मिट्टी गै भांडा में धन
4
1 ईंखातर जद म्हारै पर परमेसर गी हिसी दया होई कै म्हानै आ सेवा मिली तो म्हे हार कोनी माना।
2 पण म्हे लज्जा गै कामा नै छोड दिया अर ना'ई कपट करां अर ना परमेसर गै बचन में आप कनूं कीं जोडा। म्हे सारां गै सामणै साच गो परचार करां जिऊं परमेसर गै सामणै हरेक मिनख गै मन में आपगी भलाई बिठावां हा।
3 जे म्हारो ओ सुब समाचार लुकेड़ो पड़यो है तो ओ नास होण आळै मारग पर चालण आळै लोगां खातर है।
4 अर बा बिस्वास ना करण आळा खातर झिका गी बुद्धी ईं दुनिया गै सैतान बंद कर राखी है। जिऊं बे मसी झिको परमेसर गो सरूप है बिनै ना पेहचाण सकै अर ना'ई बिंगै ग्यान ऊं भरेड़ै सुब समाचार गो प्रकास बा पर चमक सकै।
5 क्यूंकै म्हे थानै म्हारो कोनी पण यीसू मसी गो संदेस सुणावा कै बो प्रभु है। म्हे म्हारै बारे में तो ओ ईं केवां कै म्हे यीसू मसी गै ईं कारण ईं थारा दास हा।
6 ईंखातर परमेसर ईं है झिकै केयो, “अंधेरे में चानणो होज्यै,” बांई ईं चानणै नै म्हारै दिला में चमकायो जिऊं म्हे प्रभु यीसू में परमेसर गी मेमा देख सकां।
7 पण ओ गुण गो धन म्हारै बरगा माटी गै भांडा में रेखैडो है अर आ अलोकिक सकती म्हारी कोनी पण परमेसर गी है।
8 म्हे हमेसा संकटा ऊं घिरेड़ा रेवां पण म्हे कदी हार कोनी मानी। म्हे परेसान तो दिखा पण कदी निरास कोनी होवां।
9 म्हानै लोग सतावे तो भोत है। पण छोड़ कोनी पावै। म्हानै लोग मारै तो है पण म्हे मरां कोनी।
10 जिंया यीसू मरयो बि तरियां ई हरेक टेम म्हे बी मरण गै खतरे में रेवां। जिऊं यीसू झिको मरगे पाछो जीग्यो बो सभाव म्हारी बी देह में चमकतो रेवै।
11 म्हे हमेसा जीमतै जी यीसू गी बजह ऊं मोत गै हवाले करीजा जिऊं यीसू गो जीवन म्हारी मरण आळी देह में प्रकट होज्यै।
12 ईंखातर म्हे तो हमेसा मोत गो सामणो करता रेवां पण थानै आत्मा में फायदो मिलै।
13 ईंखातर कै म्हारै में बाई बिस्वास गी आत्मा है झिकी गै बारे में पवितर सासतर में लिखेड़ो है कै, “मैं बिस्वास करयो, ईंखातर मैं केयो। ईं कारण म्हे बी बिस्वास करां अर थारै सामै बोला।”
14 क्यूंकै म्हे जाणा हा कै झिकै परमेसर यीसू नै दुसर जीमतो करयो बो एक दिन म्हानै बी जींवता करेगो। अर बो थारै सागै म्हानै बी आपगै सामै खड़या करेगो।
15 ऐ सारी बातां थारै फायदै गी है। जिंया जियां परमेसर गी किरपा जादा लोगां तांई पोंचैगी बियां ई जादा परमेसर गी मेमा गो धन्यवाद बढतो जावैगो।
16 ईंखातर म्हे कदी हिम्मत कोनी हारा। चायै म्हारो सरीर कमजोर होणतो रेवै पण फेर ई म्हारो मायलो सरीर दिन रात चौ गुणो बधै।
17 क्यूंकै म्हारो पल बरगो दुख म्हारै खातर भोत जरूरी है। ओ दुख अनंत जीवन गी मेमा पैदा करतो रेवै।
18 क्यूंकै म्हे दिखण आळी चिजां पर ध्यान कोनी देवां पण ना दिखण आळी चिजां पर म्हारो ध्यान टिक्यो रेवै। क्यूंकै देखेड़ी चिजां पल बरगी है पण अणदेखी चिजां हमेसा खातर है।