस्वास करो हो।
10 क्यूंकै परमेसर अन्यायी कोनी कै बो थारै कामा अर थारी मेनत गो फळ ना दय। झिकी थे बिंगै पवितर लोगा गी सेवा करण में करी ही। अर अजे तांई करण बी लागरया है।
11 अर म्हे ओ ई चावां कै थारै मूं हरेक जणो आखिर तांई पूरी आसा गै सागै आई कोसिस करतो रेवो।
12 जिऊं थे आळसी ना बण सको। अर थे बांगै बतायेड़ै रा पर चालता रेवो। झिका बिस्वास अर धीरजाई ऊं बि वायदे गा वारिस होवै है।
परमेसर गो पक्को वायदो
13 जद परमेसर अबरहाम ऊं वायदो करयो बि टेम बिनै खुद ऊं मोटो ओर कोई कोनी लागग्यो। जद बण खुद गी सोगन खा'गे केयो कै,
14 मैं तनै सच्च में आसिस दयूंगा। अर तेरी पीढी नै बदावंतो रेऊंगा।
15 अर इंया अबरहाम धीरज गै सागै उडीक करतो रेयो। अर बाद में बिनै बि वायदे गो फळ मिल्यो।
16 मिनख हमेसा आप ऊं मोटै गी सोगन खावै है। अर बांगै हरेक झगडै़ गो फैसलो बी सोगन ऊं हो'ज्य है।
17 परमेसर इनै बा लोगा खातर पूरी तरियां ऊं पक्की करणी चावै है झिका नै बण चुनणा हा अर झिका नै आसिस देण गो वायदो करयो कै बो आपगै ईं वायदे ऊं कदी कोनी मुकरे गो। ईंखातर बण आपगै बचन सागै आपगी सोगन जोड़ दी।
18 तो अठै दो बात है एक तो बिंगी सोगन अर दूसरो बिंगो वायदो। आ दोना ऊं कदी कोनी बदळेगो अर ना'ई बो कदी झूठ बोलै है। आपां ईंखातर बिंगी सरण ली है कै आपणो होसलो मजबूती ऊं बढ ज्य जिऊं आपां बि आसा तांई पोंच ज्यावां।
19 बा आसा आपणै जीवन खातर पाणी गै जहाज गै लंगर गी तरियां है झिकी आपां नै कदी डोलण कोनी दयै। अर बा आपां नै पड़दे माखार परमेसर तांई पोंचावै है।
20 जठै यीसू मलकिसिदक गी तरियां हमेसा खातर महा याजक बणगे आपणै खातर अगुवै गै रूप में दाखिल हो'ग्यो है।