गेर यहुदियां में पौलुस गी सेवा
3
1 ईंखातर मैं पौलुस झिको गेर यहुदियां गी भालाई खातर यीसू मसी गै कारण केदी बणयो।
2 थारी भलाई खातर परमेसर आपगी किरपा गै सागै ओ काम मनै दियो है, इंगै बारे में थे जरूर सुणयो हो।
3 कै बण लुकेड़ी बातां परमेसर गै दरसण गै रूप में मेरै पर परगट करी, जिंया मैं थानै पेला इंगो सार लिख चुक्यो हूं।
4 जे थे ओ खत पढस्यो तो थानै मसी गी ई लुकेड़ी बात गै बारे में पतो लागेगो।
5 परमेसर आ लुकेड़ी बात आपगी पेला आळी पीढी गै लोगा नै कोनी बतायी पण अब आपगी आत्मा ऊं आ बात बांगै पवितर खास चेला अर परमेसर गी बात बताण आळा नै बतायी है।
6 आ बात आ है कै, यीसू मसी गै सुब समाचार गै द्वारा गेर यहुदी लोग यहुदी लोग सागै वारिस बणग्या। ऐ दोनूं एक ई सरीर गो अंग है अर मसी यीसू में झिको वायदो दियो है बिमै भागिदार है।
7 अर मैं परमेसर गी किरपा गै बि दान गै अनुसार झिको ताकत गै प्रभाव गै कारण मनै दियो, बि सुब समाचार गो सेवक बणग्यो।
8 मैं झिको परमेसर गै सारा पवितर लोगा ऊं एकदम छोटो हो फेर बी मनै गेर यहुदियां नै मसी गै कदी खत्म ना होण आळै धन गो सुब समाचार परचार करण खातर परमेसर आ किरपा करी।
9 कै मैं सारै लोगां खातर परमेसर गी बि लुकेड़ी बाता नै आच्छी तरियां बताऊं झिकी सारा कीं बणाण आळो परमेसर गै रचना गै सरू ऊं लेगे आज तांई लुकेड़ी ही।
10 जिऊं अब बिस्वासी मण्डली गै द्वारा परमेसर गो केई तरियां गो ग्यान बा प्रधानां अर अधिकारियां झिका सुरग में है बा पर दिखायो जावै।
11 परमेसर बि अनन्त काल ऊं झिकी योजना आपगै मन में बणा राखी बा आपणै प्रभु यीसू गै द्वारा पूरी करी।
12 म्हे ईं मसी में बिस्वास करा हा, ईं कारण पूरै भरोसै गै सागै बिना डर गै परमेसर गै नेडै़ आण गो अधिकार है।
13 अर ईंखातर मैं बिनती करूं कै झिको क्ळेस थारै खातर मनै होवै है बांगै कारण हिम्मत ना छोड़ो, क्यूंकै बिमै थारी बडाई है।
मसी गो प्रेम
14 मैं ईंखातर बि पिता परमेसर गै सामै गोढा टेकूं।
15 झिकेऊं सुरग अर धरती पर हरेक घराणै गो नाम राखिजै है कै,
16 मैं बिनती करूं हूं कै, बो आपगी बडाई गै धन गै अनुसार थानै दान दय कै थे बिंगी आत्मा ऊं आपगै मन गै मां सामरथ लेगे बलवन्त होज्यो।
17 अर बिस्वास गै द्वारा मसी थारै मन में बसे है। थे प्रेम में नीम राखगे अर जड़ पकडगे,
18 सारै पवितर लोगा सागै भली भांती समझण गी सकती पावो कै बिंगै प्रेम गी चोडाई, लम्बाई अर ऊंचाई अर गेहराई किती है।
19 अर मसी गै बि प्रेम नै जाण सको झिकै गै ग्यान गो कोई अंत कोनी है। कै थे परमेसर गी सारी भरपूरी तांई परिपूर्ण होज्यो।
20 अब झिको हिस्यो सामरथी है कै आपणी बिनती अर समझ ऊं भोत जादा काम करै है बि सामरथ ऊं झिकी आपणै में काम करै।
21 बिस्वासी मण्डली में अर यीसू मसी में बिंगी बड़ाई पीढी ऊं पीढी तांई जुग जुग होणती रेवै। आमीन।