आपणो सुरगीय घर
5
1 क्यूंकै आपां नै ठा है कै आपणी आ संसार गी देह एक दिन खत्म हो'ज्यगी अर बाद में आपां नै परमेसर गी बणायेड़ी एक देह मिलैगी झिकी आदमी गी बणायेड़ी कोनी हो'सी पण बा अमर देह हो'सी।
2 ईं देह में तो आपां दुख पावां अर बी अमर देह नै पाण खातर काळ करता रेवां
3 आपां नै बा अमर देह जरूर मिलैगी। आपां सिरफ बिना देह गी आत्मा कोनी होस्या।
4 ईं देह में तो आपां भोत दुख पावां अर मरणो बी कोनी चावां कै ईं देह नै छोड़ दयां पण आपां बि अमर सरीर नै पाणो चावां झिको खत्म होण आळी देह नै निगळ ल्य।
5 झिकै आपां नै ईं योजना खातर तैयार करयो है बो परमेसर है। बण ई आपां नै पवितर आत्मा बयाना में दी है।
6 ईंखातर आपां सदा परमेसर पर भरोसो राखां। आपां जाणा है कै जद तांई आपां ईं देह में हा जद तांई आपां प्रभु ऊं दूर हा।
7 क्यूंकै आपां रूप पर कोनी पण बिस्वास पर चाला हा।
8 ईंखातर आपां भोत हिम्मत राखा कै ईं देह नै छोड़गे प्रभु कनै उड़ज्या।
9 ईं कारण आपणै मन में आई इच्छा रेवै कै चायै आपां बिंगै कनै हा या दूर बस बिनै ई आच्छा लागता रेवां।
10 क्यूंकै जरूरी है कै आपां सारा मसी गै न्याय गै कनै आजा। आपां सारा नै एक दिन आपणै जीवन गो लेखो जोखो देणो हो'सी।
मसी में नुई बणावट
11 ईंखातर आपां जाणा कै प्रभु ऊं क्यूं डरणो चईयै। आपां आई बात लोगा नै समझावा। कै आपणै अर परमेसर गै बिचाळै कोई पड़दो कोनी है, थे म्हानै आच्छी तरियां जाणो।
12 इंया केगे म्हे थारूं बडाई कोनी चावा कै थे म्हारै पर घमण्ड कर सको अर थे बानै जबाब दे सको झिका दिल गी मायली बाता गी बजाए दिखावटी बाता पर मन लगावै है।
13 जे म्हे हिमती हा तो परमेसर खातर हा। अर जे सियाणा हा तो थारै खातर हा।
14 मसी गो प्रेम आपां नै बेबस कर दय है अर आपां ईं बात नै जाणा हा कै यीसू सारां खातर मर ग्यो है। ईंखातर आपां बी आपणै पुराणै जीवन खातर मर चुकया हा।
15 अर यीसू ईंखातर मरयो कै झिका लोग जीमता है बे आपगै आगै गै जीवन खातर ना जीवै पण मेरै खातर जीवै झिको बा लोगा खातर मरगे पाछो जीमतो हो'ग्यो हो।
16 ईंखातर आज ऊं आपां किनैई संसार गी देह ऊं कोनी जाणागा। हालाकी आपां यीसू नै बी देह गै रूप में जाण्यो, पण अब आपां इंया कोनी जाणागा।
17 ईंखातर जे कोई मसी में है तो बो एक नुई बणावट है। बिंगो पुराणो जीवन खत्म हो'ग्यो अर नुओ जीवन सरू हो'ग्यो है।
18 ओ सारो कीं परमेसर ई करयो है झिकै मसी गै द्वारा म्हानै आप में मिला लिया है अर बाई ओ काम म्हानै सुंपयो है कै दूसरै लोगा गो मिलाप परमेसर ऊं करा सका।
19 परमेसर मसी गै द्वारा म्हारै सागै संसार गो मेल मिलाप करयो है अर लोगां गै गुनावा गो दोस बा पर कोनी लगायो। अर बण ई मिलाप गो संदेस लोगा नै सुणाण गो काम म्हानै सूंप्यो है।
20 ईंखातर ई म्हे मसी गा राजदूत हा, अर ओ ई सई टेम है कै म्हे यीसू गी ओर ऊं बोलण लागरया कै थे परमेसर सागै आच्छो रिस्तो बणा ल्यो।
21 झिको दोसी कोनी बिनै परमेसर आपणै पापा खातर दोसी बणायो कै बिंगै द्वारा आपां परमेसर गी सच्चाई बण ज्या।