पौलुस गी सेवकाइ गो सार
6
1 ईंखातर म्हे थारूं ओ ई निवेदन करां कै आपां सारां परमेसर गो काम करण आळा हा। ईंखातर थे परमेसर गी किरपा नै बेकार ना जाण दयो।
2 परमेसर केयो कै,
“मैं थारी सई टेम पर पुकार सुणी
अर मुकती गै दिन थारी मदद करी।”
ईंखातर मैं थानै केऊं अबी सई अर मुकती गो टेम है।
पौलुस गी कठिनाई
3 आपां हिस्यो जीवन जीण लागरया हा झिकै में दूसरा खातर कीं दोस कोनी। अर दूसरा नै आपणी सेवा में कोई खोट ना दिखै।
4-5 आपां दुख, घटी, संकट, कोड़ां गी मार, जेळ अर क्ळेस में बी धीरज धार राखयो है अर कठोर काम, जागता रेणो, भूखा मरता गी हालत में ई आपां ओ दिखावां कै म्हे परमेसर गा सच्चा दास हा।
6-7 आपणो ओ ई फरज है कै आपां पवितरता में, ग्यान में, धीरज में, किरपा में, पवितर आत्मा में, प्रेम में, सच्चाई गै संदेस में अर परमेसर गी सकती में मजबूत रेवां अर दोनां हातां में धारमिकता गा हथियार लेगे हमेसा लड़ता रेवां।
8 आपां आदर अर अपमान, बडाई अर निंदा में कपटी दिखां पण हिस्या हा कोनी।
9 आपां अणजाण दिखां पण हा कोनी, मरेड़ा गी तरियां लागां पण जींवता हा। मार खाणाळा गी तरियां हा पण जान ऊं कोनी मारिज्या।
10 दुखी दिखां पण सदां आनंद में रेवा, देखण में गरीब लागा पण दूसरा नै अमीर बणा देया, आपणै कनै देखण में कीं कोनी लागै पण आपणै कनै सारो कीं है।
11 ईंखातर, हे भाईयो अर भेनों, म्हे थानै सारी बात इमानदारी ऊं दिल खोल गै केई है।
12 थारै खातर म्हारै मन में कोई संका कोनी है पण थे ईं म्हारूं प्रेम करणो कम कर दियो है।
13 म्हे थानै आपगा बच्चा जाण गै थारूं बात चीत करी है। थे बी म्हानै पूरै मन ऊं प्रेम करो।
14 झिका लोग मसी पर बिस्वास ना करै है थे बांगी संगती ना करो। क्यूंकै धारमिकता अर अधर्म गो मेळ कोनी होवै अर ना'ई चानणै अर अंधेरे गो मेळ होवै।
15 जिंया मसी अर सैतान दोनूं साथी कोनी बण सकै बियां ई बिस्वासी अर अबिस्वासी दोनूं साथी कोनी हो सकै।
16 इंया ई परमेसर गै मिन्दर में मूरती गो मेळ कोनी हो सकै क्यूंकै आपां खुद'ई बिंगा जींवता मिन्दर हा। जिंया परमेसर केवै है,
“मैं बामै वास करूंगा,
अर बांगै बिचाळै चालू फिरूंगा।
मैं बांगो परमेसर होऊंगा
अर बे मेरा लोग होवैगा।”
17 ईंखातर प्रभु केयो है,
“आंगै माऊं निकळगे
न्यारा रेवो
अर माड़ी चिजां गै हात ना लगावोगा
तो मैं थानै आपगा जाणूंगा।”
18 अर
मैं थारो पिता कुहाऊंगा
अर थे मेरा बेटा बेटी होवोगा।