'Dɩmözʋwɛlɩɩ
13
A 'wuë,
a nɩ ‑wawanɩ 'kwädlɩ ‑daayuë a sɛ.
2 A nɩ päla lowluwa 'mänasɛ,
‑mumuë 'zʋ ‑sɩbhä,
wa'aa Lagɔzuzuku ‑tɔnɩ 'n wa yiɛ päla.
3 A'bhɩa Lagɔgänɩwa ‑wa ‑wʋä ‑jie 'möö,
a nɩ 'pʋä 'wʋ dlɩ,
ɛ nɩ ‑bhɩɛ nɩɩ ‑mä a ‑wʋmö.
‑Muë wa 'yɩaa 'klɩɩ,
a nɩ 'pämuë 'wʋ dlɩ,
ɛ nɩ ‑bhɩɛ nɩɩ,
a'bhï abhʋa wa 'yɩa 'klɩ.
4 Nɩkpa 'wuë nɩ 'zʋ 'suëplɛplʋ 'klʋkpamö.
‑Nmö 'luwli,
tɩ 'ngwlɩ sɛ tɛlɩ.
‑Nmö nglɔ,
tɩ'ɛ ‑naa gbɩ sɛ tɛlɩ.
‑Maa sa'a a ‑lii,
‑wa 'nwiɛ,
Lagɔ a'bhë mɔɔ 'kʋää gbʋ köbha.
5 Moni a 'tʋ nɩ tanyɩ tɛkäsɛ a'bhë 'wlumö ‑sunɩ.
‑Maa 'saa Lagɔ kanyɩ 'nyɛ ‑kë,
wʋ nɩ ‑zunanyɩ kɛ.
Lagɔ a'bhë,
sɛ'ɛ ɔ nʋä nɩɩ:
'Naa ‑kamö 'kwädlɩ kɛ'mö ‑sɛ,
'naa ‑kamö 'kwädlɩ 'wʋ ylɛ.a
6 ‑Sɩbhä a za,
‑a bhɛnɩ ‑a 'kɔ dlɩ 'tɛɛnɩ ‑a 'kä 'kwädlɩ nɩɩ:
‑Alowli Lagɔ,
mɔɔ na 'wʋyinyɔɔ.
Nɩkpɛ 'naa ‑kaa ‑lu nʋ.
Zaa,
'na dlɩ su ‑mä 'n n nɛmöä.b
7 'A 'yukugänɩwaa ‑wa 'nyanyɩ a‑a Lagɔ 'a wɛlɩɩ,
wa da,
'a dilaa nɩ pö ‑lɛ 'yize.
A ‑yi sɛ nɩɩ,
Lagɔ 'mö wa 'tɛɛnɩɛ dlɩ ‑këë ‑mä 'kwie 'mö zaa,
a nɩ ‑gänɩ 'wa gbäpöö.
8 ‑Atʋayuënyɩ,
Zezwii Kliisɩ,
sɛ ɔ ‑wʋ a‑a bhla'möö,
‑sɩbhä ɔ ‑wʋä zɩ'ɛ,
‑sɩbhä ɔ 'kää 'kwädlɩkwädlɩnɩ ‑wʋ 'yize.
9 Käböwɛlɩ a ‑mii ‑nyɛ Lagɔwɛlɩɩ 'nɩ mönɩɛ yɔwʋ,
nɩkpa ‑mumuë 'cɩaa,
a nɩ ti 'yukwli ‑pʋnɩ yɩ tanyɩa dula.
Lagɔ 'a ngäzɩdlɩpäpʋʋ a wɛlɩɩ,
yɩ 'yize mɩɩ nɛnɩɛ,
mɩɩ bhɛnɩɛ yɩ 'kä nɩkpɛ dlɩ 'wʋ 'tɛmanɩ.
‑Maa lililii a gbö a wɛlɩɩ,
‑wa ‑gäniɛ,
‑bɛ 'nɩ 'saa wa ghlɩni 'mö a'bhë ‑yi.
10 ‑Abhʋa Zezwii a ‑nʋa,
‑a kä ‑a'a Lagɔbʋbɔnɩdɛ.
‑Lɛ a lilea,
Zwiiföwa 'a Lagɔbʋbɔwaa,
‑wa bʋbɔnɩɛ ‑mä Lagɔgligbëa 'möö,
wa'aa ‑kä wa 'ka li.
11 'Wa Lagɔbʋbɔsaa a dɔ'wʋ,
nɩmaa ‑yɩnyɩɩ dlu Lagɔbʋbɔnyɔ 'kɔdɔɔ ‑suä 'n ɔ möä ‑mä Lagɔgligbëa 'mö a dɛɛ ‑wʋä tenyii 'wlɩlɩɩ,
‑mä wa ‑nyɩɩ möä ‑glɔkʋkʋ yɔwʋ 'n wa sianiɛ ‑mä.
12 ‑Sɩbhä a za Zezwii ɔ 'yɛ,
‑mä ‑glɔkʋkʋ yɔwʋ,
‑mä ɔ 'kunɩɛ,
nzɩɩ 'ɔ dluu ‑wʋ kwliɛ a za,
nɩkpa,
'wa 'nyinyloli a gbʋʋ 'kʋä ‑gömö 'bhöö.
13 Zaa,
‑abhʋa ‑abhlɩ,
a‑a nɩ 'wlʋ ‑mä glɔ 'mö,
a‑a nɩ 'libhï zʋʋ wa 'lɩbhɔɔ 'wʋ nzɩɩ ‑a 'kɔ ‑mä ghlɩ.
14 Nyɩasɛ n'n‑ä ‑sɩbhä gbä,
‑maa mä'ä dʋdʋ 'wʋ,
‑aaa mä'ä 'kwädlɩ a glɩdɛ ‑kä.
‑A'a 'kwädlɩ a glɩda ‑gä 'yuku.
‑Mä a gbʋʋ,
mʋʋ plɛnɩnyɩɛ.
15 Zezwii a bɔɔmö a za,
‑a'a zɩkpaa 'wuë 'mö,
a‑a nɩ bhälɩ 'kwädlɩ Lagɔ,
a‑a nɩ 'ghlimanɩ ɔ 'nglɩ.
Mɩɩ glɩnɩɛ ‑a'a bʋbɔnɩluu.
16 A‑a nɩ yiyinɩ 'wʋ,
a‑a nɩ nʋ 'kwädlɩ ‑li a ‑li.
Bʋbɔnɩlii ‑yɩ nɛnɩɛ Lagɔ dlɩ yɔwʋ miɛ da'a.
17 'A 'yukugänɩwaa,
a nɩ 'zuë 'klʋkpamö,
a nɩ ‑pʋnɩ 'wa 'dɩmözʋwɛlɩɩ 'yukwli.
A ‑yi sɛ nɩɩ,
mʋa 'zʋnanyɩɛ 'yli,
a tɩa Lagɔ 'a 'yioo 'wʋ 'bhöö.
Sɛ wa nʋä ‑lɛ a libho 'laa,
Lagɔ yuë 'ylɩ ‑bhlʋ 'mö ‑sɩbhä 'wʋ 'yɩbhänɩ.
A ‑kʋä 'klʋkpamö 'zʋʋ,
'mänasɛ wa 'kää 'wa libhoo nʋ.
‑Maa 'n a 'nuë 'klʋkpamö zʋ,
a ‑kʋä yɔlɔaa,
'wa dilaa ‑wʋ yli dɔ'wʋ 'n wa 'kʋä nʋ.
Yɩ ‑kä ‑sɩbhä ‑wʋʋ,
yɩ 'naa 'kä a ‑li a ‑li 'mö ‑kä.
18 A nɩ bhibhe Lagɔ ‑aa 'wlumö 'yize.
‑A'bhï,
Lagɔ 'a libhoo ɔ nyɩanyɩɛɛ,
‑a ‑yi sɛ nɩɩ,
‑a ‑wʋʋ sasɛ nʋ dɔ'wʋ.
Sɛɛ nɛnɩɛ Lagɔ dlɩ yɔwʋʋ,
‑a tɛlɩ 'kwädlɩ sɛ ‑a 'kä ‑sɩbhä nɛmö.
19 N panyɩ ‑bɛlɩ,
a nɩ bhibhe Lagɔ wa ‑kaa 'yi 'tatinɩ n 'kä ‑pa ‑mä 'a mä'a yi.
'Bɔgʋ nɩ a 'gbëbhlenɩwɛlɩɩ
20 Lagɔ 'tɩɩglɩglɛ 'bhöönɩɛ 'möö,
mɔɔ gälaa ‑Alowli Zezwii 'n ɔ yoo glu ‑sɛ,
'n ɔ yoo ‑abhʋa ɔ ‑nʋa 'wuë a 'ylizʋnɩnyɔ 'kɔdɔ 'wʋ 'zʋa.
Zezwii 'a dluu ‑wʋ kwliɛ a za,
‑a ‑nyɛ Lagɔ 'sɔ ‑a ‑mɛnɩnɩa'a 'kwädlɩkwädlɩnɩ.
21 Lagɔ nɩ 'nyanyɩ 'mötɛɛnɔ ‑li a ‑li 'wuë ɔ yɩbhää,
a 'kɩ nʋ.
Ɔ nɩ ghlɛnɩ ‑mä Zezwii Kliisɩ 'mö,
'saa nɛnɔɔ dlɩ yɔwʋ ɔ 'kanyu mö nʋnɩ.
Zaa,
Zezwii Kliisɩ,
ɔ 'nglɩ nɩ 'ghlimanɩ 'kwädlɩkwädlɩnɩ.
‑Amɛɛ!
22 ‑Atʋayuënyɩ,
n 'kanyɩ swɩ nyɛmʋ 'mö 'pä a za,
nza n 'cɛlanyɩɛ 'bɔgʋ nɩ 'wʋ.
Wʋ'ʋä 'mö 'bhʋɔ zaa,
n bhianyɩ,
a nɩ nglu wʋ 'mö a wɛlɩɩ 'wʋ.
23 'Tɩtɩ n nyanyɩɛ dɛ'ɛ nɩɩ,
‑aa ‑daayu Timotee,
wa kɔ ‑jie 'mö ‑sɛ.
Ɔ ‑kä ‑pa mä'ä 'na mä'ä yii,
n ‑kä yie yii,
n ‑nyɔɔ 'sɔ ‑a yi yi.
24 Abhʋa Zezwii a ‑nʋa 'wuë abhʋaa ‑wʋä ‑mä,
a ‑nyɛ 'a 'yukugänɩwaa 'sɔ,
n bhälanyɩ.
A 'bhɩa Yitalii‑bhölɩɩ 'mö a ‑nʋa wa lɛ wa bhälanyɩ.
25 A 'wuë,
Lagɔ nɩ 'panyɩ 'kwädlɩ 'nyu 'yize.