Ebleewaa 12

Lagɔ ɔnyɩ a 'yuë a sɛ ɔ zlɔmanɩnyɩɛ 'mö

‑Abhʋa ‑abhlɩ,

sɛɛ nɩkpa 'kɔkɔmlɛ ylɛ'ɛ guëguëwaa,

ɛ 'kä ‑bhɩɛ ‑sɩbhä nɩkpa 'la 'wuë wa 'tɛɛnɩ a‑a Lagɔ dlɩ ‑binɩnyɩ 'n wa yɛlanyɩ.

Zaa,

guëguu Lagɔ lanɩnyɩɛ 'wʋ a dɔ'wʋ,

'nyinylolii ‑a bhlinɩɛ 'mö ‑kpaflala 'yize,

yɩ ‑nyɛ nyɩasɛlii 'wuë ‑yɩ ‑kanyɩɛ 'wʋ 'wlɔmanɩ 'sɔ,

a‑a nɩ ‑sɩɩ kɛ'mö,

‑a 'kä sasɛ guë ‑a 'käa ‑mä 'gbë 'wʋ ghlɛ.

2 ‑A ‑kä guë dɔ'wʋ ‑wʋʋ,

Zezwii mö ‑a nɩ glɛ ‑a'a yilaa.

Ɛ'ɛ ‑bhö nyɩasɛ,

‑maa Lagɔ a dlɩtɛɛnɩ dɔ'wʋ mɔɔ glɩnɩɛ ‑aa 'yukugänɩnyɔ,

mɔɔ 'kää 'nglɩ ‑kä ‑a 'kä ‑mä 'gbë 'wʋ ghlɛ.

Ɔ'bhë,

'mäna 'kädaa Lagɔ 'kɔɔ bhäla 'lɩbha a za,

wa 'kɔ ‑di zia wa 'kɔ jɛzlʋnyɔ a sɛ su 'klʋ kʋnɩ a dɔ'wʋ,

ɔ 'niɛ a ‑lu la,

‑maa ɔ ‑bhɩɔ 'mö 'n wa yoo ‑sɩbhä 'zʋ.

Lagɔ ‑ɔ 'kämanɩɛ ‑lii 'wuë ‑gömö,

'n ɔ yiɛ ‑mä ɔ luukɛ 'wʋ sɛ glɩɛ mö.

3 Sɛ'ɛ n gbää nɩɩ,

sɛɛ 'nyinylolinʋwaa ‑gblɩ a‑a Zezwii 'n ɔ ‑bhɩɔ a‑a 'mö wa 'kɔ tenyii 'klɩ 'yɩa a daa,

'a dilaa nɩ pö ‑lɛ 'yize,

nzɩɩ swɩ tanyɩa yɔwʋ 'kunɩ,

a tɩa Lagɔ 'a 'yioo 'wʋ 'bhöö.

4 'A 'nyinylolii a nimïsɛsʋʋ 'nanyɩɛ ‑bhlɛ 'kwie a'bhë 'mö kwä 'n

5 sɛɛ Lagɔ zʋä ɔ ‑nʋa 'dɩ 'mö ɔ 'kʋä swɩ nyɛmʋ 'mö 'pää,

'n a yiɛ ‑sɩbhä 'wʋ dlʋ.

Lagɔwɛlɩɩ lɛ naa:

Na 'yu,

Lagɔ ‑kamö 'klɩ 'yɩa ɔ ‑kamö 'mö zlɔmanɩ a za‑a,

'nwi 'mö.

Ɔ ‑kamö 'lʋnɩɩ,

swɩ nɩ ‑tɩmö yɔwʋ 'kunɩ.

6 Ɛ'ɛ ‑bhö nyɩasɛ,

‑maa ‑ɔ ‑glɔɔɔ dlɩ 'wʋʋ,

'mö ɔ zlɔmanɩɛ 'mö.

‑Mɔ ɔ laa ɔnyɩ a 'yuu,

'mö ɔ 'yɩa 'klɩ.^a

7 'Yu a ‑mɔ ɔ dɩba 'nɩ zlɔmanɩɛ 'möö,

ɔ ‑bhölɩ bhä ‑a?

A'bhï,

Lagɔ a 'yuë a glɩnɩɛ zaa,

ɔ ‑kaanyɩ 'klɩ 'yɩaa,

a nɩ nglu 'wʋ,

ɛ'ɛ ‑bhö nyɩasɛ,

‑maa ɔ 'kanyɩ 'mö zlɔmanɩ a za‑a.

8 Sa'a ‑sɩbhä Lagɔ zlɔmanɩɛ 'ɔ yuëa 'wuë 'mö,

zaa 'n ɔ 'nanyɩ a ‑sɩbhä 'mö zlɔmanɩɩ,

sɛ'ɛ yɩ sɛ a‑a zɛmö nɩɩ,

a'a ‑bhö ɔ ‑tiamö a yuë,

‑maa 'libhïlibïyuë a glɩnɩɛ.

9 Mä'ä dʋdʋ 'wʋ a dɔ'wʋ,

‑aa dɩbawa ‑kanyɩ 'mö zlɔmanɩɩ,

wʋ ‑a ngluä,

a‑a zuëë 'klʋkpamö.

Mɛɛ 'kä zi'e ‑aa dɩba Lagɔ ‑ɔ ‑wʋ ‑mä ghäyɩ 'wʋ,

ɔ ‑kanyɩ 'mö zlɔmanɩ ‑a 'käa ‑tiamö a ‑bhölɩbhölɛ ghlɩɩ,

mö ‑a 'kä a bhä 'klʋkpamö ‑sɛ ‑a?

10 'Tɛnyɩ ‑aa dɩbawa zlɔmanɩnyɩɛ 'mö 'möö,

ɛ'ɛɛ 'mö 'bhʋɔ.

Wa ‑kanyɩ 'mö zlɔmanɩɩ,

sɛɛ nɛnɩɛ wa dɔ'wʋ cuu,

‑sɩbhä wa zʋʋnyɩɛ.

‑Maa Lagɔ ɔbhlɩ,

ɔ ‑kanyɩ 'mö zlɔmanɩɩ,

‑aa ‑li a ‑li a 'yize yɩ kää 'mö.

Ɔ yɩbhä nɩɩ,

‑a'a nɛmönɛmösaa 'wuë nɩ ‑wʋ Lagɔsɛ,

nza ɔ zlɔmanɩnyɩɛ ‑sɩbhä 'mö.

11 Sɛ'ɛ n gbää nɩɩ,

Lagɔ ‑kamö 'mö zlɔmanɩ,

‑n ‑kä ‑sɩbhä a za 'klɩ 'yɩ dɔ'wʋ ‑wʋʋ,

yɩ ‑nɩmöä 'mäna 'wʋ ‑bhö,

‑n ‑tɔnɩ nɩɩ ‑lizoku.

‑Maa ‑n ‑kä 'wʋ nglu,

‑lɛ a klɩ 'la ‑kamö 'mö zlɔmanɩɩ,

‑mä yɩ 'wuë a 'gbë 'wʋ,

‑na'a zɩkpaa yi 'mö zlɔmanɩ,

‑na'a dlɩ zɛmö yi ‑pälɛpälɛ ‑wʋ ‑mä nɩkpa 'wuë ‑gömö.

A nɩ ‑bhölɩ Lagɔsɛ

12 Swɩ nɩ tanyɩ yɔwʋ 'kunɩ,

‑maa a nɩ 'tɛmanɩ 'yli yɔwʋ a 'kä 'yukusɛ mö.

13 A nɩ zlɔmanɩ 'a nɛmönɛmösaa 'wuë 'mö,

nzɩɩ ‑wa bhliɛ gba'agbagba'aa,

wa tɩa Lagɔ a 'yio 'wʋ 'bhöö,

wa 'kɔa sasɛ ‑gänɩ.

14 A ‑nyɛ nɩkpa 'wuë 'sɔ a 'kä ‑wanɩ,

'n 'a nɛmönɛmösaa 'wuë 'kä Lagɔsɛ ‑wʋ,

yɩ gbʋ nɩ plɛnanyɩ bhʋlʋbhlʋ.

‑Mɔ yɩ gbʋ 'nɩ plɛnɩɩ,

ɔ 'naa 'kä ‑mä Lagɔ yɔwʋ mö,

zaa ɔ 'naa 'kɔ 'ylɩmö.

15 A nɩ 'nɛmanɩ anyɩ 'wʋ,

a gla'mö a ‑nɔ ‑bhlʋ a'bhë tɩa Lagɔ 'a ngäzɩdlɩpäpʋʋ 'mö bɔ.

Nɩkpɛ a ‑mɔɔ ‑li 'nɩɛ kɛ ‑zunɩɩ zaa ‑ɔ pää zila 'wuë 'mö 'klɛɛ,

a nɩ tɩ 'wʋ nglu,

ɔ nɩ tanyɩ jijo'wʋ ‑wʋ,

ɛ'ɛ ‑bhö nyɩasɛ,

‑maa sa'a a nɩkpɛ,

'mö wa laa 'zɛzɛ ‑ɔ nyima gïnyɛ.

16‑17 Nyɩbhɛlɩ a ‑muë sɛsɛnɩɛ 'ngwlɩ,

'ngwlɩ a ‑muë sɛsɛnɩɛ nyɩbhɛlɩ,

‑wa flanɩɛ Ezawii a saa Lagɔlii 'ylimöö,

'mö a nɩ tɩ glɩnɩ.

Ezawii 'a wɛlɩɩ,

a ‑yii.

Mɔɔ ɔ dɩba 'a tɛkäyuu mɔ zaa,

'mö dɩba kä a‑a ɔ 'kä 'nyu 'pä.

‑Maa 'fʋ a lile a za,

nza ɔ 'nyɛɛ 'tikëyii 'ɔ 'kɔdɔglɩnɔ yowʋ.

Zaa,

'mö dɩbaa 'päa'aa 'nyu.

Ɔ 'pɔɔ 'nyu 'wëë,

Ezawii 'yɩbhä nɩɩ ɔ dɩba nɩ 'pämɔ 'nyu.

‑Maa ɔ'ɔɔ 'wʋ nglu.

Ezawii,

'n ɔ yiɛ ‑sɩbhä a za 'mɩɔ 'wi,

‑maa nyɩasɛlia'aa.

A nɩ tɩ Lagɔwɛlɩɩ kplɩ sɛ tlinɩ

18‑19 Abhʋa abhlɩ,

Sinayii a ‑gägaa wa bhɛnɩɛ wa 'kä kɛ zɩ ‑anyɩɩ 'wlu ‑kosugbagbʋ ngömɔ a‑a,

mää gbeylokwëkpëbhë ‑wʋ a‑a,

mää 'yuylukwë ‑wʋ a‑a,

mää ‑podie yi a‑a ‑vuvuvu,

mää lɛglɛ gbä a‑a,

mää wɛlɩ ‑dɩ a‑a gbʋʋ,

'mö a 'nɩɛ yɔwʋ 'dio,

Yizlaɛlɩ a ‑nʋa a saa.

Wabhlɩ,

wa 'nʋä wɛlɩ 'la,

wa lɛ naa:

«‑Yayaya,

yɩ nɩ 'bhlenɩa'a da'a.»

20 Nyɩasɛ wa'aa ‑sɩbhä gbä,

‑maa wɛlɩɩ ‑yɩ nʋä nɩɩ:

‑Ɔ ‑kä ‑gägaa kɛ zɩɩ,

ɛ yi nɩmɛ a'bhë ‑kë,

wa nɩ 'lɩbhɛ 'kpɩ 'mö ɛ 'kä 'kuu,^b

nganɔ 'wʋ yɩ ‑bhö a‑a.

21 ‑Lɛ a zlɩ 'la 'mö a 'saa wa 'yɩɛ 'ylɩmöö,

nganɔ 'wʋ yɩ ‑bhöä tenyii.

‑Sɩbhä a za Moyizɩ a'bhë,

ɔ lɛ naa:

Nganɔ a za,

n'n‑ä nanyɩ ‑yi.^c

22 ‑Maa Siɔɔ a ‑gägaa ‑nyɛ Lagɔ ‑ɔ ‑bhölɩ 'a ‑glɔ 'kɔdʋʋ wa laa zlɩ 'mö a Zeluzalɛɛmö 'sɔ,

'mö a 'dioo yɔwʋ.

Lagɔzuzukuu 'kɔkɔmlɛ 'kɔkɔmlɛ ‑yɩ ‑wʋä 'mäna 'möö,

'mö a dioo yɔwʋ.

23 Lagɔ a ‑nʋa 'wuë,

‑wa glɩnɩɛ 'ɔ tɛkäyuëa,

‑wanyɩɩ 'nglɩ ɔ 'cɛlɩɛ ‑mä zlɩ 'möö,

'mö a 'dioo yɔwʋ.

Nɩkpa 'wuë a ‑zijlitunyɔ Lagɔ,

'mö a 'dioo yɔwʋ.

Bhla'mö a ‑nʋa ‑wa zlɔnɩɛ 'mö Lagɔ a 'yila 'klʋ a dɔ'wʋ,

‑wa yɛɛ ‑mä 'gbë 'wʋ ghlɛ 'wëë,

'wa zuzukuu,

'mö a 'dioo yɔwʋ.

24 Zezwii ‑ɔ kää 'nglɩ 'n Lagɔ ‑nyɛ nɩkpa yiɛ mɛnɩnɔlulu mɛnɩnɩɛ,

'mö a 'dioo yɔwʋ.

'Ɔ dluu ‑wʋ 'suloo sɛ ‑wʋ bhïlaa sasɛ ‑aa dɛ ‑wʋ ziɛ Abɛɛlɩ a ‑nʋʋ wʋʋ,

'mö a 'dioo yɔwʋ.

25 Zaa,

a nɩ 'nɛmanɩ anyɩ 'wʋ,

a tɩa ‑ɔ bhïlaa 'yukwli yɔwʋ ‑sɛ.

A ‑yi sɛ nɩɩ,

Moyizɩ ‑ɔ bhïla a‑a mä'ä dʋdʋ 'wʋʋ,

‑wa ‑sɔɔ a‑a 'yukwli yɔwʋʋ,

Lagɔ 'nuë a‑a ‑sɩbhä tɩnɩ.

Mɛɛ 'kä zi'e Lagɔ ɔ ‑wʋa ‑mä ghäyɩ 'wʋ a ‑nɩɩ ɔ nyɩanyɩɛ,

a‑a 'ni 'yukwli ‑pʋnɩ,

a‑a ‑kɔɔ ‑gömö panɩ 'lɩlɩlɩɩ,

‑abhʋa ɔ 'kä bhä ‑sɩbhä tɩnɩ ‑a?

26 ‑Zlɩ Lagɔ bhïla a‑a,

'ɔ ngli a wɛlɩɩ a za,

dʋdʋ tɩtlɛnɩ a.

‑Maa ‑a'a 'tɛnyɩ nɩ 'mö,

sɛ'ɛ 'ɔ wɛlɩɩ nyɩanyɩɛ 'dɩ nɩɩ,

Lagɔ lɛ naa:

'Wʋ ‑bhlʋ tʋʋa'aa ‑mä,

'na ngli a wɛlɩɩ 'kä'ɛ 'nglɩ ‑kä dʋdʋkpäta 'wuë 'kä tɩtlɛnɩ.

Ɛ'ɛ ‑bhöa'a dʋdʋkpäta a 'yize ma,

‑maa zlɩ a'bhë yi tɩtlɛnɩmö.^d

27 ‑Maa Lagɔ ‑kä nɩɩ:

'Wʋ ‑bhlʋ tʋʋa'aa ‑mä nʋʋ,

mɩɩ sɛɛ zɛmö nɩɩ,

‑lɛ a zlɩ 'la 'mö,

Lagɔ 'a ‑bhɛbhɛlii 'wuë 'ylibhɩɛli yɩ glɩnɩɛ zaa,

'yli yɩ 'kää bhɩɛ,

nzɩɩ,

‑li a ‑mii 'naa 'kää 'yli bhɩɛ a 'yize 'kä ‑lɛ tʋʋ.

28 Nza n gbää nɩɩ,

'pɩwʋ mää Lagɔ 'kämanɩɛ,

mää 'naa 'kää 'kwädlɩ 'yli bhɩɛɛ,

‑mä ma‑a ‑kʋnɩnyɩɛ.

Zaa,

a‑a nɩ bhälɔ 'kwädlɩ.

A‑a nɩ kä ɔ nganɔ ku 'mö,

‑a 'kɔ 'klʋkpamö zʋ 'yize,

sɛɛ nɛnɔɔ dlɩ yɔwʋʋ,

a 'kɔ ‑sɩbhä bʋbɔ.

29 Ɛ'ɛ ‑bhö nyɩasɛ,

‑maa ‑aa dɩba Lagɔ,

'ylibhɩakosu a ‑mumuuä.^e