आराधना गै बारै में निरदेस
2
1 ईंखातर तीमुथियुस, सारा ऊं पेलां मेरो खास कर'गे ओ निवेदन है कै सगळा गी जरूरत पूरी करण खातर परमेसर ऊं बिनती करै, अर दूसरा लोगां गै खातर पराथना करो अर परमेसर गो धन्यवाद करो झिको सगळा माणसां गै खातर करयो जावै।
2 बिस्वासी लोगो थे सासकां गो अर सगळै अधिकारियां गो धन्यवाद पराथना करै करो कै आपां आराम ऊं सुरक्सित जीवन जी सकां अर परमेसर नै आदर दे सकां अर जिंया परमेसर चावै बिंया जीवन आपां जी सकां।
3 ओ आपणै मुकतीदाता परमेसर नै खुस करण आळो है अर आच्छो बी है।
4 परमेसर चावै है सगळा लोग आपगै पापा ऊं मुकत हो'ज्य अर बिंगै सच्चै बचन नै सिखै।
5 क्यूंकै परमेसर एक ई है अर माणस अर परमेसर गै बिचाळै मेल मिलाप करण आळो आदमी बी एक है, बो यीसू मसी ई है।
6 बण सगळा लोगां गै छुटकारै गै खातर आपगी जान दे दी। ईं तरियां परमेसर सई टेम में ओ साबित करणो चावै कै बो लोगा नै मुकती देणो चावै है।
7 अर ईं गवाई गो परचार करण गै खातर परमेसर मनै सुब समाचार बताण आळो एक परचारक अर खास चेलो चुण्यो है। मैं साची केण लागरयो हूं झूठ कोनी बण मनै गेर यहुदियां नै सिखाण खातर चुण्यो है कै लोग बिंगै साच्चै संदेस पर बिस्वास कर सकै।a
8 ईंखातर मेरी इच्छा है कै जद कदी बी थे लोग आराधना गै खातर भेळा होवो तो सगळा आदमी लोग परमेसर गी इच्छा गै अनुसार जीवन बितागे आपगै पवितर हातां नै उपर उठागे परमेसर ऊं पराथना करो अर ओ रीस अर झगड़ै ऊं ना करियो।
9 ईं तरियां मैं चाऊं कै लुगाईयां आच्छी तरियां कपड़ा पेरगे सीदी सादी होवै अर मानण गै लाइक होवै, बानै आपगै बाळा नै सई ढंग ऊं बांद गै राखणा चईयै अर दूसरा नै दिखाण खातर बे मेंगा कपड़ा, मोती अर सोनै गा गेणा ना पेरणा चईयै।
10 पण हिसी लुगाईयां नै झिकी अपणै आपनै परमेसर गी सेवा करण आळी समझै है। बांगै खातर सई ओ है कै बे दूसरा गै खातर आच्छा काम करै जिंऊं दूसरा नै मदद मिलै।
11 जद आदमी परमेसर गो संदेस बिस्वासियां नै सिखांतो होवै तो जद हरेक लुगाई चुपचाप ऊं सुणै अर पूरी तरियां बानै आदर देणो चईयै।
12 मैं ओ कोनी चाऊं कै कोई लुगाई बिस्वासी मण्डली में आदमी नै सिखावै अर पढ़ावै। बि पर हुक्म चलावे पण बिनै चुपचाप रेणो चईयै।
13 क्यूंकै परमेसर पेलां आदम नै बणायो, बिंगै बाद में हव्वा नै बणायी।
14 सैतान आदमी नै कोनी भेकायो पण लुगाई नै भेका दी अर बा पाप में पड़गी।
15 पण जद एक लुगाई मांगी जुमेदारी नै निभावै अर परमेसर पर बिस्वास करै अर दूसरा ऊं प्रेम करै अर परमेसर नै मानणै गै लाइक बणै अर बिंगै सागै पवितरता में बणी रेवै तो मुकती मिल जावैगी।