Ebleewaa 11

Lagɔ a dlɩtɛɛnɩtɛnɛ

Wa laa Lagɔ a dlɩtɛɛnɩtɛnɛ miɛ nɩɩ:

‑Lu a ‑mu nɩkpɛ 'nɩɛ 'wʋ yɩlɩɩ,

‑maa ‑wʋnyɩza ɔ dlɩ 'tɛɛ 'wʋʋ,

'n ɔ kɩɛ dlɩ 'wʋ nɩɩ,

wʋ yi 'yli 'wlʋnɩ klɩpaa,

'mö wa laa dlɩtɛɛnɩtɛnɛ.

2 Dlɩtɛɛnɩtɛnɛ 'la a za bhla'mö a Lagɔnɩkpaa,

Lagɔ ‑sɛ a‑a wa 'dɩ a dɩ.

3 Lagɔ a dlɩtɛɛnɩtɛnɛ 'mö,

‑mä ‑a 'nʋnɩɛ 'mö nɩɩ,

Lagɔ,

'ɔ ngli a wɛlɩɩ,

'mö ɔ 'wälanɩɛ mä'ä 'pɩwʋ a ‑lii 'wuë 'mö.

‑Sɩbhä a za,

‑mi ‑a yɩlɩɛ 'wʋ 'mö,

‑mä ‑mi ‑aaa 'wʋ yɩlɩɛ 'bhöönɩɛ.

4 Dlɩtɛɛnɩtɛnɛ 'mö,

‑mä Abɛɛlɩ bʋbɔnɩɛ Lagɔ ‑li ‑yɩ kää dɛsɛ ‑yɩ ziɛ Kayɛɛ a ‑nɩɩ 'wʋ.

Dlɩtɛɛnɩtɛnɛ 'la a za Lagɔ 'libhoo 'mözlɔnɩnyɔ 'mö 'wʋ.

Ɛ'ɛ ‑bhö nyɩasɛ,

‑maa Lagɔ a'bhë mɔɔ gbää nɩɩ,

'ɔ bʋbɔnɩlii mɩɩ nɛnɩɛ.

Abɛɛlɩ,

ɔ yɛ abhlɩ 'ku 'wë,

‑maa 'ɔ sɛ ɔ 'tɛɛnɩ a‑a Lagɔ dlɩɩ,

‑sɩbhä zʋʋnyɩ 'dɩ 'mö 'yize.

5 Enɔɔkö 'a Lagɔ a dlɩtɛɛnɩtɛnɛ a za,

ɔ'ɔɔ 'ku ‑maa Lagɔ 'wʋ ɔ 'libhoo cuu,

'n ɔ ‑nyɔɔ yiɛ ‑mä ɔ yɔwʋ mö,

‑bɛ 'nɔa'a 'ylɩmö.

Dɛɛ Lagɔ 'nɔɔ ‑bhlɛ 'wʋ 'libhïï,

sɛ'ɛ Lagɔwɛlɩɩ nʋä nɩɩ,

Enɔɔkö,

nɩkpɛ a ‑mɔɔ nɛnɩɛ Lagɔ dlɩ yɔwʋ 'mö ɔ glɩnɩɛ.

6 'Lɩlɩlɩ a dɔ'wʋ,

nɩkpɛ,

'n ɔ 'nɩ Lagɔ dlɩ 'tɛɛnɩ,

ɔ'ɔɔ bhɛnɩ ɔ 'kɔ dlɩ yɔwʋ nɛmanɩ.

‑Ɔ ‑kä ɔ 'kä ‑mä Lagɔ yɔwʋ ghlɛɛ,

ɔ nɩ kɩ dlɩ 'wʋ nɩɩ Lagɔ ‑bhölɩ ‑tiamö,

ɔ yi ‑wa yɩbhää wa 'kɔ yɩbhlɩnɩ 'nyu 'pä.

7 Nowee a Lagɔ a dlɩtɛɛnɩ a za,

‑lii ɔ'ɔɔ 'wʋ yɩlɩ ‑maa ‑yɩ 'kää zɩkö 'yli 'wlʋnɩɩ,

Lagɔ 'nyɔɔ yɩ 'dɩɩ,

'klʋkpamö ɔ 'zoo,

'n ɔ yiɛ batoo 'kɔdʋ tɛlɩ ɔ ‑nyɛ 'ɔ ‑kosu yɔwʋ a ‑nʋa 'sɔ wa 'käa 'pʋ a za.

'Ɔ sɛ ɔ 'tɛɛnɩɛ Lagɔ dlɩɩ,

‑sɩbhä ma‑a köbhaa 'ɔ 'tɛnyɩɩ 'mö a ‑nʋä gbʋ.

'Ɔ dlɩtɛɛnɩtɛnɛ 'la,

mɛɛ kää 'nglɩ 'n Lagɔ yiɛ nɩɩ 'mö ɔ zlɔnɩɛ nʋ.

8 Ablaamö,

Lagɔ 'nyɔɔ 'dɩ nɩɩ,

ɔ nɩ ‑sɔ 'wʋ,

bhlɩɩ ɔ 'kɔɔ zɩkö 'nyɛ 'mö,

ɔ 'kä ‑mä möö,

sɛ ɔ 'tɛɛnɩɛ Lagɔ dlɩ a za,

'klʋkpamö ɔ 'zoo cuu.

Mää Lagɔ 'kɔɔ kwänɩ a'bhë,

ɔ'ɔɔ ‑bhlɛ ‑mä ‑yi,

'n ɔ yiɛ 'wʋ ‑sɔ,

'n ɔ yiɛ ‑mä ɔ 'bhele 'bhöö,

'n ɔ yiɛ mö.

9 Bhlɩɩ Lagɔ gbää ɔ 'kɔ 'nyɛ 'mö,

ɔ ghlɛɛ ‑mää,

sɛ ɔ 'tɛɛnɩɛ Lagɔ dlɩ a za,

ɔ'ɔɔ ɔnyɩ ɛ ‑lowli 'mö 'wʋ 'libhï.

‑Maa ‑gligbï zɛmö ɔ gʋʋä.

Ɔ ‑nyɛ ɔ yowli Yizaakö ‑nyɛ Yizaakö a yowli Zakɔɔbö 'sɔ,

Lagɔ 'nyɛmö a‑a 'dɩ nɩɩ,

ɔ yuë bhlɩ 'la 'nyɛɛ,

Ablaamö a saa,

‑sɩbhä wa ‑wʋmö a‑a ‑mä lɛgäwa a sɛ bhlɩ 'la 'mö.

10 Nyɩasɛ Ablaamö 'nɩɛ a ‑sɩbhä 'zʋ,

‑maa ɔ ‑yi a sɛ nɩɩ,

‑glɔ 'kɔdʋʋ ‑wʋnyɩɩ 'mö a ‑bïdii ‑nyɔnʋä glu tenyii,

Lagɔ a'bhë 'sɩbhää 'ɔ dlɩ a saa,

wʋ ‑gä 'yuku.

11 Sɛɛ Ablaamö 'tɛɛnɩɛ Lagɔ dlɩ a za,

nza ɔ ghlɩɛ 'yu.

Dɛɛ Lagɔ 'nyɔ a‑a 'dɩ nɩɩ,

ɔ yi 'yu ghlɩɩ,

‑lɛ a 'tɛnyɩ 'la 'mö,

Ablaamö yɛ gɔ 'wë,

ɔ 'lɛnglɛ Salaa a'bhë,

ɔ'ɔa'a 'yughlɩsɛ ‑wʋ.

‑Maa ‑sɩbhä yɩ ‑wʋ 'mö Ablaamö kɩ dlɩ 'wʋ nɩɩ,

wɛlɩɩ Lagɔ 'nyɔ a‑a,

ɔ yi 'yli 'wälanɩ.

‑Sɩbhä a za 'n Salaa yiɛ 'yu gwälɩ.

12 Mɩɩ kää 'nglɩ,

Ablaamö ‑ɔ yɛ a‑a gɔ 'wë 'lɩlɩlɩ,

‑ɔɔ a‑a 'yugwälɩsɛ ‑wʋʋ,

ɔ ‑bhʋlʋ ‑kpɔ 'n ɔ yiɛ ‑gligbë 'käda a dɩba 'zʋ.

Sɛɛ ‑zɛlɩ ‑nyɛ gïnyɛ yɔwʋ a bʋsɛ 'sɔ 'nɩɛ zɛlɩzɛlɩsɛ ‑wʋʋ,

‑sɩbhä ɔ 'yuë a 'yuë zumanɩɛ tenyii.

13 Nɩkpa 'la 'wuë,

wa 'tɛɛnɩ Lagɔ dlɩ ‑këë 'n wa yiɛ 'ku.

Wɛlɩɩ Lagɔ 'nyʋä a‑a nɩɩ,

ɔ yuë bhlɩ 'la 'nyɛɛ,

wa'aa yɩ 'yliwlʋnɩdaa 'ylɩmö.

‑Maa wa 'tɛɛnɔɔ dlɩ nɩɩ ɔ yi 'ylɩ ‑bhlʋ 'mö 'yli 'wälanɩ zaa,

wa ‑wʋ yɩ za 'mäna 'mö ‑këë,

'n wa yiɛ 'ku.

Wa'bhï,

sɛ'ɛ wa nʋä nɩɩ,

mä'ä dʋdʋ 'wʋ ‑mä ma‑a 'nɩɛ ‑tiamö wa 'bhele glɩnɩ,

‑maa lɛgäwa ‑nyɛ 'plɩplɩwa 'sɔ wa glɩnɩɛ mä'ä a dɔ'wʋ.

14 Wa ‑kä ‑sɩbhä nʋʋ,

mɩɩ tulanɩɛ 'ylimö nɩɩ,

'wa ‑tiamö a bhelea 'mö wa pää dlɩ 'wʋ.

15 'Wa mä'ä dʋdʋ 'wʋ a bhelea wa 'bhöö a‑a 'möö,

'mö wa 'nɩa'a dlɩ 'wʋ 'pä.

'Mö wa ‑kä a dlɩ 'wʋ 'pää,

wa yi a ‑mä 'wlu sɩbhä.

16 ‑Maa 'wa ‑tiamö a bhelea ‑a nɛnɩɛ ‑a ziɛ mä'ä dʋdʋ 'wʋ a ‑naa 'wʋʋ,

‑a ‑wʋä ‑mä zlɩ 'möö,

'mö wa yɩbhää wa 'kä 'mö mö.

‑Sɩbhä a za,

wa ‑kä Lagɔ wa Lagɔ la dɔ'wʋ ‑wʋʋ,

yɩ 'nɔɔ zʋ 'wʋ ‑bhö.

Mɔɔ gïganɩɛ wa ‑glɔ 'kɔdʋ ‑mä ɔ yɔwʋ 'wlu.

17 Ablaamö 'a Lagɔ a dlɩtɛɛnɩtɛnɛɛ a za,

Lagɔ ylɔɔ 'mö nɩɩ,

ɔ nɩ 'libhï Yizaakö 'wʋ ɔ 'kɔnyɩ bʋbɔnɩɩ,

'klʋkpamö ɔ zoo.

'Lɩlɩlɩ a dɔ'wʋ,

'ɔ yuu ‑bhlʋ ‑kpɔ mɔɔ,

ɔ 'mö,

‑lii Lagɔ gbä a‑a ɔ 'kɔ 'nyɛɛ ‑mä yɩ 'kä a‑a 'yli 'wlʋnɩ.

18 Sɛ'ɛ Lagɔ a'bhë 'nyɛ a‑a Ablaamö 'dɩ nɩɩ:

Yizaakö 'mö,

‑mä ‑na 'yuë a 'yuë 'kää 'bhöönɩ.^a

19 Ablaamö ‑yi sɛ nɩɩ,

nɩkpɛ ‑kä 'ku 'wëë,

Lagɔ bhɛnɩ ɔ 'kɔ glu ‑sɛ.

Nza Lagɔ 'nyɛnɔɔ 'wʋ 'sɔ 'ɔ yuu yowʋ.

Ɔ 'nyɛnɔnyɩɛ da'a 'wʋ 'sɔ yowʋʋ,

Ablaamö a dɔ'wʋ,

nɩkpɛ a ‑mɔɔ yɛɛ 'ku 'wë 'n ɔ yiɛ glu 'wlʋ a sɛ,

‑sɩbhä Yizaakö ‑wʋa'aa.

20 Yizaakö,

dlɩ ɔ 'tɛɛnɩmö a‑a Lagɔ,

nza ɔ 'pä a‑a ɔ yowluwa,

Zakɔɔbö ‑nyɛ Ezawii 'sɔ 'nyu,

‑yɩ lɛ 'kää bhäla ‑mä 'wa 'pɩwʋ 'mö 'yli 'wlʋnɩ a za.

21 Zakɔɔbö 'a Lagɔ a dlɩtɛɛtɛnɛɛ a za,

ɔ lɛ 'kää 'kuë yii,

'n ɔ yiɛ Zɩzɛɛfʋ a yowluwa bhʋlʋbhlʋ 'nyu 'pä,

'n ɔ yiɛ 'ɔ nɛmönɩpeyii 'wʋ ‑sɔnɩ 'n ɔ yiɛ Lagɔ a 'nglɩ 'ghlimanɩ.

22 Zɩzɛɛfʋ 'a Lagɔ a dlɩtɛɛtɛnɛɛ a za,

ɔ lɛ 'kää 'kuë yii,

'n ɔ yiɛ ɔ 'bhɩa 'dɩ 'nyɛ nɩɩ,

Lagɔ yi 'ylɩ ‑bhlʋ 'mö Yizlaɛlɩ 'a ngëyii 'mö a ‑nʋa ‑mä Ezipötɩ‑bhölɩɩ 'mö ‑sɛ zaa,

wa ‑kä möä yii,

wa ‑nyɛ 'ɔ kwaa nɩ mö.

23 Moyizɩ a ‑lowluwa 'a Lagɔ a dlɩtɛɛnɩtɛnɛ a za,

wa gwälɩɛ Moyizɩ 'wëë,

wa 'yoo 'ylɩmö nɩɩ ‑bayu ɔ glɩnɩɛ,

sɛɛ Ezipötɩ a 'bhlɩlowli gbä a‑a wa nɩ 'lɩbhä nyɩbhɛlɩyuëaa,

yɩ 'nuëë nganɔ 'lɩbha ‑maa ziza wa zizooo ‑këë,

'n 'cwɩ ta yiɛ 'plɩ.

24 Moyizɩ a'bhë ‑sɩbhä ɔ 'tɛɛnɩmö a‑a Lagɔ dlɩ.

‑Sɩbhä a za,

ɔ 'ghlimanɩɛ 'wëë,

'bhlɩlowlii a yɛnglɛ ‑ɔ 'bhʋɔ a‑a ɔnyɩ a 'yu a sɛɛ,

ɔ'ɔa'a 'yɩbhä ɔ 'kä ɔ 'nglɩ ‑gömö ‑kä.

25 Ɔ ‑yi sɛ nɩɩ,

'mäna 'nyinylolinʋnwɛ 'lɩbhaa nɩkpɛɛ,

'plɩplɩla a glɩnɩɛ zaa,

ɔ 'naa 'yɩbhä,

‑maa sɛ wa 'yɩaa Lagɔ a ‑nʋa ‑muë'la 'wuë 'klɩɩ,

wa 'kɔ ‑sɩbhä 'klɩ 'yɩamö,

'mö ɔ ‑sɛɛ ‑lɛ.

26 Ɔ dɔ'wʋ,

wa ‑kɔɔ Puënyɔɔ Lagɔ 'kää bhäla tie a saa ‑di ziaa,

mɩɩ nɛnɩɛ mɩɩ ziɛ Ezipötɩ a lɩɩ 'wuë a ‑käkʋ 'wʋ.

Nyɩasɛ ɔ'ɔɔ ‑sɩbhä dlɩ 'pä,

‑maa ɔ yɩlɩ ‑mä 'yuku 'pɛnaa ɔ 'kää ghlɩ 'wʋ.

27 Moyizɩ 'a Lagɔ a dlɩtɛɛnɩtɛnɛ a za,

ɔ'ɔɔ 'bhlɩlowli 'a klɛɛ ‑gu,

ɔ ‑nyɛ Yizlaɛlɩ a ngëyi 'sɔ 'n wa yiɛ ‑mä Ezipötɩ‑bhölɩɩ 'mö 'bhöö.

'Ɔ dlɩɩ ‑nyɔnʋ ɛ kä ‑bhɩɛ Lagɔ ‑bɛ 'nɩɛ 'wʋ yɩlɩɩ,

'mö ɔ yɩlɩ 'wʋ.

28 Moyizɩ 'a Lagɔ a dlɩtɛɛnɩtɛnɛ 'la a za,

Lagɔ 'nyɔɔ 'dɩ nɩɩ,

wa nɩ 'lɩbhä bhʋlʋbhlʋ 'bhlawadɩgba,

wa nɩ 'mlɩ a dluu ‑lɛ ‑gblii nuë 'wʋ,

nzɩɩ Lagɔzuzukwëa ‑a yɛlaa sɛ ‑kä Ezipötɩ a ‑nʋa 'a tɛkäyuëa 'lɩbhää yii,

a 'kä wa ‑nʋa yɛ'mö bhlɩɩ,

'n ɔ yiɛ ‑sɩbhä zʋ.

29 Ɔ ‑nyɛ Yizlaɛlɩ a ‑nʋa 'wuë 'sɔ,

wa 'bhööä Ezipötɩɩ,

'nyu 'kɔdʋʋ wa laa gïnyɛzlɛ,

Lagɔ 'mö wa 'tɛɛnɩ'ɛɛ dlɩ,

nza wa 'tʋnuä kplɩ 'mö,

nyuu 'nuëë tɛkäsɛ a'bhë ‑zlɛlɛ päla 'lɩlɩlɩ.

‑Maa wa 'plɩɛ 'wëë,

Ezipötɩ a ‑nʋa ‑wa kpëtuë a‑a,

wa yɩbhä a wa 'kä 'tʋmö 'n nyuu yuëë 'wlu 'mänanɩ,

'n wʋ yuëë 'lɩbhä.

30 ‑Mä Lagɔ a dlɩtɛɛnɩtɛnɛɛ 'mö,

Yizlaɛlɩ a ‑nʋa binɩɛ ‑glɔ 'kɔdʋʋ Zelikoo a gbëa 'ylɩ ngbi'sɔ 'mö 'wʋʋ,

wʋ 'kpakwëa ‑a ‑binɩɛ ‑glɔɔ,

bhli a bhliɛ.

31 ‑Mä ‑glɔ 'la 'mö a 'tutunglɔ wa laa Ghlaabö,

‑sɩbhä ɔ 'tɛɛnɩmö a‑a Lagɔ dlɩ.

‑Sɩbhä a za,

nɩkpaa Yizlaɛlɩ a ‑nʋa tiee ‑mä 'ɔ ‑glɔɔ 'möö,

ɔ 'nuëë ɔ ‑gblɩwa 'mö 'wʋ 'libhï,

‑maa Lagɔ a za,

päla ɔ pölʋää.

Yɩ za,

ɔ 'bhɩa ‑muë'la ‑wa ‑sɛ a‑a Lagɔ 'klʋkpamöö,

ɔ'ɔɔ wa saa 'yli bhɩɛmö.

32 ‑Mi n 'kä bhäa'a bhïla nɩ?

N ‑kä n 'kä Zedeɔɔ mɔ,

Balaakö mɔ,

Samösɔɔ mɔ,

Zɛfötee mɔ,

Daviidɩ mɔ,

Samiɛlɩ mɔ,

'n Lagɔ 'a 'möbhïlanɩwaa 'sɔ a dɛ bhïla nʋʋ,

‑kɛkɛ yi zlɩ 'bhɛ.

33 Nɩkpa 'la 'wuë,

Lagɔ 'mö wa 'tɛɛnɩmö a‑a dlɩ.

‑Sɩbhä a za,

‑muë ‑nyɛ bhlɩ ‑mimii gwɩɛ tʋ 'n wa yiɛ 'gbë 'mö ‑sɛ.

‑Mumuë 'kämanɩ 'mözlɔnɩsɛ,

‑mumuë,

wɛlɩ ‑mimii Lagɔ 'nyʋää,

wa 'yɩ yɩ 'yliwlʋnɩdaa 'ylɩmö.

Wa 'pä ‑mumuë slukwi 'yli,

yɩ 'nuëë ‑lu nʋ.

34 ‑Mumuë 'ngïma ‑kosugbagbʋ.

‑Mumuë,

'wa ‑gblɩwaa yɩbhä a wa 'kʋä ‑gbëlie 'pä wa 'kä 'ku,

'n Lagɔ yuënyɩɛ ngli ‑sɛ.

‑Mumuë 'nɩ a 'mötɛɛnɔ ‑kä 'n Lagɔ yuëë 'mötɛɛnɔ 'nyɛ.

‑Mumuë 'zʋ kanɩwa,

'wa ‑gblɩwaa wa ‑nyɛɛ gwɩɛ tʋ 'n wa yuëë gwë kwänɩ.

35 Ngwlɩ ‑mumuë,

'wa nɩkpaa ‑wa yɛ a‑a 'ku 'wëë,

Lagɔ gölʋä 'n ɔ yuënyɩɛ yowʋ 'nyɛ.

Nɩkpa ‑mumuë,

wa nglu 'zwɩzigbʋ,

wa'aa 'yɩbhä wa 'kʋänyɩ ngli ‑sɛ.

Ɛ'ɛ ‑bhö nyɩasɛ,

‑maa wa ‑yi sɛ nɩɩ,

wa ‑kä 'ku 'wëë,

Lagɔ yuë gäla ɔ yuë glu ‑sɛ,

wa yi ‑mä ɔ yɔwʋ sasɛ ‑bhölɩnɩ.

36 ‑Mumuë,

wa nɛpʋä,

wa 'sɛlɩnuë ‑kplɩya 'mö,

wa gwanuë 'gogwi,

'n wa yuëë ‑jie 'mö 'pä.

37 Wa 'lɩbhä ‑mumuë 'kpɩ 'n wa yiɛ 'ku,

wa ‑dɩ ‑mumuë 'kïbhï 'sɔ 'mö,

wa 'pä ‑mumuë ‑gbëlie 'n wa yiɛ 'ku.

‑Mumuë,

wa'aa glɩdɛ ghlɩ,

saa 'wuë,

‑sɩbhä wa nɛmöä,

'pʋäwa wa glɩnɩɛ,

wïlakwibanɩ wa ‑plaa 'mö,

‑gblɩ wa ‑gbïluëë,

‑lizokuu a kii 'wuë 'mö wa nuëë 'wlu.

38 ‑Mä 'muse 'klʋ 'n ‑mä ‑gägö 'wlu ‑mä wa nɛmö a‑a.

‑Mä ‑gägö 'mö 'n ‑mä 'bhʋkʋ ‑mimii 'mö,

‑mä wa gʋʋ a‑a.

Ɛ'ɛ ‑bhö nyɩasɛ,

‑maa mä'ä 'pɩwʋ a nɩkpaa ‑wa kpëtuëë sa'aa,

wa'aa 'kɩ wa jijo'wʋglɩsɛ ‑wʋ.

39 Nɩkpa 'la 'wuë,

wa 'tɛɛnɩ a‑a Lagɔ dlɩɩ,

ɔ sɛ wa 'dɩ a dɩ.

‑Sɩbhä yɩ ‑wʋ 'mö,

'ɔ wɛlɩɩ ɔ 'nyʋä a‑a,

wa'aa a yɩ 'yliwlʋnɩdaa 'ylɩmö.

40 Nyɩasɛ yɩ'ɩɛ ‑sɩbhä 'wʋ 'plɩ,

‑maa ‑li a ‑mii nɛnɩɛ ‑yɩ ziɛ 'wʋʋ,

yɩ ‑wʋ ‑lɛ ‑aa za.

Lagɔ yɩbhä nɩɩ,

wa ‑nyɛ ‑abhʋa 'sɔ,

‑a 'kä 'gämö yɩ 'yliwlʋnɩdaa 'ylɩmö.