मसी गो जी उठणो
15
1 हे मेरा भाईयो अर भेनों, झिको सुब समाचार मैं थानै पेला बी सुणा चुक्यो हूं बो ई सुब समाचार थानै फेर सुणाण लागरयो हूं। झिकै नै थे मानगे बि पर मजबूत खडया हो।
2 अर बि सुब समाचार पर बिस्वास कर'गे मजबूत होण गै कारण थारो उद्धार होयो। नई तो थारो बिस्वास करणो बेकार है।
3 क्यूंकै झिको बचन मैं सुण्यो बो ई थानै बतायो है। बामूं खास बात पवितर सासतर में आ है कै यीसू मसी आपणै पापां खातर बलिदान हो'ग्यो।
4 अर बिनै दफना दियो अर पवितर सासतर गै अनुसार तीसरै दिन पाछो जीग्यो।
5 अर बो पतरस नै दिख्यो अर इंगै बाद बाकी चेला नै बी दिखाई दियो।
6 आंगै बाद बो पांच सौ ऊं जादा बिस्वासी लोगां नै दिखाई दियो। बामूं भोतसा लोग अजे जीमता है पण केई लोग गुजर ग्या हा।
7 इंगै बाद बो याकूब अर बाकी खास चेला नै बी दिखाई दियो।
8 आ सारा गै बाद मैं झिको सई टेम पर ना पैदा होण आळै टाबर बरगो हो झिको मैं बिंगो सई टेम पर खास चेलो ना बण सक्यो। पण फेर बी बण मनै दरसण दिया।
9 क्यूंकै मैं सारा खास चेला में बदनसीब हूं अर अठै तांई कै मैं खास चेलो केहलाण गै लायक बी कोनी। क्यूंकै मैं परमेसर गी बिस्वासी मण्डली नै भोत दुख दियो हो।
10 पण मैं झिको कीं आज हूं बो परमेसर गी दया ऊं हूं अर झिकी दया बण मेरै पर करी बा बेकार कोनी गेई क्यूंकै मैं सारा ऊं बड़गै मेनत करी। पण ओ सारो कीं मेरो कोनी पण परमेसर गी दया गै कारण होयो।
11 ईंखातर चायै मैं हूं अर चायै बे दूसरा खास चेलो है, म्हे सारा एक ई सुब समाचार गो परचार करां अर बि पर ई थे बिस्वास बी करयो है।
बिस्वासी लोगां गो दुसर जी उठणो
12 म्हे परचार करा हा कै परमेसर मरेड़ै यीसू मसी नै पाछो जीमतो कर दियो तो फेर थारै मूं केई लोग इंया क्यामी केवै है कै मरेड़ा लोग कदी जीमता कोनी होवै?
13 जे मरेड़ा जीमता ना हो सकै तो यीसू मसी बी जीमतो कोनी होयो।
14 अर जे यीसू मसी नै जीमतो कोनी करयो हो तो म्हारो परचार करणो अर थारो बि पर बिस्वास करणो बेकार है।
15 अर जे ओ सच्च है तो आपणो सिरफ परचार ई बेकार कोनी पण इऊं मोटो बुरो ओ है कै म्हे परमेसर गै बारे में झूठी गवाई देया कै परमेसर मरेड़ै यीसू मसी नै जीमतो कर दियो। पण मरगे जे कोई जीमतो होई कोनी सकै तो परमेसर बिनै किंया जीमतो करयो।
16 मैं आ'ई बात थानै फेर केऊं कै जे मरेड़ा लोग ना जीमता होया तो मसी बी जीमतो कोनी होयो हो।
17 अर जे परमेसर मसी नै जीमतो करयो कोनी तो थारै बिस्वास करण ऊं कोई लाभ कोनी अर थे अजे बी पाप गै ई बंधन में हो।
18 अर झिका मसी पर बिस्वास कर'गे मरै है बे बी सारा नास ई होया है।
19 अर जे सिरफ संसार गै ई जीवन गी भलाई खातर आपां मसी पर आसा राखा तो सारै माणसां में आपां अभागी हा।
20 यीसू मसी मरगे पाछो जी उठ्यो अर बो पेलो फळ है झिकै ओ साबित कर दियो कै झिका बिस्वासी लोग बिस्वास में रेगे मरया है बे बी एक दिन जीमता करीजेगा।
21 क्यूंकै पेलै आदम गै बुरे करमां गै कारण संसार में मोत आईa बिंया ई दूसरो आदम झिको यीसू मसी है, बिंगै द्वारा मोत ऊं जी उठणो आयो।
22 जिंया आदम गै पाप गा भागिदार बणगे आपां सारा मरा हा बिंया ई यीसू मसी गै सागै मेळ करण ऊं एक दिन पाछा जीमता होस्या।
23 पण हरेक खातर जी उठण गो एक टेम है। पेलां यीसू मसी झिको पेलो फळ हो बो जी उठ्यो अर जद बो दुसर आवैगो तो बि पर बिस्वास करण आळा सारा लोग एक सागै जी उठेगा।
24 इंगै बाद संसार गो आखरी टेम आज्येगो। अर संसार पर राज करण आळा अधिकारी अर बुरी सकतियां नै यीसू नास कर'गे बि पर राज करेगा अर सारो राज पिता परमेसर गै हात में सोंप दयगो।
25 क्यूंकै जद तांई बो आपगै सारै दुसमणां नै आपगै पग नीचे ना कर ल्ये बि टेम तांई बिंगो राज करणो भोत जरूरी है।
26 अर सारा ऊं आखरी दुसमण मोत नै बी खत्म करीजैगी।
27 क्यूंकै पवितर सासतर में ओ लिखेड़ो है कै, “परमेसर सारो कीं यीसू मसी गै अधीन कर दियो।” पण अधीन करण आळो परमेसर बिंगै अधीन में कोनी हो।
28 अर जद सारो कीं परमेसर आपगै बेटै यीसू मसी गै अधीन में दियो तो बो बी अपणै आपनै बिंगै अधीन में कर दयगो जिऊं परमेसर सारा पर राज कर सकै।
29 अर जे थानै ई बात पर बिस्वास ई कोनी कै परमेसर एक दिन मरेड़ै लोगा नै पक्का ई जीमता करेगो तो थारै मूं झिका लोग मरेड़ै आदमी खातर बतिस्मो ल्ये तो थे के आस पर ल्यो?
30 अर जे परमेसर मरेड़ै लोगा नै जीमता कोनी करेगो तो क्यूं बारी बारी म्हे म्हारै जीवन नै ब्यादि में रेड़ा।
31 हे मेरै भाईयो अर भेनों, थारै खातर यीसू मसी में मैं घमण्ड करूं कै मैं हरेक दिन मोत गो सामणो करूं हूं।
32 अर इफिसुस सैहर गै लोगां मेरै सागै जंगळी जानवरां बरगो बरताव करयो। जे मेरेड़ा लोगा नै जीमता ना करीज्या तो मेरी लडाई ईं संसार तांई रेज्येगी। मनै इऊं कोई फळ कोनी मिलैगो। अर केई लोग इंया केवै कै
“कीं होण आळो तो है कोनी तो चालो, खावां पीवां अर ऐस करां,
क्यूंकै एक दिन तो मरणो ई है।b”
33 पण झिका लोग इंया केवै बांगै भेकावै में ना आ जाईयो। क्यूंकै बुरी संगती आच्छी आदतां नै बिगाड़ देयै।
34 ईंखातर थे होस में रेओ अर पाप करणो छोड़दयो। सरम आळी बात आ'ई है कै थारै मूं केई लोग परमेसर गी साची सिक्सा नै कोनी जाणै।
दुसर जी उठण
35 पण केई लोग इंया पूछेगा कै,
“मरेड़ा लोग किंया जीमता होवैगा? अर बे किसी देह गै सागै जीमता हो'सी?”
36 हे मूरख बकवादी लोगों, झिको बीज थे बीजो बो पेला जमीन गै मां जा'गे मरै है। अर बिंगै बाद ई बो एक नुओ बूंटो बणगे जीमतो होवै।
37 अर थे कोई फसल गो बूंटो कोनी लगावो पण सिरफ बीज ई बिजो।
38 पण परमेसर आपगी इच्छा ऊं बा बीजा नै रूप दय अर हरेक बीज ऊं न्यारी न्यारी तरियां गा बुंटा निकळै।
39 अर बिंया ई जीमता प्राणियां गी देह एक बरगी कोनी। मिनखां गी एक तरियां है अर जानवारां गी न्यारी है बिंया ई चिडियां गी देह एक तरियां गी है तो मछलियां गी न्यारी न्यारी है।
40 बियां ई आकास गै चांद, सूरज अर तारां अर संसार में रेण आळां ऊं भोत न्यारा है। क्यूंकै आकास में रेण आळां अर संसार में रेण आळां गो रूप न्यारो न्यारो है।
41 अर आकास में रेण आळां गो बी चानणो आपस में न्यारो न्यारो होवै। जिंया सूरज गो एक तरियां गो अर चांद गो दूसरी तरियां गो बिंया ई तारां गो चानणो बी न्यारी न्यारी तरियां गो है।
42 अर मरेड़ा लोग बी इंया ई जीमता होवैगा। जिंया एक बीज धरती में जा'गे गळै बिंया ई माणस गी ईं देह नै मरण गै बाद माटी देयेजै अर बा बी गळ'जयै। पण झिकी देह जीमती हो'सी है बा अमर है।
43 अर जद ई संसारिक देह नै माटी देईजै जद बा ताकतहीण होवै पण झिकी देह नै जीमती करीजैगी बा ताकत ऊं भरेड़ी होवैगी।
44 अर झिकी देह नै माटी देईजै बा सांसार गी देह होवै पण जद बा जीमती करीजैगी तो बा आत्मिक देह बण ज्यगी क्यूंकै सांसारिक देह माटी गी है पण आत्मिक देह सुरग गी है।
45 पवितर सासतर में लिखेड़ो है कै,
“पेलो मिनख आदम जिंदा आदमी बण्यो।
अर आखिरी आदम यीसू मसी आत्मिक सरीर नै देण आळो बण्यो।”
46 पण पेला आपां नै सांसारिक देह मिली है इंगै बाद आपां नै आत्मिक देह मिलैगी।
47 अर धरती गो पेलो मिनख आदम माटी ऊं बणाइजो हो। अर दूसरो आदम यीसू सुरग ऊं आयो हो।
48 अर बी पेलै मिनख गै कारण संसार गा बाकी सारा लोग माटी गा बणेड़ा है। पण दूसरो मिनख सुरग गो है। ईंखातर सुरग में रेण आळा सारा लोग बि बरगा ई है।
49 अर जिंया आदम गै कारण आपां नै रूप माटी गो मिल्यो है बिंया ई दूसरै मिनख झिको सुरग ऊं आयो है अर एक दिन आपणी देह बी बिंगी सुरगिय देह बरगी होवैगी।
50 हे मेरा भाईयो अर भेनों, मैं थानै बतावूं कै ईं हाड मास गी बणेड़ी देह नै लेगे सुरग में कोनी जा सका क्यूंकै आ नासवान है पण सुरग अमर है।
51 सुणो, मैं थानै परमेसर गी एक लुकेडी बात गो भेद बताऊं कै आपणै मूं केई लोग मरेगा कोनी पण आपणै सारां गी देह बदळ जेयेगी।
52 जद आखरी तुरही बाजेगी तो एक पलक में ई सारा मरेडा लोग एक अमर देह में जी उठेगा अर आपणै सारां गी देह बदळ ज्येगी।
53 क्यूंकै ईं नासवान देही नै लेगे आपां सुरग में कोनी जा सका, ईंखातर आपणी नासवान देह नै अविनासी देह में बदळीजणी जरूरी है।
54 अर जद नासवान देह अविनासी देह में बदळ ज्यगी जद पवितर सासतर में लिखयो बचन पूरो होज्येगो कै,
“मोत नै खत्म कर'गे बि पर जीत हासिल कर ली।c”
55 “हे मोत कठै गेई तेरी जीत?
अर हे मोत कठै गेयो तेरो मारण आळो डंक?d”
56 अर नेम विधान ऊं आपां नै पतो चालै है कै आपां सारा पापी हा अर पाप करां। ईंखातर मोत नै ताकत मिलै अर आ आपां नै आवै।
57 पण आपां नै परमेसर गो धन्यवाद देणो चईयै कै बो आपणै प्रभु यीसू मसी गै द्वारा पाप अर मोत पर जीत दिरावै है।
58 ईंखातर मेरै भाईयो अर भेनों, थे बिस्वास में मजबूत रेओ अर प्रभु गो काम करण खातर थे खुद पूरी रीति ऊं बिंगै अरपण होज्यो। क्यूंकै थानै ठा है कै झिको काम थे करण लागरया हो, बिंगी मेनत बेकार कोनी ज्येगी।