Ebleewaa 10

Moyizɩ 'a Gböö a wɛlɩɩ,

‑li a ‑lii ‑yɩ 'kää bhäla 'yli 'wlʋnɩɩ,

yɩ ‑dɩdlɛna a 'yize yɩ glɩnɩɛ cuu,

‑maa ɛ'ɛ ‑bhö yɩ ‑gbaabhï mi.

Gbö 'la,

yɩ lɛ naa,

nɩkpaa nɩ bʋbɔnɩ Lagɔ ‑li 'wa 'nyinylolii a za.

'Ylʋböö 'wuë 'mö wa nɩ 'zʋ 'kwädlɩ ‑sɩbhä 'yize,

nzɩɩ wa ‑nyɛ Lagɔ 'käa 'wʋ ‑wʋnɩ.

‑Maa ‑tiamö a dɔ'wʋ,

bʋbɔbʋbɔsɛ 'la,

sɛ yɩ sʋlʋnɩɛ,

‑sɩbhä 'nɩɛ bhɛnɩ a 'kä ‑tiamö nɩkpɛ 'wlɩlɩ päla.

2 'N ‑sɩbhä ‑kä a bhɛnɩ a 'kä nɩkpa ‑tiamö 'wlɩlɩ pälaa,

wa yi a bʋbɔbʋbʋ 'la kɛ'mö ‑sɛ.

Ɛ'ɛ ‑bhö nyɩasɛ,

‑maa wa yi a sɛ yɩbhlɩmanɩ nɩɩ,

wa yɛ 'gämö ‑gämö 'wlɩlɩ plɛnɩ zaa,

wa'a 'nyinyloli a gbʋʋ ‑gömö ‑kä.

3 ‑Maa 'wa sɛ wa bʋbɔnɩɛ Lagɔ nɩmadluu 'ylʋbö 'wuë 'möö,

'wa 'nyinylolii,

'mö ‑sɩbhä ligbanuëë 'wʋ cuu.

4 Ɛ'ɛ ‑bhö nyɩasɛ,

‑maa bhilaa ‑nyɛ väköö 'sɔ a dluu wa bʋbɔnɩɛ,

wʋ'ʋä bhɛnɩ wʋ 'kä nɩkpa 'wa 'nyinylolii a gbʋʋ ‑gömö ‑sɛ.

5 Nza Kliisɩ yiɛ mä'ä dʋdʋ 'wʋ,

'n ɔ yiɛ Lagɔ a dɛ nɩɩ:

Nɩma ‑nyɛ bʋbɔnɩli ‑mimii 'sɔ,

mö ‑n ‑nɩɩɛ 'yɩbhänɩ n ‑kami bʋbɔnɩ,

‑maa ‑n nyɩaa kpökpa,

6 bʋbɔnɩnɩma a ‑mi wa siaa ‑na 'nglɩ 'möö,

'n ‑mi nɩkpa lɛmöä 'wa 'nyinylolii a za‑a,

mɩɩ ‑nɩmöä 'mäna 'wʋ ‑bhö.

7 Nza n nʋä nɩɩ:

‑Atʋ Lagɔ,

‑amöä dɛ'ɛ

n yɛ yi,

sɛ ‑n 'yɩbhää,

n 'kä ‑sɩbhä 'zʋ.

Sa'a ‑sɩbhä yɩ cɛlɩɛ na dɛ,

‑mä ‑na'a wɛlɩɩ a 'bɔgʋʋ 'mö.^a

8 Tɛkädɔ'wʋ,

sɛ'ɛ ɔ nʋä nɩɩ:

Nɩma ‑nyɛ bʋbɔnɩli ‑mimii 'sɔ 'mö Lagɔ 'nɔɔ 'yɩbhänɩ ɔ 'kɔnyɩ bʋbɔnɩ.

Bʋbɔnɩnɩma a ‑mi wa siaa Lagɔ a 'nglɩ 'möö,

'n ‑mi nɩkpa lɛmöä 'wa 'nyinylolii a za‑a,

mɩɩ 'nɔɔ 'mäna 'wʋ ‑bhö.

‑A ‑yi sɛ nɩɩ,

Gböö Lagɔ 'nyɛ a‑a Moyizɩ mɩɩ gbää wa nɩ bʋbɔnɩ ‑li 'la.

‑Maa ‑sɩbhä yɩ ‑wʋ 'mö 'n Zezwii yiɛ sa'a gbä.

9 'Sɔnadɔ'wʋ,

sɛ'ɛ ɔ nʋ'ɛɛ nɩɩ:

‑Amöä dɛ'ɛ,

n yɛ yi,

sɛ ‑n 'yɩbhää n 'kä ‑sɩbhä 'zʋ.

Zaa,

ɔ ‑kä ‑sɩbhä gbää,

bhla'mö a bʋbɔbʋbɔsaa,

‑sɩbhä ɔ ‑sɛɛ sɛ,

'n ɔ yiɛ ɔnyɩ bhla'mö a bʋbɔnɩlii 'wuë a 'bhle 'mö zʋ.

10 Nza n gbää nɩɩ,

Zezwii Kliisɩ,

sɛ ɔ 'zʋä da'a sɛɛ Lagɔ 'yɩbhää 'tɩɩ,

'n ɔ yiɛ ɔnyɩ Lagɔ bʋbɔnɩ 'wʋ ‑bhlʋ ‑kpöö,

‑sɩbhä ma‑a kää 'nglɩ,

a‑a yiɛ 'wlɩlɩ plɛ 'lɩlɩlɩ.

11 Zwiiföwaa 'a Lagɔbʋbɔwaa,

sɛɛ zila zɩɛ 'yizee,

‑sɩbhä wa möä ‑mä Lagɔgligbëa 'mö,

'n wa nʋä 'wa Lagɔbʋbɔlibhoo.

'Kwädlɩ wa lɛmöä 'wa bʋbɔnɩlii,

‑maa yɩ 'wuë yɩ'ɩɛ bhɛnɩ yɩ 'kä nɩkpɛ 'nyinyloli a gbʋ ‑gömö ‑sɛ.

12 ‑Maa Kliisɩ ɔbhlɩ,

'wʋ ‑bhlʋ ‑kpöö ɔ bʋbɔnɩɛ ɔnyɩ Lagɔ nɩkpaa 'wuë 'a 'nyinylolii a za,

'n ɔ yiɛ ‑mä Lagɔ a luukɛ 'wʋ sɛ glɩɛ mö.

13 ‑Mä ɔ 'käa'aa glɩ ‑këë,

Lagɔ 'kä 'ɔ ‑gblɩwaa 'wuë ‑mä ɔ kplɩzɛmö 'zʋ.

14 Nɩkpaa Kliisɩ ‑sɛɛ 'wa 'nyinylolii a gbʋʋ ‑gömöö,

'ɔ sɛ ɔ bʋbɔnɩɛ ɔnyɩ Lagɔ 'wʋ ‑bhlʋ ‑kpöö,

‑sɩbhä ma‑a kää 'nglɩ 'n wa ‑nyɛ Lagɔ 'käa'aa ‑sɩkaa 'kwädlɩ 'wʋ ‑wʋnɩ 'tɩɩ.

15 'Wugɔmʋʋ 'Wlɩlɩ a'bhë mɔɔ 'zʋä wɛlɩ 'la kɛ ‑gömö nɩɩ,

‑tiawɛlɩɛ.

Sɛ'ɛ ɔ gbää nɩɩ:

16 ‑Alowli lɛ naa:

Ylɩ 'la ‑kä 'plɩ 'wë a mɛnɩnɔɔn ‑nyʋä 'kää mɛnɩnɩɩ,

muä dɛ'ɛ:

N yuë 'nɛɛnɔ 'nyɛ wa 'käa sasɛ 'na wɛlɩɩ yɩbhlɩnɩ,

na'bhë ‑mä n 'kɩɛ wa dila zɛmö 'zʋ,

'n n 'kɩɛ ‑mä wa 'wlu 'mö 'cɛlɩ. ^b

17 'N ɔ yi'ɛɛ nɩɩ:

N 'naa 'kä 'wa 'nyinylolii ‑nyɛ 'wa ‑bhölɩbhölɩsɛzokwëa 'sɔ 'wʋ ligbanɩ.^c

18 Zaa,

Lagɔ ‑kä nɩkpɛ a 'nyinylolii 'yi 'tatinɩ 'wëë,

ɔ ‑libʋbɔnɩbʋbɔnɛ 'nɩa'a ‑bhölɩ.

Dɛ a kää sɛ a nɩ nyɔnʋ ‑lɛ kɛ

19 ‑Atʋayuënyɩ,

Zezwii ‑ɔ bʋbɔnɩɛ ɔnyɩ Lagɔ,

'ɔ dluu a za,

Lagɔgligbëa a dɛɛ ‑wʋä 'wlɩlɩɩ,

‑a bhɛnɩa'a ‑a 'kä 'mänasɛ ‑lɛ plɛ.

20 'Yioluluu ɔ ‑sɛɛ,

mʋʋ ‑dɩnɩɛ Lagɔgligbëa 'mö a ghlidoo 'kɔdʋʋ 'mö.

'Yio 'la,

'ɔ kpökpaa ma‑a,

mʋʋ nyɛɛ ‑tiamö a ‑bhölɩbhölɛ.

21 Nza n gbää nɩɩ,

‑a'a Lagɔbʋbɔnyɔɔ,

'ghïli ɔ 'ghïliɛ,

mɔɔ glɩnɩɛ Lagɔbuduu a 'kifii.

22 Zaa,

a‑a nɩ 'dionɩ Lagɔ yɔwʋ dlɩ a dlɩ 'mö,

'n ‑mä ‑a'a dlɩ'wʋkänɔɔ 'wuë 'mö.

‑A'a dilaa nɩ ‑wʋ 'wlɩlɩ,

‑a'a 'mlɩwʋnuëyii nɩ ‑tɩnyɩ gbʋ köbha,

‑a'a kpökpaa nɩ ‑wɔlʋnɩ 'wlɩlɩwʋnyu.

23 Dlɩ'wʋtɛɛnɔɔ,

‑wʋnyɩ 'dɩ ‑a nyɛɛ nɩkpaa,

a‑a nɩ nyɔnu kɛ.

Ɛ'ɛ ‑bhö nyɩasɛ,

‑maa Lagɔ,

sɛ ɔ gbää,

‑sɩbhä ɔ zʋä 'kwädlɩ.

24 A‑a nɩ 'zʋzʋnɩ 'dɩ 'mö,

‑a 'kä 'kwädlɩ ‑wawanɩ 'yize,

‑li a ‑li a nʋnʋ dɔ'wʋ,

‑a 'kä 'yli yɔwʋ 'tɛɛ.

25 ‑A ‑kä 'kwädlɩ Lagɔ 'a wɛlɩɩ a za 'wlu 'yɩbhä a nɩkpa ‑waa yimöa'a,

a‑a nɩ tɩ wa saa 'zʋ,

‑maa ‑a 'wuë,

a‑a nɩ 'päpänɩ swɩ nyɛmʋ 'mö 'yize.

Nyɩasɛ n'n‑ä ‑sɩbhä gbä ‑maa,

‑Alowli Zezwii 'a yiyizlɩɩ,

ɛ yɛ 'dio 'wë.

26 ‑Atʋayuënyɩ,

‑a yɛ'ɛ Lagɔ 'a ‑tiamö a wɛlɩɩ yɩbhlɩnɩ 'wëë,

a‑a ‑käa'a ‑sɩkaa ‑disɛsɛ 'nyinyloli nʋʋ,

bʋbɔnɩli ‑mimii ‑yɩ ‑kanyɩɛ 'nyinyloli 'la a gbʋ ‑gömö ‑sɛɛ,

yɩ'ɩa'a ‑bhölɩ.

27 ‑Maa Lagɔ 'a ‑zijle 'kädaa ‑a 'kää 'mö 'tɛɛ,

a ‑nyɛ ‑kosu 'kɔdʋʋ ‑wʋ 'kää 'ɔ ‑gblɩwaa 'wuë 'yli bhɩa 'sɔ,

mɩɩ ‑kʋnɩnyɩa'aa cuu.

28 ‑A ‑yi sɛ nɩɩ,

Moyizɩ 'a Gböö,

nɩkpɛ a ‑mɔɔ ‑kɩɩ 'klʋkpamö ‑sɛɛ,

nɩkpa 'sɔ nɩkpa ta ‑kɔɔ 'ylɩmö,

'n wa ‑kɩɩ ‑sɩbhä ‑zijlituwaa a 'yila 'klʋ ‑sɛnɩɩ,

‑sɩbhä a nɩkpɛ 'la,

‑bɛ 'nɩ 'päa'a ɔ ngäzɩdlɩ,

‑maa 'lɩbhä wa lɩbhɔɔ 'n ɔ kuä.

29 Yɩ ‑wʋ'ɛ sa'a Gböö a dɔ'wʋ 'möö,

mɛɛ 'kä zi'e nɩkpɛ a ‑mɔɔ ‑kä Lagɔ 'a Yuu 'ylimö fälanɩ,

ɔ ‑kɔɔ ‑gömö panɩɩ,

sɛɛ 'ɔ wɛlɩɩ 'kä bhäa'a ɔbhlɩ 'mö ‑wʋ 'nɩ?

‑Sɩbhä a nɩkpɛ 'la,

Zezwii 'a dluu ‑wʋ kwli a‑a nɩkpa ‑nyɛ Lagɔ 'kä ‑mɛnɩnɩ a za‑a,

wʋ kɔ 'ɔ 'nyinylolii a gbʋʋ ‑gömö ‑sɛ 'wë 'n ɔ yuä kplɩ sɛ tlinɩ,

'n ɔ yi'ɛɛ 'gämö 'Wugɔmʋʋ 'Wlɩlɩ ‑ɔ kää nɩkpa a ngäzɩdlɩ ‑di zia,

zaa ɔ ‑nɩɩ 'mö yɩ 'kää tenyii 'tɛɛ.

30 Sɛ'ɛ yɩ cɛlɩɛ nɩɩ:

Na'bhë,

‑amöö 'kää kpa ‑sɛ.

‑Lizokuu 'wuë nɩkpa nʋä,

‑amöö 'kʋää yɩ 'pɛna 'nyɛ.^d

‑Ɔ gbää sa'aa,

‑a ‑yoo.

Sɛ'ɛ ɔ nʋ'ɛɛ nɩɩ:

‑Alowli Lagɔ,

ɔ yi ɔ ‑nʋa 'wuë ‑zijli tu.^e

31 Nza n gbää nɩɩ,

‑ɔ ‑kä Lagɔ ‑ɔ ‑bhölɩ ngli bhlinɩɩ,

ɔ ‑nɩɩ 'mö yɩ 'kää tenyii 'tɛɛ.

32 Zaa,

sɛ a ‑gänɩ a‑a bhla'mö Lagɔ,

a nɩ ligbanɩ ‑sɩbhä 'wʋ.

‑Lɛ a 'tɛnyɩ 'la 'mö a dɔ'wʋ,

a yɩbhlɩnɩɛ Lagɔ 'wëë,

'zwɩ a ‑bɛ wa zianyɩɛ 'ɔ wɛlɩɩ a za.

‑Sɩbhä yɩ ‑wʋ 'mö,

‑maa swɩ 'nanyɩɛ yɔwʋ 'kunɩ.

33 'Tɛnyɩ ‑mɛmɛɛ 'mö,

nɩkpabhë a 'yila 'klʋ wa zianyɩ ‑di,

wa nʋanyɩ ‑lizoku a kii 'wuë 'wlu.

‑Muë wa 'zʋmöö ‑sɩbhää,

a 'nuë nimï 'bhöö.

34 Nɩkpa ‑mumuë wa 'pää Zezwii 'a wɛlɩɩ a za ‑jie 'möö,

‑mä 'wa 'zwɩzizee 'mö,

a 'nuëë nimï 'bhöö.

'A ‑gblɩwaa ‑saanyɩɛ ‑glasɛ 'a ‑lii 'wuë kä'möö,

'mänasɛ a 'tatiniiɛ 'yi.

Ɛ'ɛ ‑bhö nyɩasɛ,

‑maa a ‑yi sɛ nɩɩ,

'saa Lagɔ 'nyanyɩɛ,

wʋ kä tenyii dɛsɛ wʋ zi 'saa wa ‑saanyɩɛ kä'mö 'wʋ,

wʋbhlɩ,

‑bɛ 'naa 'kanyua'a kä'mö ‑sɛ.

35 Sɛ a 'tɛɛnɩ a‑a da'a Lagɔ dlɩɩ,

a nɩ 'tɛɛnɔɔ ‑sɩbhä dlɩ 'yize.

A ‑kä ‑sɩbhä zʋʋ,

Lagɔ yeanyɩ yi 'ylimö a ‑lu 'kɔdʋ 'nyɛ.

36 Nza n gbää nɩɩ,

dɛ a kää sɛ,

a nɩ nyɔnʋ ‑lɛ kɛ,

'saa nɛnɩɛ Lagɔ dlɩ yɔwʋʋ,

a 'kʋ nʋ ‑këë,

a 'kä ‑mä 'gbë 'wʋ ghlɛ,

nzɩɩ 'saa ɔ gbää ɔ 'kanyɩ 'nyɛɛ,

a 'kʋa ghlɩ.

37 Ɛ'ɛ ‑bhö nyɩasɛ,

‑maa sɛ'ɛ Lagɔwɛlɩɩ nʋä nɩɩ:

‑Ɔ 'kä a yii,

ɔ yi yi.

‑Lɛ 'naa 'käa'a 'mö gwälɛ 'n ɔ 'kää yi.

38 ‑Ɔ zlɔnɩɛ 'mö Lagɔ a 'yila 'klʋ a dɔ'wʋʋ,

ɔ sɛ ɔ 'tɛɛnɩɛ Lagɔ dlɩ a za‑a,

mɔɔ 'kää ‑bhölɩ.

‑Maa ‑ɔ ‑kä na dlɩtɛɛnɩtɛnɛ kɛ'mö ‑sɛɛ,

ɔ 'naa ‑kaa dlɩ yɔwʋ nɛnɩ.^f

Sa'a Lagɔ gbää.

39 ‑Abhʋa ‑abhlɩ,

nɩkpa a ‑muë 'kää Lagɔ a dlɩtɛɛnɩtɛnɛ kɛ'mö ‑sɛ ‑wa 'kää ‑sɩbhä a za 'yli bhɩɛɛ,

mö ‑a 'nɩɛ glɩnɩ.

‑Maa ‑a yi 'kwädlɩ Lagɔ dlɩ 'tɛɛnɩ ‑këë,

‑a yi ‑tiamö a 'pʋpʋɛ ghlɩ.