यरुसलेम सैहर गै बिस्वासी लोगां खातर दान
16
1 हे मेरै भाईयो अर भेनों, अब मैं थानै परमेसर गै बिस्वासी लोगां गी मदद खातर दान भेळो करण गो केवूं। इंगै बारे में गलातिया प्रदेस गी बिस्वासी मण्डली नै झिको कीं मैं केयो बिंया थे बी करो।
2 अर बो ओ है कै थे थारी कमाई मूं कीं हिसो हरेक हफ्ते गै पेलै दिन काड़ गै छोड़ दे करो। इंया करण ऊं जद मैं थारै कनै पाछो आवूंगा तो दान भेळो करण गी जरूरत ना पड़ै।
3 अर बो दान झिको यरुसलेम भेजणो है बि खातर थे आप ई कीं आदमियां नै चुणल्यो कै जद मैं आ'गे बांगै हात ऊं बो दान यरुसलेम सैहर तांई पोंचा दयूं अर बांगै हात में चिठ्ठी लिखगै देदेयूं कै आ लोगां नै थे खुद चुण्या है।
4 अर बठै जे मेरी जाण गी जरूरत पड़ी तो मैं बी बांगै सागै जाऊंगा।
पौलुस गी यातरा गै बारे में
5 अर मनै मकदुनिया प्रदेस माखर जाणो ई है। जद मैं बठाकर जाऊंगा तो थारूं मिलण जरूर आऊंगा।
6 अर हो सकै सारी सरदी मैं थारै कनैई रेऊं क्यूंकै बाद में मनै जठै बी जाणो हो'सी थे मेरै सफर में मेरी मदद करोगा।
7 अर मेरी इच्छा थारूं मिल गै जाण गी कोनी पण मैं चाऊं प्रभु गी इच्छा ऊं केई दिन थारै सागै ईं रेऊं।
8 पण पेन्तिकुस्त त्यूंहार तांई मैं इफिसुस सैहर में ई रेऊंगा।
9 क्यूंकै बठै बिरोध करण आळा बी भोत है फेर ई बठै आच्छी सेवा करण गो एक मोटो मोको है।
10 जद तीमुथियुस थारै कनै आवै तो बिंगो आच्छो आदर मान करियो जिऊं बो थारै सागै रेण ऊं घबरावै ना। क्यूंकै जिसो मैं हूं बिसो बो बी प्रभु गी सेवा करण आळो दास है।
11 ईंखातर कोई बी बिनै तुछ ना जाणै अर बिंगै सफर में बिंगी पूरी मदद करै कै बो मेरै तांई आच्छी तरियां पोंचा दय। क्यूंकै मैं बिंगी अडीक में हूं कै बो दूसरै भाईयां सागै मेरै कनै आ'ज्य।a
12 मैं आपणै भाई अपुल्लोस ऊं भोत बारी बिनती करी ही कै बो दूसरै भाईयां सागै थारै कनै आ'ज्य। पण अब बिंगी इच्छा थारै कनै आण गी कोनी है। पण जद बिनै मोको मिलैगो तो बो थारै कनै जरूर आवैगो।b
13 मेरै भाईयो अर भेनों, थे चोकस अर बिस्वास में बण्या रेओ, बिस्वास ऊं लारै ना हटो अर मजबूत बणो।
14 झिको कीं थे करो बो प्रेम ऊं करो।
15 अर भाई स्तिफनुस गै घर में रेण आळै लोगां गै बारे में थानै ठा है। बे आख्या प्रदेसc गा पेला बिस्वासी लोग है। अर परमेसर गै लोगां गी सेवा करण खातर हमेसा तैयार रेवै।
16 ईंखातर मैं बिनती करूं कै थे इस्या लोगां गै अधीन रेओ अर झिका बांगै सागै कड़ी मेनत करै बांगै बी अधीन रेओ।
17 अर थारी ओर ऊं भाई स्तिफनुस, फुरतुनातुस अर अखइकुस मेरूं मिलण आया। मनै भोत आनंद होयो क्यूंकै थे मेरै सागै ना होण'गी बजह ऊं झिकी मदद ना कर सक्या बा आ लोगां करी।
18 जिंया आ थानै खुस करया हा बिंया ई मनै करयो है। हिस्या लोगां गो थे आदर करो।
19 आसिया प्रदेस गा बिस्वासी लोग अर भाई अक्विला अर बिंगी पत्नी प्रिस्किल्ला बी थानै निमस्कार केवै। अर बांगी घर में भेळी होण आळी बिस्वासी मण्डली गा लोग बी थानै प्रभु गै नाम में पूरै मन ऊं निमस्कार केवै।
20 सारा बिस्वासी भाई भेन थानै निमस्कार केवै। अर थे बी एक दूसरै नै पवितर मन गै सागै प्रेम ऊं निमस्कार केवो।
21 मैं पौलुस अब थानै खुद गै हात ऊं लिखगै निमस्कार केऊं।
22 जे कोई प्रभु ऊं प्रेम ना राखै तो बो सरापित है। आपणो प्रभु बेगो ई आण आळो है।
23 मैं पराथना करूं कै आपणो प्रभु यीसू मसी थानै सारा नै किरपा दय।
24 अर यीसू मसी गै नाम में मेरो प्रेम सदा थारै सारा गै सागै रेवै। आमीन।