6
1 जिता दास थारै माऊं मालिकां गै नीचे गुलाम है, बानै आपगै मालिक गै आदर मान गै लाइक समझाणो चईयै। कै परमेसर गै नाम अर म्हारै उपदेस गी निन्दा ना होवै।
2 अर हिस्या दासा नै बी झिकां गो मालिक बिस्वासी है ईंखातर कै बे बांगा बिस्वासी भाई है। बांगो कम आदर कोनी करणो पण बानै तो आपगै मालिक गी जादा सेवा करणी चईयै क्यूंकै झिका नै इंगो लाभ मिलण लागरयो है, बो परमेसर गै उपर बिस्वास राखण आळो है, झिका नै परमेसर प्रेम करै। आं बातां नै सिखांवंतो रे अर आनै मानणै गी इच्छा करतो रे।
झूठी सिक्सा अर धन गो लालच
3 जे कोई झूठी सिक्सा सिखावै है अर आपणै प्रभु यीसू मसी गै सच्चै बचन नै मानै कोनी अर लोगां नै परमेसर गी इच्छा गै अनुसार बरताव करण में मदद कोनी करै है।
4 तो बो जादा घमण्ड करतो रेवै अर बो लोगां नै सिखावै है अर आप ईं बिंगै बारै में कोनी जाणै अर बो कई सब्दां नै लेगे बेंस अर झगड़ा करण गी बुरी आदत में पड़ज्य। आं बातां ऊं जळन अर लडाई झगड़ा करणा अर निंदा गी बातां अर दूसरा गै उपर झूठो बेम पैदा होवै है।
5 अर हिस्यै लोगां नै भले बुरे गी समझ कोनी है अर सच्चाई के है बे आ कोनी समझै है कै परमेसर गी सिक्सा सुणाण गै खातर म्हे भोत पीसो कमा सकां अर हिस्या लोगां गै बिचाळै सदा ई झगड़ो होंतो रेवै है।
6 पण एक आदमी नै जितो मिलै है बो बितै में ई बो खुसी ऊं परमेसर गो आदर करण आळो जीवन जीयै। बा'ईं बिंगै खातर एक मोटी कमाई है।
7 क्यूंकै आपां ना तो कीं लेगे आया हा संसार में अर ना ई कीं लेगे जा सकांगा।
8 जे आपणै कनै खाण खातर रोटी अर पेर खातर कपड़ा है तो आपां बिऊं खुस हां।
9 पण झिको धनी बणणो चावै है बे परीक्सा में पड़गै लालच में फसज्य है अर झिकी बुरी सोच अर नुक्सान करण आळी इच्छावां गै द्वारा कोई बी लाभ कोनी होवै। अर खुद ऊं नुक्सान ईं होवै है बे आदमियां नै बिगाड़ दैय अर नास गै रास्तै में लेज्य।
10 क्यूंकै धन गो प्रेम हर तरियां गी बुराई नै जन्म देवै है। कई लोग आपगी इच्छावां गै कारण यीसू मसी गै उपर बिस्वास करणो छोड़गे अपणै आपनै भोत जादा दुख में लेज्य।
तीमुथियुस नै आपगो निरदेस
11 हे तीमुथियुस, तूं परमेसर गो आदमी है ईंखातर आं बातां ऊं दूर रे कर अर धारमिकता बणाण खातर पूरी तरियां ऊं कोसिस करै कर, अर परमेसर गो आदर करण आळो जीवन जीयो, यीसू मसी गै उपर बिस्वास राख अर सगळा ऊं प्रेम कर। धीरज अर कोमल बण।
12 बिस्वास ऊं लारै ले जाण खातर थारै उपर भोत दुख आवैगो। जद तूं कड़ी मेनत करी जिऊं तूं पीछै ना जावै क्यूंकै बि बिस्वास नै तूं भोत गवावां गै सांमणै मान लियो हो अर झिको अनन्त जीवन मिल्यो है बिनै गमा ना देई। क्यूंकै ईंखातर ईं परमेसर तनै बुलायो है।
13 परमेसर गै सांमणै झिको सगळा नै जीवन देवै है अर यीसू मसी गै सांमणै जिता पुन्तियुस पिलातुस गै सांमणै आपगै बारै में आच्छी गवाई दी है। बिनै साक्सी कर'गे मैं थानै आ आग्या देऊं कै,
14 जद तांई आपणै प्रभु यीसू मसी गै पाछो आण तांई परमेसर गी सगळी आग्या नै आच्छी तरियां ऊं अर बिना दोस गै मानतो रेई।
15 आपणो परमेसर झिको स्तुति गै लाइक है अर राजावां गो राजा है अर प्रभुवां गो प्रभु है। बण झिको टेम पक्को करयो है बि टेम पर आपणै प्रभु यीसू मसी नै परगट करेगो।
16 अर बो ईं परमेसर सदां गै वास्ते जींवतो है अर बो जोती है अर झिकै नै कणैई कोनी देख्यो है अर देख बी कोनी सकै है।
17 ईं संसार गै धनवानां नै आग्या दे कै बे घमण्डी ना होवै अर झिको धन बेगो ई खत्म हो'ज्य बि पर आसा ना राखै। परमेसर पर ई आपगी आसा राखै कै झिको आपां नै आनंद गै खातर सारो कीं देवै है।
18 बानै आग्या दे कै बे आच्छा आच्छा काम करै। आच्छै काम ऊं ई धनी बणै। उद्धार अर दूसरा गै सागै आपगी चिजां बांटे।
19 इंया कर कै झिको धन बानै सुरग में लेगे जावै, बिनै बे बठै भेळो करोगा। अर बो धन आण आळै दिनां गै खातर एक आच्छी नींव जिस्यो होवैगो। झिको असली जीवन है बिनै बो हासिल कर ल्य।
20 हे तीमुथियुस, झिको सच्चो बचन तनै दियो है बो लोगां नै सिखांतो रे झिकी सिक्सा परमेसर गै बिरोध में सिखावै है अर बाऊं दूर रे अर बेमतलब गी बातां ऊं बी दूर रे। कई लोग गळती ऊं सगळा नै ग्यान बोलै है।
21 अर बि पर बिस्वास कर'गे सच्चै बिस्वास ऊं दूर हो'ग्या।
म्हान परमेसर गी किरपा गो हात सदां थारै सिर पर रेवै। आमीन।