Filiipö a ‑nʋa 3

'Mözlɔnɩzlɔnɛɛ ‑ɛ nɛnɩɛ Lagɔ dlɩ yɔwʋʋ

‑Atʋayuënyɩ,

‑yɩ 'kanyɩɛ 'yukwli 'mö tʋʋ miɛ nɩɩ:

Sɛ a ‑glɛɛ ‑Alowli 'wʋʋ,

‑sɩbhä nɩ ‑bhöanyɩ 'mäna 'wʋ.

N 'cɛlanyɩɛ 'wʋ a sɛ n gbä a‑a,

n 'kä ‑sɩbhä gbä 'yize a dɔ'wʋ yɩ ‑nɩɩɛ yɔlɔa.

Yɩ nɛnɩ a dɔ'wʋ,

nzɩɩ a tia 'wʋ dlʋ.

2 A gla'mö a ‑lizokunʋwaa,

‑wa nʋä 'zokwësɛ Lagɔ 'a libhoo,

a nɩ 'nɛmanuë 'wʋ,

ɛ'ɛ ‑bhö nyɩasɛ,

‑maa 'zokwësɛ wa 'cɩaa 'wʋdɩdɛ a wɛlɩɩ.

3 ‑Maa ‑abhʋa abhlɩ,

Lagɔ 'a 'Wugɔmʋʋ mɔɔ ‑wʋnyɩɛ ‑gömö,

mɔɔ kää 'nglɩ a‑a bʋbɔɔ sasɛ Lagɔ.

Zezwii Kliisɩ a 'yize mö ‑a 'tɛɛnɩɛ dlɩ,

‑maa ‑anyɩ ‑a 'nɩɛ dlɩ 'tɛɛnɩ.

Nza n gbää nɩɩ ‑wa dɩ‑ɩɛ ‑tiasɛ 'wʋʋ,

‑abhʋaa.

4 'Lɩlɩlɩ a dɔ'wʋ ‑amö,

n bhɛnɩ a n 'kä nanyɩ dlɩ 'tɛɛnɩ.

Wa ‑kä a nɩɩ ‑ɔ bhɛnɩ bhä ɔ 'kä ɔnyɩ 'wʋ 'pä nʋʋ,

‑amö ɛ 'kä a‑a glɩnɩ.

5 Ɛ'ɛ ‑bhö nyɩasɛ,

‑maa Yizlaɛlɩ 'a ngëyii Lagɔ ‑sɛɛ ‑lɛ,

ɛ 'mö a nɩkpɛɛ gwälɩɩɛ,

Bɛzamɛɛ 'a ‑gligbëa 'wʋ a nɩkpɛɛ.

Wa gwälɩɩɛ a ylɩɩ a ‑gbʋätanɛɛ 'mö 'n wa ‑yiiɛ 'wʋ ‑dɩ.

Ebleeyii n glɩnɩɛ,

Na dɩba a dɩbawa 'wuë,

Ebleewaa.

'N ɛ ‑kä a 'yɛ ‑abhʋa Zwiiföwaa 'a gböö a 'klʋkpamözʋ dɔ'wʋʋ,

Falizɩɛwaa ‑wa ‑gäniɛ 'tɩɩ,

'wa ‑zɩkpaa 'mö,

‑mä n ‑wʋmö a‑a.

6 ‑A'a gböö a dɔ'wʋ,

ku 'mö n ‑su a‑a tenyii,

'n n 'yɩ a‑a ‑sɩbhä a za Zezwii Kliisɩ a ‑nʋa 'klɩ.

Zaa,

‑a'a gböö sɛ n zwi a‑a yɩ 'wuë 'klʋkpamö a za,

‑bɛ 'nɩɛ a bhɛnɩ ɔ ‑kaa nuë 'wʋ kwä.

7 ‑Maa ‑li 'la 'wuë n tɛkpɔnɩ a‑a ‑zʋnɩ 'möö,

n ‑kɩɩa'a ‑sɩkaa 'wʋ yɩlɩɩ,

nyɩasɛli yɩ glɩnɩɛ Kliisɩ a za.

8 ‑Tiamö,

'pɩwʋ a ‑lii 'wuë,

n ‑kɩɩa'a ‑sɩkaa 'wʋ yɩlɩɩ,

nyɩasɛli yɩ glɩnɩɛ.

Ɛ'ɛ ‑bhö fʋ,

‑maa sɛ n yɩbhlɩnɩɛ Zezwii Kliisɩ na ‑Lowli 'möö,

‑sɩbhä ma‑a ‑kaaa dɛsɛ tenyii,

‑sɩbhä ma‑a ziɛ ‑mi'la 'wuë 'wʋ.

Sɛ'ɛ n gbää nɩɩ,

‑li 'la 'wuë,

yɩ'ɩa'a dɛsɛ kä na dɔ'wʋ.

N ‑kɩɩ 'wʋ yɩlɩ,

yɩ 'kä ‑bhɩɛ klɛka,

n 'nia'a dlɩ tɛɛnɩ,

Kliisɩ a 'yize a ‑nɔ n glɩnɩa'aa.

9 'Mö n yɩbhää n 'kä 'kwädlɩ 'wʋ ‑glɛ.

N 'kä Lagɔ dlɩ yɔwʋ nɛmanɩ sɛ n zʋä Moyizɩ 'a Gböö 'klʋkpamö a za‑a,

'mö n'n‑a'a sɛ tɛlɩ.

‑Maa 'n n ‑kä Lagɔ dlɩ yɔwʋ nɛnɩɩ,

Lagɔ a'bhë mɔɔ kää 'nglɩ,

mɔɔ nɛmanɩɩɛ ɔnyɩ dlɩ yɔwʋ sɛ n 'tɛɛnɩɛ Zezwii Kliisɩ dlɩ a za.

10 ‑Sɩbhä a za,

n yɩbhä n 'kä sasɛ Kliisɩ yɩbhlɩnɩ,

Lagɔ 'a 'mötɛɛnɔɔ ‑wʋ ‑sɔɔɔ gluu,

n 'kʋ'ɛ yɩbhlɩnɩmö,

sɛ ɔ ziɛ 'zwɩ,

n 'kä ‑sɩbhä 'zwɩ zimö,

sɛ ɔ 'kuä,

n 'kä ‑sɩbhä 'kumö.

11 ‑Lɛ a dɔ'wʋ na dlɩ 'tɛɛ 'wʋ nɩɩ,

Lagɔ ‑yii ‑mä 'kuduwaa gla'mö ‑sɛmö.

12 N ‑kä ‑sɩbhä nʋʋ,

ɛ'ɛ ‑bhö nɩɩ n yɛ ‑mä 'gbë 'wʋ ghlɛ 'wë,

'n sɛ n 'kää zɩkö ‑wʋ 'tɩɩ,

‑sɩbhä n ‑wʋ ‑bhlɛ dɛ'ɛ nʋ.

‑Lii n 'kää zɩkö ghlɩɩ n'n‑ä ‑bhlɛ yɩ 'wuë kä'mö ‑kä,

‑maa na'bhë Zezwii Kliisɩ kä'mö ‑mä n ‑wʋä,

nza n 'tɛmanɩɛ 'mö 'yize n 'kä 'yukusɛ mö.

Pɔɔlʋ lɛ wa nɩ ‑gänɩ 'ɔ gbäpöö

13‑14 ‑Atʋayuënyɩ,

‑amö na a,

sɛ'ɛ n'n‑ä nɩɩ 'saa Lagɔ gbää ‑a 'kä ghlɩɩ,

n kɩ 'gämö ghlɩnɩ 'wë nʋ.

‑Maa sɛ n zʋä ‑sɩbhä ma‑a nɩɩ:

Sɛɛ guëguënyɔ 'tɛmanɩ'ɛ 'mö,

ɔ 'kä tɛɛ glɔ ghlɛ wa 'kɔ ‑lu 'nyɛɛ,

‑sɩbhä n zʋä.

Miɛ nɩɩ ‑mä 'yuku mää 'na dlɩɩ gööä 'yi,

‑mä n mönɩɛ klɩpaa,

‑maa n'n 'lɛ nimï,

nzɩɩ 'pɩwʋlelea Lagɔ wäzɩnɩɩɛ Zezwii Kliisɩ a bɔɔmö a za 'wʋʋ,

n 'ka ghlɩ.

15 Zaa,

‑a 'wuë ‑abhʋa yɛɛ ‑mä Zezwii 'a wɛlɩɩ 'mö ‑jɩbhɛnɩɩ,

a‑a nɩ 'pä sɛ ‑bhʋlʋ dlɩ.

‑Maa 'n a 'nɩ kïbhë 'mö ‑wanɩɩ,

Lagɔ a'bhë,

ɔ yeanyɩ sʋlʋnɩ,

a yea sasɛ 'mö 'nʋ.

16 Miɛ abhlɩ da'a,

‑maa kïbhë ‑ma ‑a yɛɛ 'gämö 'mö 'nʋnɩ 'wëë,

sɛ a gbää,

a‑a nɩ nɛmö ‑sɩbhä.

17 ‑Atʋayuënyɩ,

a nɩ ‑gänɩ 'na gbäpöö.

Sɛ n nɛmöä,

‑wa nɛmömöä ‑sɩbhä,

a nɩ ‑gänɩ'ɛ 'wa gbäpöö.

18 Nyɩasɛ n'n‑ä ‑sɩbhä gbä,

‑maa ‑mumuë a ‑bɛ ‑wʋ ‑lɛ.

Sɛ wa nɛmöä,

‑sɩbhä 'nɩɛ nɛnɩ.

N kanyɩ a ‑pa wa 'dɩ 'nyɛ.

'N n ‑kaanyɩ'ɛ dɛ'ɛ wa 'dɩ 'nyɛ 'yizee,

'mɩɔ yɩ ghälaaa 'ylimö.

Nɩkpa 'la,

'wa nɛmönɛmösaa ‑sɩbhä ma‑a tulanɩɛ 'ylimö nɩɩ:

Sɛɛ Kliisɩ 'kunɩɛ su 'klʋ a wɛlɩɩ,

sɛ yɩ sɛɛ zɛmöö,

wa'aa ‑sɩbhä 'mö 'nʋ 'lɩlɩlɩ.

19 Wa 'kä li a 'yize a za wa ‑bhölɩɛ.

'Wa nʋnʋlii ‑yɩ 'kʋä a‑a zʋ 'wʋ ‑bhöö,

'mö wa tɛkpɔnɩɛ 'mö.

Mä'ä dʋdʋ 'wʋ a ‑lii a 'yize 'mö wa pää dlɩ 'wʋ.

‑Sɩbhä a za,

'yli wa 'kää bhɩɛ 'lɩlɩlɩ.

20 ‑Maa ‑abhʋa ‑abhlɩ ‑mä ghäyɩ 'wʋ Lagɔ yɔwʋ,

mä ma‑a glɩnɩɛ ‑aa ‑tiamö a 'bhele.

‑Aa Puënyɔ,

‑Alowli Zezwii Kliisɩ,

‑mä ɔ 'kää 'bhöönɩ.

Mö ‑a ‑kʋnɩɛ.

21 Ɔ ‑kä yii,

‑a'a ngäzɩkpökpa nɩ ‑a glɩnɩɛ 'ylibhɩɛlea,

ɔ yea 'mö zigbanɩ.

Lagɔ ‑sɔɔɔ glu a kpökpa a ‑kpökpaa ɔ 'nyɔɔ ‑a 'naa 'kää 'yli bhɩɛɛ,

‑sɩbhä a ‑na ɔ ‑kanyɩɛ 'nyɛmö.

Nyɩasɛ ɔ'ɔɔ ‑sɩbhä bhɛnɩ,

‑maa Lagɔ mɔɔ 'nyɔɔ 'mötɛɛnɔ,

ɔ 'kä ‑lii 'wuë ‑gömö 'kämanɩ.