तीमुथियुस गै नाम
यीसू मसी गै खास चेलै पौलुस गो पेलो खत
स्वागत
1
1 मैं पौलुस, यीसू मसी गो खास चेलो हूं, क्यूंकै परमेसर झिको आपां नै मुकती देण आळो है अर यीसू मसी झिकी आपणी आस है, बाई मनै खास चेलो बणण गो हुक्म दियो हो।
2 हे तीमुथियुस, ओ खत मैं थानै लिखण लागरयो हूं। आपां दोनूं एक ई प्रभु यीसू पर बिस्वास करण आळा हां। ईंखातर तूं मेरै बेटै जिस्यो है।
मैं पराथना करूं हूं कै आपणो पिता परमेसर अर म्हारो यीसू मसी थानै किरपा अर दया अर सांती देंवंतो रेवै।
झूठै सिक्सकां गै बिरोध में चेताणो
3 जिंया मकिदुनिया प्रदेस में जांवता टेम मैं तनै इफिसुस सैहर में रेण गो केयो हो, मैं अब बी बि आग्रह नै बो ई हुक्म दुसर देण लागरयो हूं। क्यूंकै दूसरै बिस्वासी लोगां नै झूठी बातां सिखाण आळै लोगां नै थे हुक्म दयो ओर झूठी बातां सीखणाळा नै रोक दयो।
4 अर बांगै मन में बणाएड़ी बातां अर पुरखां गै नामा गी लंबी सूची पर झिकी लड़ाई-झगड़ै नै बधावो देवै है ध्यान ना लगाण नै केवो। ऐ बातां परमेसर पर बिस्वास राखणै लोग अर बांगी मरजी गी तरियां चालण में मदद कोनी देवै है।
5 ईं आग्या गो मतलब ओ है, लोग एक दूसरै गै सागै प्रेम भाव करै, झिको प्रेम साच्चै हिरदय ऊं आवै है, आच्छी सोच ऊं ओर बिना कपट गै बिस्वास ऊं पैदा होवै है।
6 आं बातां ऊं कीं लोग दूर हो'ग्या अर बेमतलब गी बातां में लीन हो'ग्या है।
7 बे नेम गा सिक्सक बणना चावै है, पण झिको कीं बे केवै है अर बां बातां पर बे भोत जोर लगावै है, बां बातां नै बे कोनी समझै।
8 म्हे जाणा कै परमेसर गा नेम आच्छा है। जे म्हे सई तरिकै ऊं सिखावां।
9 अर ओ बी जाणा कै परमेसर गो नेम धरमी लोगां खातर कोनी पण बां लोगां खातर है, झिका लोग परमेसर गै नेम नै तोड़ण आळा अर झिका परमेसर गै नेम गै सामै जाण आळा, अर झिका लोग परमेसर नै मानै कोनी अर ना आराधना करै है, अर झिका लोग माड़ा काम करै है अर परमेसर ऊं जुडे़ड़ा कोनी रेवै, अर झिका लोग मां बाप नै मारण आळा अर दूसरै लोगां नै मारण आळा है।
10 लुगाईयां अर छोरियां गै सागै गळत काम करण आळा लोग अर झिका आदमी आपगै सागै रेण आळा आदमियां गै सागै गन्दा काम करै है अर झिका लोग आदमियां नै चुरावै है अर बानै गुलाम गै रूप में बेचै है अर झूठ बोलण आळा अर सोगन तोड़ण आळा अर हिस्यो ई ओर कामां गै खातर दियो है, झिका आच्छी सिक्सा गो सांमणो करै है।
11 बां सुणी आच्छी सिक्सा बि सुब समाचार गै समान है झिकी परमेसर गी म्हानता नै बतावै है झिका लोग स्तुति करै है। परमेसर मनै जुमेदारी दी है कै मैं सुब समाचार गी बातां लोगां नै सिखाऊं।
परमेसर गै किरपा खातर धन्यवाद
12 मैं आपणै प्रभु यीसू मसी गो धन्यवाद करूं हूं। बण मनै सुब समाचार गी बातां सुणाण गै लाइक बणायो है। बण मनै भरोसै गै लाइक समझ गै आपगी सेवा करण खातर तैयार करयो है।
13 मैं यीसू मसी में बिस्वास करण ऊं पेलां, बिंगी बेजती करण आळो अर यीसू मसी पर बिस्वास करण आळा नै दुख देण आळो अर लोगां नै नुक्सान करण आळो हो पण यीसू मसी मेरै पर आपगी दया करी है। क्यूंकै मैं बि टेम यीसू मसी पर बिस्वास कोनी करै हो। ईंखातर ओ कोनी जाणै हो कै मैं के करण लागरयो हूं?
14 अर प्रभु आपगी किरपा मनै भरपूरी ऊं दी कै मैं बि पर बिस्वास करूं अर दूसरा ऊं प्रेम करूं। क्यूंकै यीसू मसी गै सागै मेरो मजबूत रिस्तो है।
15 आ बात सच्च है अर हर कीं नै मानण गै लाइक है कै यीसू मसी ईं संसार में पापियां गो उद्धार करण गै खातर आयो है। फेर मैं तो सारा पापियां ऊं बड़ो पापी हूं।
16 पण मैं सारा पापियां ऊं जादा पाप करया है फेर बी परमेसर मेरै पर दया दिखाई कै लोगां नै ठा लागै कै बो बानै बिंया ई माफ करेगो जिंया बण मनै माफ करयो है। अर लोग बि पर बिस्वास कर सकै अर अनन्त जीवन ले सकै।
17 झिको सदां गै खातर राज करण आळो राजा है। बि परमेसर गी जुग जुगान्तर तांई आदर अर स्तुति होंती रेवै। आमीन।
18 हे मेरा बेटा तीमुथियुस, परमेसर गी बात बताण आळा गै बचनां गै अनुसार भोत पेला ऊं ई तेरै बारै में झिकी परमेसर गी बातां करी है, मैं थानै आ आग्या देऊं हूं, जिंया एक फौजी युद्ध में जीतण खातर आच्छी लड़ाई लड़ै है बिंया ई तूं पूरी ताकत गै सागै गळत सिक्सा गै बिरोध में लड़ाई लड़।
19 यीसू मसी गै बिस्वास में सदा ई बणयो रे अर बो ईं कर झिको सई है। पण कई लोग सच्चाई नै मानै कोनी अर बांगो बिस्वास डूबगे नास होण आळै जहाज गी तरियां हो जावै है।
20 हुमिनयुस अर सिकन्दर आपगै बिस्वास नै नास कर दियो है। मैं आनै बिस्वासी मण्डली ऊं न्यारा राखूं कै बे परमेसर गी निन्दा करणी छोड़ सकै।