Filiipö a ‑nʋa 2

‑A'a dlɩpäsaa ‑nyɛ Zezwii Kliisɩ 'a dlɩpäsaa nɩ 'wlʋnɩ

Sɛ a ‑glɛɛ Kliisɩ 'wʋʋ,

‑sɩbhä panyɩ bhä swɩ nyɛmʋ 'mö ‑a?

'Ɔ ‑wawʋʋ pälanyɩ bhä swɩ yɔwʋ ‑a?

Lagɔ 'a 'Wugɔmʋʋ wamananyɩ bhä ‑a?

A kä bhä ngäzɩdlɩ,

a 'päpänɩ bhä dlɩ 'wʋ 'yize ‑a?

2 'N yɩ ‑kä ‑tiamö ‑sɩbhä ‑wʋʋ,

'dɩ 'mö n zʋanyɩɛ nɩɩ:

A nɩ ‑wawanɩ,

a 'wuë a nɩ 'nʋnʋnɩ 'mö,

a nɩ kä dlɩpänɔ ‑bhʋlʋ,

Lagɔ a 'yize a gbʋ nɩ plɛnaanyɩ.

‑Sɩbhä a dɔ'wʋ a ‑yii 'mäna 'mlɩ päla tenyii.

3 'A nʋnʋlii 'wuë 'mö,

a nɩ tɩ yɔwʋ vanɩ,

a nɩ tɩ anyɩ a 'nglɩ sɛ tɛlɩ.

‑Maa a nɩ yɔnɩ dlɩ 'wʋ,

a 'bhɩa a 'yila 'klʋ,

a nɩ ‑lɛ anyɩ ‑dɔ 'wʋ.

4 A nɩ tɩ bhʋlʋbhlʋ anyɩ 'wʋ sɛ tɛlɩnɩ.

‑Maa a nɩ tɛlɩnɩ a'bhɩa 'wʋ sɛ.

5 'A dlɩpäsaa ‑nyɛ Zezwii Kliisɩ 'a dlɩpäsaa nɩ 'wlʋnɩ.

6 Ɔ'bhë,

sɛɛ Lagɔ ‑wʋä,

‑sɩbhä ɔ ‑wʋmö a‑a la.

‑Maa ɔ'ɔɔ 'ɔ 'ghïlinɔɔ 'wʋ gwɩ.

7 Kɛ'mö ɔ ‑sʋʋä,

'n ɔ yiɛ gïyi a sɛ nɩkpa 'yli ‑wʋ.

‑Aa sɛ a nɩkpɛ ɔ 'zʋä,

'n ɔ ‑wʋ a‑a mä'ä dʋdʋ 'wʋ nɩkpa gla'mö.

8 Ɔ'ɔɔ ɔnyɩ 'kɔdɔ 'mö 'wʋ 'libhï,

‑maa Lagɔ 'mö ɔ 'zʋä 'klʋkpamö ‑këë ‑mä 'kwie 'mö.

Jɛzlʋnyɔ a'bhë a sɛ,

‑sɩbhä ɔ 'kunɩɛ ‑lɛ su 'klʋ.

9 ‑Sɩbhä a za,

'n Lagɔ yoo 'kɔdɔ 'wʋ 'zʋa,

'n ɔ yoo 'nglɩ 'nyɛ,

‑yɩ ziɛ 'nglɩ 'wuë 'wʋ.

10 Nzɩɩ,

‑mä zlɩ 'mö oo,

mä'ä dʋdʋ 'wʋ oo,

'n ‑mä 'kudu 'wʋ oo,

‑wa ‑wʋä ‑mä 'wuë,

wa 'kä Zezwii a 'nglɩ 'mö ‑kokomïladigbï glu 'pä,

11 wa 'kä ɔ 'nglɩ 'ghlimanɩ nɩɩ,

Zezwii Kliisɩ mɔɔ glɩnɩɛ wa 'wuë a ‑lowli.

Yɩ 'wuë 'mö,

‑aa dɩba Lagɔ 'a nglɩɩ mɩɩ 'ghlimanɩɛ.

A nɩ lɩ yɔlɔkpë a sɛ

12 ‑A'bhɩanyɩ,

dɛ n ‑wʋanyɩ a‑a ‑bhlɛ gla'möö,

a zʋʋʋ a 'klʋkpamö,

‑sɩkaa a dɔ'wʋ,

dɛ n 'nanyɩa'aa jijo'wʋ ‑wʋʋ,

a ‑kä ‑sɩbhä 'zʋ 'yize,

mɩɩ nɛnɩɛ tenyii.

'Pʋpʋɛɛ Lagɔ 'nyanyɩɛ,

a nɩ 'zʋnɛ 'yli,

a 'kä ɔ nganɔ ku 'mö ‑kä 'yize.

13 Ɛ'ɛ ‑bhö nyɩasɛ,

‑maa Lagɔ mɔɔ zʋanyɩɛ 'ɔ 'saa ɔ yɩbhää a 'tʋ dlɩ zɛmö,

mɔɔ nyanyɩ'ɛɛ 'mötɛɛnɔ 'n a nwiɛ.

14 ‑Lii 'wuë a nʋä 'mö,

a nɩ tɩ 'ngungwa,

a nɩ tɩ zɛmö ‑dɩdɩnɩ.

15 A ‑kä ‑sɩbhä zʋʋ,

‑bɛ 'naa 'kanyɩ ‑maa yɔwʋ ghlɩ,

‑maa a yi Lagɔ a 'yuë a yuë glɩnɩ.

A yɩɛ,

nɩkpa a ‑muë 'nɩ 'mö zlɔnɩ,

‑wa yɛ 'yio kɛ dlʋnɩ,

'mö a ‑nyɛɛ glɩnɩɛ 'wʋ,

zaa,

sɛɛ ylɔ lɩnɩ'ɛ 'yuylukwë 'mö,

a nɩ ‑wʋ ‑sɩbhä ‑mä wa gla'mö,

16 wɛlɩɩ ‑yɩ nyɛɛ ‑tiamö a ‑bhölɩbhölɛɛ,

a 'kʋänyɩ 'nyɛ.

A ‑kä ‑sɩbhä zʋʋ,

Kliisɩ 'a zlɩ 'kädɛɛ ‑kä ghlɛɛ,

sɛɛ n'n‑ä a dɔ'wʋ nyɩasɛ yɔlɔ a za,

'mäna ‑yii 'lɩbhä.

17 'A sɛ a 'tɛɛnɩɛ Lagɔ dlɩɩ,

‑sɩbhä 'kä ‑bhɩɛ bʋbɔnɩli a bʋbɔnɔ.

Na'bhë,

'na dluu,

'n wʋ ‑kä'ɛ bʋbɔnɩlu 'zʋʋ,

miɛ nɩɩ n ‑kɩɩ 'mö 'kuë yi ‑kë,

a ‑gänɩ 'mänasɛ Lagɔ zaa,

yɩ ‑bhöö 'mäna 'wʋ.

18 ‑Atʋayuënyɩ,

sɛ n ‑wʋä dɛ'ɛ 'mäna 'möö,

‑sɩbhä nɩ ‑bhöanyɩ 'mäna 'wʋ.

Pɔɔlʋ yɛ Timotee ‑nyɛ Epafoditɩ 'sɔ a dɛ bhïla

19 N 'tɛɛnɩ ‑Alowli Zezwii dlɩ nɩɩ,

n yeanyɩa'a ‑pa Timotee 'wʋ tie.

Ɔ ‑kä ‑mä ghlɛ 'n ɔ ‑nyɛ a 'tɩtɩ ‑kä yii,

yɩ ‑yii swɩ yɔwʋ päla.

20 Nɩkpɛ ‑mɔɔ 'kää ‑tiamö a ‑li a ‑li dlɩ 'wʋ 'pää,

ɔ ‑nɩɩɛ yɔwʋ ‑wʋ 'n ɛ 'nɩ ‑bhö Timotee a 'yize mɔɔ.

21 ‑Muë'la 'wuë,

wanyɩ a 'yize a gbʋ plɛnuë,

‑maa Zezwii Kliisɩ 'a wɛlɩɩ a gbʋ 'nuë plɛnɩ.

22 ‑Maa Timotee ɔbhlɩ,

sɛ ɔ 'zʋä,

a'bhï a yɛ ‑sɩbhä 'ylɩmö.

Miɛ nɩɩ,

sɛɛ 'yu ‑wʋ'ɛ ɔ dɩba 'ylii,

‑sɩbhä ɔ ‑wʋʋä 'yli 'n ɔ kwänɩɩɛ n 'kä Zezwii 'a 'Mänatɩtɩ bia.

23 Zaa,

n pä dlɩ nɩɩ,

'n n ‑kä 'na wɛlɩɩ a 'wʋbhlida 'ylɩmö 'wë cuu,

n yeanyɔ 'wʋ tie.

24 N kɩ'ɛ dlɩ 'wʋ nɩɩ,

‑Alowli yi 'wʋ nglu na'bhë n yeanyɩ ‑pa 'ylɩmöä yi.

25 ‑Maa ‑sɩkaa a dɔ'wʋ,

‑aa ‑daayu Epafoditɩ,

n pä dlɩ nɩɩ,

n 'kɔ 'yio 'nyɛ ɔ 'kä ‑mä 'bɩwʋ yi a dɔ'wʋ yɩ nɛnɩ.

'Mö a tie a‑a 'n ɔ ‑yiiɛ monii ‑lɛmö n 'kä nanyɩ kwänɩ.

‑Tiamö,

ɔ kwänɩɩ 'tɩɩ,

a‑a nʋä tenyii Lagɔ 'a libhoo.

26 A 'tʋ lɩbhɔ tenyii,

ɔ dlɩ klɛ 'yli,

ɛ'ɛ ‑bhö nyɩasɛ,

‑maa a 'nʋ nɩɩ ɔ'ɔɔ a ‑yɛ.

27 Gu 'lɩbhɔ a ‑tiamö tenyii,

'ku ɔ lɛ kuä.

‑Maa Lagɔ 'pä ɔ ngäzɩdlɩ,

nza ɔ'ɔɔ 'ku 'n ɔ yiɛ yɛmanɩ.

Na ngäzɩdlɩ Lagɔ 'pämöä,

nyɩasɛ n'n‑ä ‑sɩbhä gbä,

‑maa Epafoditɩ ‑kä a 'kuu,

'na ngäzɩɩ mɩɩ 'kä a‑a 'wʋ gbaanɔ.

28 ‑Sɩbhä a za n 'päpanɩɛ 'wʋ n 'kɔ 'yi 'tatinɩ,

ɔ 'kä ‑mä yi,

a 'kɔ 'ylɩmö 'mäna 'kanyɩ 'lɩbhä,

'a dilaa 'kä bhli.

‑Lɛ a dɔ'wʋ 'na dlɩɩ yi bhlimö.

29 Ɔ ‑kä ‑mä yii,

sɛ wa kää wa 'kä ‑Alowli a ‑nɔ pälaa,

a nɩ pɔlɔɔ ‑sɩbhä,

a 'kɔ 'mäna 'mö 'yli 'zʋnɩ.

Sɛ ɔ ‑wʋä da'a a nɩkpɛ,

'mö wa kää wa 'kä sasɛ köbhä.

30 Ɛ'ɛ ‑bhö nyɩasɛ,

‑maa Epafoditɩ,

Kliisɩ 'a libhoo a za,

'ku ɔ lɛ ku a‑a.

A'bhï,

sɛɛ a'aa mlɩnɩ a ‑kaa 'wʋ yii,

‑sɩbhä ɔ ‑yiiɛ a 'wlumö 'wʋ.

Ɔ'ɔɔ ɔnyɩ a 'pɩwʋ dlɩ 'wʋ 'pä,

'n ɔ ‑yiiɛ 'wʋ yi.