यीसू मसी में नुओ जीवन गै बारे में
2
1 पेला थे लोग परमेसर गी आग्या नै ना मानण अर पाप करण खातर परमेसर गी संगती ऊं दूर हा।
2 बि टेम थे सैतान गी बात मानगे ईं संसार गै बुरे रा पर चाल्या। बण ईं संसार नै अधीन कर रखयो अर बिंगी आत्मा अब झिका लोग परमेसर गी आग्या नै कोनी मानै बा लोगां में काम करण लागरी है।
3 आमै पेला आपां बी सारा बे लोग जिंया आपगै बुरे इच्छा गै अनुसार जीया हा। आपणो मन अर सरीर के चावै इंया ई जीया। ईंखातर परमेसर गी सजा गै काबिल बणग्या।
4-5 पण परमेसर दया करण आळा है। आपां पाप गै कारण मरेडा जियां हा पण परमेसर आपां नै प्रेम करयो अर यीसू मसी गै सागै जींवतो करया। बांगी किरपा गै द्वारा थानै पाप गी सजा ऊं मुकती मिली है।
6 परमेसर यीसू मसी में आपां नै जींवता करया अर बिंगै सागै सुरग में बैठण गो मोको बी दियो।
7 बण इंया ईंखातर करयो कै यीसू मसी में आपगी अणगिणत किरपा नै आण आळा जुग में दिखा सकै।
8 क्यूंकै परमेसर गी किरपा गै द्वारा थारै बिस्वास गै कारण थानै मुकती मिलै। ओ परमेसर गो वरदान है पण थारै कानी ऊं कोनी।
9 ओ सारो आपणै करम गो फल कोनी है, इंया ना होवै कै आपां कीं बात पर घमण्ड कर सकै।
10 परमेसर आपां नै बणाया है। बण यीसू मसी गै द्वारा आपां नै बणाया है झिका ऊं आपां भला काम करता रेवां अर बि रा पर ईं चालता रेवां झिको रा परमेसर आपणै खातर बणायो है।
मसी में एक
11 परमेसर थानै किंया मुकती दिया इंगै बारै में थे आच्छी तरियां याद राखणो चईयै। थे जन्म ऊं गेर यहुदी हा, अर झिका लोग खतना किंया हा, बा थानै बिना खतनो करेड़ा लोग समझा। बे लोग आपगै सरीर में खतना करेडा, पण मन में कीं साफ कोनी।
12 बि टेम थानै यीसू मसी गै बारे में पतो कोनी। इसराएल लोगा गो पीढी में सामिल बी कोनी अर परमेसर गै वायदे गा भागिदार कोनी हा अर थे बिना आस गै सागै ईं संसार में बिना परमेसर गै सागै जीया हा।
13 थे यीसू मसी ऊं भोत दूर रेया हा। पण बण आपगो जीवन थारै खातर दियो अर थानै परमेसर कनै ले आयो।
14 यीसू मसी आपगो जीवन बलिदान कर'गे यहुदी लोगा अर गेर यहुदी लोगां बिचाळै सांती दी अर दोना गै बिचाळै नफरत गी कंद नै तोड़ दी।
15 अर आपगी मोत गै द्वारा पुराणै नेम विधान नै रद्ध कर दियो। ईं तरियां बण यहुदी अर गेर यहुदी लोगा नै एक सागै मेल मिलाप करा दियो अर एक नुए मिनखा गी रचना करी अर सांती बी दे दी।
16 अर करूस पर आपगी मोत गै द्वारा दोना बिचाळै बांदेड़ै बैर नै दूर कर दियो। बण आपणै अर परमेसर गै बिचाळै सांती बी देण गी मदद करी।
17 यीसू मसी गेर यहुदी लोग झिका परमेसर ऊं दूर हा अर यहुदी लोग झिका परमेसर गै भोत नेडै़ हा दोनां में सांती गो परचार करण आयो।
18 यीसू मसी गै द्वारा आपां सारा एक ई आत्मा ऊं पिता परमेसर कनै पूग सका हा।
19 ईंखातर थे गेर यहुदी लोग अब अणजाण अर बारले देसां गा कोनी। पण पवितर लोगां गै संगी देस अर परमेसर गा परिवार गा लोग बणग्या।
20 थे सारा एक मकान बरगा है झिका खास चेला अर परमेसर गी बात बोलणाळा गी नीम में खड़या है अर यीसू मसी खुद'ई मकान गै खास पथर बरगो है।
21-22 बिमै पूरो मकान खड़यो रेवै है ईंखातर मकान मजबूत है। प्रभु में एक पवितर मिन्दर बणतो जावै है झिकै में थे बी आत्मा गै द्वारा परमेसर गी रेण आळी जिग्या होण खातर एक सागै बणाया गेया हो।