बिस्वासियां गै सागै जिमेदारियां
5
1 तीमुथियुस थारै ऊं जादा उंमर गै आदमी गै सागै कठोरता ऊं ना समझावो पण बिनै पिता समझगे समझावो। अर थारै ऊं छोटा गै सागै भाईयां बरगो समझगे समझावो।
2 जादा उंमर गी लुगाईयां नै मां समझगे समझा अर जवान लुगाईयां नै आपगी भेन समझगे सुद्ध मन गै सागै समझावो।
3 बि विधवा गो ध्यान राखो झिकी नै साची में मदद गी जरूरत है।
4 पण जे कोई विधवा गै छोरो-छोरी अर पोती-पोता है तो बानै सारा ऊं पेलां आपगै धरम गै उपर बिस्वास करता होया आपगै परिवार गी देख-भाल करणी सिखै। बे छोरा-छोरी अर पोती-पोता आपगै मां-बाप गै पालण-पोसण गो बदळो चुकावै क्यूंकै इंऊं परमेसर खुस होवै है।
5 बा लुगाई झिकी साची में विधवा है अर बिंगो ध्यान राखण आळो कोई कोनी है अर परमेसर ई बिंगो सहारो है अर बा दिन-रात मदद गै खातर पराथना करती रेवै अर पराथना में लागी रेवै है।
6 पण झिकी भोग विलास गै खातर जीयै, बा तो सरीर में जीयै पण आत्मा में मरेड़ी है।
7 ईंखातर बिस्वासी लोगा नै आ बातां गी आग्या दे कर कै कोई बी बानै दोसी ना बणावै।
8 पण जे कोई आपगै रिस्तै ऊं, खास कर'गे आपगै परिवार गै सदस्य गी मदद ना करै तो बो बिस्वास ऊं मुकरग्यो है अर झिको यीसू मसी में बिस्वास कोनी करै है बिंऊं बी जादा बुरो है।
9 बिस्वासी मण्डली गी ओर ऊं मदद लेण गै लाइक विधवां गी सूची में सिरफ बां विधवां गा नाम लिखो झिकी साठ साल ऊं कम ना होवै अर आपगै पती गै सागै वफादार रेई होवै।
10 बे हिसी होवै झिकी आपगै आच्छै कामां खातर जाणी जावै जिंया आपगै टाबरां नै पालणा, घरै आण आळां गो आदर मान करणो, पवितर लोगा गा पग धोणा, दुखी लोगां गी मदद करणी, अर आच्छा कामां में लागी रेणो।
11 पण जवान विधवा लुगाई नै ईं आच्छा कामा गी सूची में सामिल ना करो कै यीसू मसी गै सागै प्रेम में कम होगे सरीर गै सबंध गी इच्छा राखेगी अर बा ईंखातर फेर ब्या करणो चावैगी।
12 अर दोसी बण जावैगी क्यूंकै यीसू मसी गै सागै पेलां वायदो करयो है बिनै तोड़ देवैगी।
13 ईंखातर बानै आळस गी आदत पड़ज्य है। बे एक घर ऊं दूसरै घर में घूंमती रेवै है अर बे ना केवल आळसी हो'ज्य अर बे बकवास करती रेवै अर दूसरै लोगां गै कामां में टांग अड़ांती रेवै। अर हिसी बातां बोलण लागज्य कै बानै ना बोलणी चईयै।
14 ईंखातर मैं चाऊं कै जवान विधवा ब्या कर लेवै अर टाबरां गो पालण पोसण कर'गे आपगै घर-बार गी देखभाल करै कै कोई मसी गै बिरोधी नै बदनाम करण गो मोको ना मिलै।
15 मैं आ ईंखातर बतांऊं कई विधवा भटक गै सैतान गै लारै चालण लागज्य है।
16 जे कोई बिस्वासी लुगाई गै घर में विधवा है तो बानै बिंगी मदद आप ई करणी चईयै अर बिस्वासी मण्डली पर कोई भार ना होवै अर बिस्वासी मण्डली साची विधवा गी मदद कर सकै।
17 झिकी बिस्वासी मण्डली में अगुवा आच्छो परबन्द करता होवै अर खास कर'गे बे झिका बचन सुणाणै अर सिखाणै गो काम करै है, बे दो गुणा आदर मान गै लाइक समझया जावै।
18 क्यूंकै पवितर सासतर में लिख्यो गेयो है कै बळद जद खेत में होवै तो बिंगो मूं ना बांधो क्यूंकै मजदूर नै आपगी मजदूरी लेण गो पूरो हक है।
19 बिस्वासी मण्डली गै अगुवा पर लगाएड़ै दोस नै जद तांई कोनी सुणनो जद तांई बिंगा दो अर तीन साथी गवा ना होवै।
20 झिकी बिस्वासी मण्डली गा अगुवा लोग पाप में लाग्या रेवै तो बानै सगळां गै सांमणै आच्छी तरियां समझावै कै दूसरा बाकी लोग बी अपणै आप ई समझज्य।
21 परमेसर अर यीसू मसी गी ओर ऊं परमेसर गै चुणया होया सुरगदूतां गै सांमणै मैं सच्चाई गै सागै थानै उपदेस देऊं कै तूं मन खोलगे आ बातां नै मान्या कर अर कोई काम पक्सपात ऊं ना करै कर।
22 बिना सोचे समझै किनैई बिस्वासी मण्डली गो अगुवा बणाण गै खातर बि पर जल्दी हात ना रखी। किंगैई पापां गो भागिदार ना बणी अर अपणै आपनै सदां पवितर राखी।
23 अर पाणी ई ना पींतो रेई पण आपगै हाजमै खातर अर बारी-बारी बीमार होण ऊं बचण खातर थोड़ो सो अंगूरां गो रस बी पी लिया कर।