झूठा सिक्सक
4
1 पवितर आत्मा सई रूप में केवै है कै यीसू मसी गै दुसर आण ऊं पेलां कीं लोग भटकाण आळी झूठी आत्मा गै परचार अर बुरी आत्मां गी सिक्सा पर मन लगागे पक्कै बिस्वास ऊं भटक जावेगा।
2 ऐ झूठा पाखण्डी सिक्सक है। आं लोगां नै सई अर गळत गै बारै में ठा कोनी।
3 झूठी सिक्सा देण आळा लोग ब्या करण ऊं रोकैगा अर खाण गी कीं चिजां ना खाण खातर बी सिक्सा देवैगा। पण परमेसर पर बिस्वास करण आळा नै अर झिकी चिजां नै परमेसर ईंखातर बणाई है कै बिंगी सच्चाई नै जानण आळा धन्यवाद देगे खा सकै है।
4 क्यूंकै परमेसर गी सरसटी में हर चीज आच्छी है, ओर कोई चीज ना करण गै लाइक कोनी है। हर खाण आळी चीज नै धन्यवाद गै सागै खा सकै है।
5 क्यूंकै परमेसर गै बचन में इंया लिख्यो है परमेसर झिको कीं बणायो बो आच्छो है। ईंखातर परमेसर गै बचन अर पराथना गै द्वारा बो पवितर हो जावै।
मसी यीसू गा आच्छा सेवक
6 हे तीमुथियुस, मैं थानै बोल्यो कै सारी बातां तूं भाईयां अर भेनां नै सिखावैगो तो यीसू मसी गो आच्छो सेवक ठेरैगो अर बिस्वास गी सच्चाई में अर झिको साची सिक्सा पर तूं चालतो आयो है बि में थारो आत्मिक पालण पोसण होवैगो।
7 झूठ अर बकवास क्हाणियां ऊं तूं अपणै आपगो दूर ई राखी। हिसी क्हाणियां परमेसर नै आदर देण गै खातर मदद कोनी करै है। अर परमेसर गी आग्या नै पालण कर'गे जीयो।
8 क्यूंकै सरीर गी सादना ऊं तो आपां नै जद तांई मदद मिलै जद तांई आपां धरती पर रेवां। पण परमेसर गो आदर करण में आ'गे बदण ऊं तो अब अर आण आळै जीवन में बी मदद मिलैगी।
9 आ बात साची अर हर तरियां ऊं मानण आळी है।
10 क्यूंकै आपां मेनत ईंखातर करां कै आपणो भरोसो परमेसर गै उपर है। बो जींवतो परमेसर है ओर सारां गो झिका बि पर बिस्वास करै है बानै पापां ऊं मुकती देवै है।
11 सारै बिस्वासियां नै आ बातां गी आग्या दयो अर सिखावो।
12 तेरी जवानी नै कोई माड़ी ना जाणै क्यूंकै तूं तकड़ो जवान है। पण तूं आपगी बातां में अर चाल चलण में अर प्रेम में अर बिस्वास अर पवितरता में बिस्वासियां गै खातर एक नमुनो बण जा।
13 जद तांई मैं तेरै कनै आऊं जद तांई तूं बिस्वासी लोगां नै आराधना गै खातर भेळा होण गै टेम परमेसर गो बचन जोर ऊं पढ अर उपदेस देण में अर सिखाणै में अपणै आपनै लगाए राख।
14 थे झिको वरदान परमेसर कनूं लियो है बिनै काम में ल्यो। ओ थानै परमेसर गै संदेस गै द्वारा दियो गेयो हो। ओ जद होयो जद बिस्वासी मण्डली गै अगुवा लोगां तेरै पर हात रख्यो हो।
15 आ बाता नै सोचतो रे अर आ पर ध्यान लगाए राख। जिऊं तेरै परचार करण गी अर सिखाण गै सामरथ गी बढोतरी सारै लोगां सांमणै परगट हो'ज्यगी।
16 आपगै जीवन अर उपदेस गो पूरो ध्यान राख। मैं तनै बताएड़ी बातां पर टिक्यो रे क्यूंकै इंया करतो रेवेगो तो तूं आपगै आपनै अर आपणै सुणण आळा गै खातर बी मुकती गो कारण होवैगो।