3
1 म्हे आपगी बड़ाई करणी सुरू कोनी करी। म्हानै दूसरै लोगां गी तरियां सिफारिस गो खत थारै कनै कोनी ल्याणो या थारै मूं।
2 म्हारै मन पर लिखेड़ो खत तो थे ई हो। सारा लोग बिनै पेहचाणे अर पढै है।
3 ओ दिखण लागरयो है कै थे यीसू मसी गा खत हो, झिका ना तो स्याई ऊं अर ना'ई पथर गी पटिया पर लिखेड़ा हो पण ऐ तो परमेसर गी आत्मा ऊं दिल गी मांस रूपी पटिया पर लिखेड़ा है।
4 मसी गा होगे म्हे परमेसर पर हिस्यो ई भरोसो करां।
5 म्हे अपणै आपनै ईं लायक कोनी समझा पण म्हारी काबलियत गी जड़ तो परमेसर ई है।
6 बण ई म्हानै नुई वाचा गा सेवक होण गै लायक बणाया है म्हे सब्दा गा सेवक कोनी पण पवितर आत्मा गा हा क्यूंकै सब्द तो मारै पण आत्मा जिन्दा करै।
नुए वायदे गा सेवक
7-8 पण बा वाचा झिकी मोत ऊं भरेड़ी ही मतलब नेम विधान झिको पथर पर लिखेड़ो हो बो इतो तेज चमकै है कै इसराएल गा लोग मूसा गै चमकते मूं पर एक पलक ई कोनी देख सक्या तो आत्मा गी वाचा इऊं ओर जादा तेज हो'सी।
9 क्यूंकै जद दोसी ठेरण आळी वाचा इती तेज चमकेगी तो निरदोस ठेरण आळी वाचा इऊं बी भोत बोळो जरूर हो'सी।
10 अर जे नुई वाचा गै तेज प्रकास गो मेळ पुराणी वाचा सागै करा तो पुराणी वाचा बिंगै आ'गे ठेरै गी कोनी।
11 क्यूंकै जद पुराणी वाचा गी चमक कम होवंती जावैगी तो जद झिको स्थिर रेण आळी नुई वाचा है बिंगी चमक ओर जादा होवंती जावैगी।
12 ईंखातर म्हे हिसी आसा राखगे हिम्मत ऊं बोला हा।
13 म्हे मूसा गी तरियां कोनी झिकै आपगो चेहरो कपड़ै ऊं ढक लियो जिऊं इसराएल गा लोग बी कम होवंतै प्रकास नै खत्म होवंता ना देख सकै।
14 पण इसराएली लोगा गी बुद्धी खराब होगी क्यूंकै आज बी जद पुराणो बिचार पढगे सुणायो जावै तो बो ई पड़दो लागग्यो रेवै। बि पड़दे नै यीसू मसी ई हटा सकै।
15 अजे तांई जद कदी बी मूसा गी किताब पढी जावै तो बांगै मना पर पड़दो पड़यो रेवै।
16 पण जद कदी बांगो मन प्रभु पर लागै गो तो बो पड़दो खत्म होज्येगो।
17 क्यूंकै प्रभु तो आत्मा है अर जठै बी प्रभु गी आत्मा है बठै आजादी है।
18 ईंखातर जद आपणै सारा गै उघाड़े चेहरे पर प्रभु गो प्रकास सीसै गी तरियां चमकै तो प्रभु गी आत्मा ऊं आपां होळै होळै बी प्रकास में बदळता जावा।