बिस्वासी मण्डली गो मुखिया
3
1 झिको कोई बिस्वासी मण्डली गो मुखिया बणणो चावै बो सच्च में भोत ई आच्छो काम है। आ बात बिस्वास करण गै लाइक है।
2 बिस्वासी मण्डली गै मुखिया गो जीवन हिस्यो होणो चईयै कै बे निरदोस, अर आपगी घराळी गै जींवता होयां दूसरो ब्या ना करण आळो होवै, अपणै आपनै वस में राखण आळो, समझदार, अर झिकै गो लोग आदर करता होवै, अर घरै आण आळां गो आदर मान करण आळो होवै अर आच्छी सिक्सा देण आळो होवै।
3 बो पिय्याकड़ ना होणो चईयै अर मार पीट करण आळो बी ना होणो चईयै अर हर बात पर झगड़ो करण आळो ना होणो चईयै अर पीसा गो लालची बी ना होणो चईयै अर बो मारण कुटण आळो ना होवै पण नरम सभाव गो होणो चईयै।
4 बो आपगै परिवार गै लोगा नै आच्छी तरियां संभालण आळो होवै अर बाल बच्चा बिंगी बात नै मानता होवै अर बिंगो पूरो आदर करता होवै।
5 जे कोई आपगै परिवार गो परबन्द करणो कोनी जाणै तो बो परमेसर गी बिस्वासी मण्डली गै लोगां गो बी परबन्द कोनी कर सकै।
6 बो एक नुओ बिस्वासी ना होणो चईयै कठैई इंया ना होवै कै बो हंकार ऊं फूल ना जावै अर परमेसर सैतान नै हंकार गै कारण झिकी सजा दी। बा'ईं सजा बिनै ना देवै।
7 बिस्वासी मण्डली गै मुखिया नै यीसू मसी में बिस्वास ना करण आळा लोगां गै सागै आच्छो नाम होवै पण इंया ना होवै कठैई सरमिन्दा होगे सैतान गै हात में ना फसज्य।
बिस्वासी मण्डली में सेवक
8 बिंया ई बिस्वासी मण्डली गी सेवा में मदद करण आळो बी आदर मान गै लाइक होवै, पाखण्डी, पिय्याकड़, अर बेहक गी कमाई करण आळो ना होवै।
9 पण बिस्वास गै बारै में झिको सच्चाई गो संदेस परमेसर परगट करयो है बिनै सुद्ध मन ऊं बिस्वास करणो चईयै।
10 अर बिस्वासी मण्डली गी सेवा में मदद करण आळो होवै, बिनै पेलां परखयो जावै जे बिमै कोई दोस ना निकळै तो बो बिस्वासी मण्डली गी सेवा में मदद करण आळो बणज्य।
11 ईं तरियां बिस्वासी मण्डली गी सेवा में मदद करण आळा गी लुगाईयां बी आदर मान गै लाइक होवै, चुगलखोर ना होवै पण अपणै आपनै बस में राखण आळी अर सारी बातां में बिस्वास गै लाइक होवै।
12 बिस्वासी मण्डली गी सेवा में मदद करण आळो आपगी धराळी गै जींवता होयां दूसरो ब्या ना करण आळो होवै अर बिनै आपगै बाल-बच्चा अर आपगै घर गो आच्छो परबन्द करण आळो होवै।
13 क्यूंकै कोई बिस्वासी मण्डली गी सेवा में मदद करण आळो आच्छी सेवा करै है तो लोग बिंगो आदर मान करै अर यीसू मसी गै उपर झिको बिस्वास बण राख्यो बि बिस्वास नै दूसरा नै बी बताण खातर बिंगी मोटी किमत मिलैगी।
आपणै जीवन गो रहस्य
14 मैं ईं आसा गै सागै थानै आ बात लिखण लागरयो हूं कै जल्दी ई थारै कनै आऊंगा।
15 जे मेरै आण में देर हो'ज्य तो ईं खत ऊं तनै ठा हो'सी कै जींवते परमेसर गी बिस्वासी मण्डली में लोगां गो रेणो सेणो किसोक होणो चईयै। अठै गा सगळा बिस्वासी सुब समाचार गी सच्चाई गो खंभो अर नींव बरगा है अर जिंया खंभै अर नींव गै सहारे ऊं मकान नै ताकत मिलै है बिंया ई बिस्वासी मण्डली गा बिस्वासी लोग सच्चाई नै सहारो देवै है।
16 म्हे झिको बिस्वास करां हां बिंगै डर ऊं सच्चाई भोत मोटी है। इमै कोई बी संका कोनी है। बा सच्चाई हिसी है कै, यीसू मसी माणस गै रूप जन्म लेगे अर पवितर आत्मा बिनै धरमी ठरायो। सुरगदूतां बिनै देख्यो अर बिंगै बारै में चेलां गेर यहुदियां गै लोगां में परचार करयो हो। फेर संसार गा लोग बि पर बिस्वास करयो अर परमेसर मोटै आदर गै सागै बिनै सुरग में ले लियो।