इफिसुस सैहर गै मसी लोगा गै नाम
यीसू मसी गै खास चेलै पौलुस गो खत
पौलुस गी ओर ऊं निमस्कार
1
1 मैं पौलुस, परमेसर गी इच्छा ऊं यीसू मसी गो खास चेलो बण्यो हूं। मैं ओ खत इफिसुस में रेण आळा सारा परमेसर गै पवितर लोगां खातर लिखण लागरयो हूं झिका यीसू मसी पर बिस्वास राखै।
2 थानै सारा नै आपणै पिता परमेसर अर प्रभु यीसू मसी गी ओर ऊं किरपा अर सांती मिलती रेवै।
मसी में आत्मिक आसिस
3 आपणै प्रभु यीसू मसी गै पिता परमेसर गो धन्यवाद होवै कै बण सुरग गी हरेक तरियां गी आत्मिक आसिस ऊं आपां नै मसी गै द्वारा आसिस दी है।
4 संसार बणाण ऊं पेला परमेसर आपां नै मसी गै द्वारा बांगै लोगां गी तरियां चुण लिया कै आपां बिंगी नजर में पवितर अर निरदोस बण जावां।
5 परमेसर आपगै प्रेम ऊं आपां नै यीसू मसी गै द्वारा आपगा बेटा बेटी कर'गे मान लिया। बा आपगी खुसी ऊं इंया करयो है।
6 बा इंया ईंखातर करयो कै बांगी किरपा गी मेमा गी बडाई होवै, झिका नै बा आपगै लाडलै बेटै यीसू मसी में आपां नै सेंत मेंत कर दिया।
7 यीसू मसी गै बलिदान गै द्वारा आपां नै छुटकारो या पापां ऊं माफी मिली है। ओ काम बांगी मोटी किरपा ऊं होयो है।
8 परमेसर आपगो ग्यान अर समझ गै सागै आपां नै आपगी किरपा भोत जादा दी है।
9 यीसू मसी गै द्वारा परमेसर आपां नै आपगी लुकेड़ी इच्छा नै सारा गै सामै परगट करी झिकी बा पेला ई तैयार कर राखी ही।
10 अर परमेसर गी लुकेड़ी इच्छा आ है कै बे आपगी योजना गै टेम में झिको कीं सुरग अर धरती में है बिनै सारै नै यीसू मसी गै अधीन करसी।
11 आपां मसी में रळग्या ईंखातर आपां परमेसर गा वारिस बणग्या क्यूंकै बा यीसू मसी गै द्वारा आपां नै भोत पेला ई चुण लिया हा। परमेसर हरेक बात आपगी इच्छा ऊं ईंखातर करी,
12 क्यूंकै म्हे यहुदी लोग झिका पेला ई यीसू मसी पर बिस्वास करयो हो कै बे बानै आदर मान दे सकै।
13 थे लोगां, बि साच गै बचन अर आपगी मुकती गै सुब समाचार नै सुणण गै बाद मसी पर बिस्वास करयो अर जद थारै पर बि पवितर आत्मा गी छाप लागी झिकी गो वायदो करेड़ो हो।
14 बा पवितर आत्मा परमेसर गै मोल लेयड़ा लोगां गै छुटकारै खातर वारिस होण गो सबूत है कै बांगी मेमा गी स्तुति होवै।
पौलुस गी पराथना
15 ईं कारण, प्रभु यीसू गै उपर थारो बिस्वास अर परमेसर गै लोगां सागै थारै प्रेम गी बात सुणगे,
16 मैं मेरी पराथना गै टेम में थानै याद कर'गे धन्यवाद देणो कदी बंद कोनी करयो।
17 आपणै प्रभु यीसू मसी गो परमेसर झिको मेमा गो पिता है, थानै आपगी पिछाण में ग्यान अर दरसण गी आत्मा दे सकै कै थे सारा परमेसर गै ग्यान में आगै बधता जावो।
18 मेरी पराथना आ'ई है कै थारै मन गी आंखयां खुल जावै अर परमेसर गी जोती नै देख सको कै थानै पतो लाग जावै कै आ आस के है झिकै खातर थानै बा बुलाया है। अर झिको वारिस बा आपगै लोगां नै देवैगो बो कितो अद्भुद अर म्हान है।
19 परमेसर गी मोटी ताकत झिकी पर बिस्वास करां हा इंगै बारे में थानै पतो होणो चईयै। ईंखातर मैं पराथना करूं कै बा ताकत आपणै खातर जोरदार तरिका ऊं काम करै।
20 जद परमेसर मसी में बा ताकत दिखाई तो बा यीसू मसी नै मरेड़ा मूं जींवतो करयो अर सुरग में आपगै दायै पासै बिठायो।
21 बठै मसी सारै सासकां, अधिकारियां अर केई चीजा गै उपर राज करै अर ईं जुग में अर आण आळा जुग में बी बे राज करसी।
22 परमेसर यीसू मसी गै पगां नीचे सारो कीं कर दियो। अर बानै सारै कीं पर अधिकार बणागे बिस्वासी मण्डली गो अगुओ बणा दियो।
23 ईंखातर मसी सिस बरगो है अर बिस्वासी मण्डली मसी गी देह बरगी है। बिस्वासी मण्डली मसी ऊं भरपूर होवै अर मसी परमेसर ऊं भरपूर होवै।