कुरुन्थी सैहर गै मसी लोगा गै नाम
यीसू मसी गै खास चेलै पौलुस गो दूसरो खत
पौलुस अर तीमुथियुस गी ओर ऊं निमस्कार
1
1 मैं पौलुस ओ खत म्हारै भाई तीमुथियुस गै सागै कुरुन्थी में रेण आळै बिस्वासियां खातर अर अखाया प्रदेस में रेण आळै सारै पवितर लोगां गै खातर बी लिखण लागरयो हूं। मनै परमेसर आपगी इच्छा गै अनुसार यीसू मसी गो खास चेलो कर'गे बुलायो है।
2 आपणो पिता परमेसर अर प्रभु यीसू मसी गी ओर ऊं किरपा अर सांती थानै मिलती रेवै।
पौलुस द्वारा परमेसर गो धन्यवाद
3 आपणो प्रभु यीसू मसी गो परमेसर, अर पिता नै धन्यवाद हो, झिको दया गो पिता अर सारी तरियां गी सांती देण आळो परमेसर है।
4 परमेसर आपां नै म्हारी हर एक परेसानी में सांती देवै है क्यूंकै बा सांती झिकी परमेसर देवै है बिऊं आपां बानै बी सांती दे सका झिकी हर एक तरियां गी परेसानी में होवै है।
5 क्यूंकै जियां मसी पर बिस्वास करण ऊं म्हानै बोळो दुख होवै है बिंया ईं मसी गै द्वारा म्हानै सांती बी मिलै है।
6 जे म्हे दुख पावां तो बो थारी सांती अर मुकती खातर है अर जे म्हे सांती पावां तो बा थारी सांती खातर ई है। बि सांती ऊं थे धीरज गै सागै बि दुख नै सेह लेवो है झिको म्हे बी सेह लेवा हा।
7 थारै पर म्हानै पूरो भरोसो है क्यूंकै म्हे जाणा हा कै जिंया थे म्हारै दुख में सामिल हो बिंया ई म्हारी सांती में बी सामिल हो।
8 हे भाईयो अर भेनों, झिको दुख म्हे आसिया में सेयो बिंगै बारै में थानै जानणो चईयै। म्हारै उपर भोत दुख आयो झिको सेणो भोत मुसकिल हो। म्हे इंया ईं सोच्यो कै म्हे जिन्दा कोनी बच सकांगा।
9 म्हे इंया सोचण लागग्या कै म्हे मरण खातर जावां हा। ईंखातर म्हे म्हारै उपर कोनी पण परमेसर झिको मरण आळा नै जीमता करै है बि पर भरोसो राखणो चईयै।
10 बण ई परमेसर म्हानै मोत ऊं बचा लियो अर बचाण लागरयो है। म्हारो भरोसो बि पर है झिको म्हानै आण आळै दिना में बी बचा गै राखैगो।
11 थे लोग बिनती गै सागै म्हारी मदद करो कै थारै बिनती करण ऊं झिको वरदान म्हानै मिल्यो है, बि कारण भोतसा लोग परमेसर गो धन्यवाद दे सकै।
पौलुस गी यातरा में फेर बदळ
12 म्हारो मन साफ है ईंखातर म्हे भोत खुस होवां हा। ईं दुनिया में अर खास कर'गे थारै बिचाळै में म्हारो चाल चलन पवितर अर सच्चाई गै सागै हो। बो दुनिया ऊं मिलण आळो ग्यान कोनी पण परमेसर गी मदद ऊं हो।
13-14 म्हे थानै केवल ओ ई लिख्यो है कै झिको थे पड़ो है अर समझै है, अर म्हानै आसा है कै ऐ बात थे आखर तांई बी मानैगा। जिंया म्हे थारै खातर खुसी गा कारण होवै इंया ईं थे बी म्हारै खातर प्रभु यीसू गै दुसर आण गै टेम खुसी गा कारण होवैगा।
15 अर ईं भरोसै ऊं मैं चाऊं हो कै मैं पेला थारै कनै आऊं अर थानै ओर एक दान मिलै।
16 अर मैं इंया सोच्यो कै थारै कनूं मकिदुनिया जाऊं अर फेर थारै कनै पाछो आऊं। बि टेम थे मेरी यहुदियां जाण नै मदद करो।
17 थे इंया सोचै है कै मैं ऐ जल्दबाजी करी है, ईंखातर मैं एक पक्को आदमी कोनी हूं। अर थे इंया सोचो है कै मैं एक बिना भरोसै गो हूं।
18 पण ऐ बात इंया कोनी, जिंया परमेसर भरोसा योग्य है बिंया ई थानै बताएड़ी म्हारी बात बी सच्च है।
19 क्यूंकै परमेसर गै बेटै यीसू मसी, झिकै गै बारे में, मैं, सिलवानुस अर तीमुथियुस थारै में परचार करयो है इऊं थानै ठा है कै बो बिस्वास योग्य है अर बो बिंगै वायदे नै पूरो करण आळो ईं है।
20 परमेसर गो हर एक वायदो यीसू मसी गै द्वारा पूरो होवैगो अर बिंगै कारण परमेसर गो वायदो सच्चो है अर बिऊं परमेसर नै आदर मान बी मिलै। ईंखातर बिंगै द्वारा आमीन बी होवै।
21 बो ई परमेसर म्हानै थारै सागै मसी में ताकत्वार करै है अर म्हानै अभिसेक बी करयो है।
22 बण म्हारै पर छाप लगाई अर बयाने में पवितर आत्मा म्हारै मन में दी।