2
1 मैं फैसलो कर चुक्यो कै फेर मेरै आण पर थानै उदास ना करूं।
2 क्यूंकै थे मनै खुस राखण आळा हो। ईंखातर मैं थानै उदास कोनी करणो चाऊं।
3 मैं थानै ऐ बातां ईंखातर लिख्यो कै कठैई मेरै आण ऊं झिका नै खुसी होणी चईयै, मैं बामै दुख ना देखूं। मनै थारै पर पूरो भरोसो है कै मेरी खुसी में ई थारी खुसी है।
4 मैं भोत मोटै दुख में हूं अर रो रोगे थानै ओ खत लिखयो हूं। मैं ओ कोनी चाऊं कै थानै इऊं दुख मिलै। पण मैं ओ चाऊं कै थे मेरै बी प्रेम नै जाण सको झिको मैं थारो करूं।
दोसी लोगां नै माफ करणो
5 जे थारै मूं कणी मनै निरास करयो है तो इऊं सिरफ मैं एकलो कोनी होयो पण थे सारा बी होया हो।
6 हिस्यै लोगा नै थे बिस्वासी लोगां सजा दियै है। अर आ खातर इती ई सजा भोत है।
7 पण बि खातर आच्छो ओ ई है कै इंगै दोस नै माफ करयो जावै अर बिनै होसलो देणो चईयै जिऊं हिस्यो मिनख ओर जादा निरास में डूब ज्यावै।
8 ईंखातर मेरी थारूं आ'ई बिनती है कै बिनै आपगै प्रेम गो सबूत दयो।
9 क्यूंकै मैं थानै ऐ बातां ईंखातर लिखी है कै थानै मैं परख ल्यूं कै थे ऐ मेरी सारी बाता नै मानो या कोनी मानो।
10 झिकै नै थे माफ करो बिनै मैं बी माफ करूं हूं, क्यूंकै झिको कीं माफ मैं करयो है बो थारी बजह हूं अर थारै खातर मसी गी जिग्या में होगे करयो है।
11 जिऊं सैतान आपां नै धोखो ना दे सकै। क्यूंकै बिंगी चतुराई नै आपां अणजाण कोनी।
त्रोवास में पौलुस गी उदासी
12-13 अर मैं मसी गो सुब समाचार सुणाण खातर तरोवोस में आयो तो प्रभु मेरै खातर एक नुओ दरवाजो खोल्यो है। पण मेरो मन उदास हो क्यूंकै मैं मेरै भाई तीतुस ऊं कोनी मिल सक्यो। ईंखातर मैं बठूं मकिदुनिया कानी चाल पड़यो।
मसी में जीत
14 पण परमेसर गी बड़ाई होवै झिको मसी गै बिस्वास में आपां नै जीत गै जुलुस माखर लेगे चालै अर मसी गै ग्यान गी सुरम आपणै द्वारा सारी जिग्यां फेलावै।
15 क्यूंकै म्हे परमेसर गै सामणै मुकती पाण आळा अर ना पाण आळा दोनो तरियां गै लोगां खातर यीसू गी सुरम हा।
16 केईयां खातर मोत गी बांस अर केईयां खातर जीवन गी सुरम हा। इती मोटी जिमेदारी कोई कोनी ले सकै।
17 क्यूंकै आपां बा लोगां गी तरियां कोनी झिका परमेसर गै बचन नै आपगै कनूं बडा चडागे बतावै पण म्हे मन गी सच्चाई ऊं अर परमेसर नै आपगै कनै हाजिर मानगे मसी गै बिस्वास में बोला।